ഐ.സി.എഫ് ബഹ്റൈൻ മുതഅല്ലിം സ്കോളർഷിപ്പ് വിതരണം പൂർത്തിയായി; 150 വിദ്യാർഥികൾക്ക് സഹായം
പ്രദീപ് പുറവങ്കര / മനാമ
ഇന്ത്യൻ കൾച്ചറൽ ഫൗണ്ടേഷൻ (ഐ.സി.എഫ്) ബഹ്റൈൻ ഘടകം നൽകി വരുന്ന ഈ വർഷത്തെ മുതഅല്ലിം സ്കോളർഷിപ്പ് വിതരണം വിജയകരമായി പൂർത്തിയായി. കേരളത്തിലെ വിവിധ കോളേജുകളിൽ നിന്നായി തിരഞ്ഞെടുക്കപ്പെട്ട 150 വിദ്യാർഥികൾക്കാണ് ഇത്തവണ സ്കോളർഷിപ്പ് നൽകിയത്. ഐ.സി.എഫ് വിദ്യാഭ്യാസ മേഖലയിൽ നടപ്പിലാക്കി വരുന്ന ബഹുമുഖ പ്രവർത്തനങ്ങളുടെ ഭാഗമായാണ് ഈ പദ്ധതി വിഭാവനം ചെയ്തിരിക്കുന്നത്.
പുതുവർഷത്തോടനുബന്ധിച്ച് ഐ.സി.എഫ് പുറത്തിറക്കുന്ന ബഹുവർണ്ണ കലണ്ടറുകളുടെ വിതരണത്തിലൂടെ സമാഹരിക്കുന്ന തുകയാണ് സ്കോളർഷിപ്പിനായി വിനിയോഗിക്കുന്നത്. കേരളത്തിലെ വിവിധ വിദ്യാഭ്യാസ സ്ഥാപനങ്ങളിൽ വെച്ച് നടന്ന വിതരണ ചടങ്ങുകൾക്ക് സയ്യിദ് അലി ബാഫഖി തങ്ങൾ (ഉപാധ്യക്ഷൻ, സമസ്ത കേരള ജംഇയ്യത്തുൽ ഉലമ), മഞ്ഞപ്പറ്റ ഹംസ മുസ്ലിയാർ, കൊമ്പം കെ.പി. മുഹമ്മദ് മുസ്ലിയാർ എന്നിവർ നേതൃത്വം നൽകി.
കൂറ്റമ്പാറ അബ്ദുറഹ്മാൻ ദാരിമി (പ്രസിഡന്റ്, കേരള മുസ്ലിം ജമാഅത്ത് ജില്ലാ കമ്മിറ്റി), വടശ്ശേരി ഹസ്സൻ മുസ്ലിയാർ, ഇസ്സുദ്ധീൻ സഖാഫി കൊല്ലം, ഡോ. മുഹമ്മദ് കുഞ്ഞി സഖാഫി (സംസ്ഥാന സെക്രട്ടറി, എസ്.വൈ.എസ്) തുടങ്ങിയ പ്രമുഖർ വിവിധ കേന്ദ്രങ്ങളിൽ നടന്ന പരിപാടികളിൽ പങ്കെടുത്തു. വിദ്യാഭ്യാസ രംഗത്ത് പിന്നാക്കം നിൽക്കുന്ന വിദ്യാർഥികൾക്ക് താങ്ങാവുക എന്ന ലക്ഷ്യത്തോടെയാണ് ഐ.സി.എഫ് ഈ സ്കീം തുടരുന്നത്.
dfgdfg
