ഐ.എസ്.ബി @ 75 ഓപ്പൺ ബാഡ്മിന്റൺ ഫൈനൽ ശനിയാഴ്ച

മനാമ: ഇന്ത്യൻ സ്കൂൾ ബഹ്‌റൈന്റെ ഒരു വർഷം നീണ്ടുനിന്ന പ്ലാറ്റിനം ജൂബിലി ആഘോഷങ്ങളുടെ ഭാഗമായ ഐ.എസ്.ബി @ 75 ജൂനിയർ ആൻഡ് സീനിയർ ഓപ്പൺ ബാഡ്മിന്റൺ ടൂർണമെന്റ് ശനിയാഴ്ച വൈകീട്ട് സമാപിക്കും. ശനിയാഴ്ച രാത്രി 8 മണിക്ക് ജഷൻമാൾ ഓഡിറ്റോറിയത്തിലാണ് സമാപന ചടങ്ങ് നടക്കുക. വെള്ളിയാഴ്ചയോടെ 300 മത്സരങ്ങൾ പൂർത്തിയായതിനാൽ, ഫൈനൽ റൗണ്ടുകളിൽ ആവേശകരമായ മത്സരം നടക്കും. ബഹ്‌റൈൻ, സൗദി അറേബ്യ, കുവൈറ്റ് എന്നിവിടങ്ങളിൽ നിന്നുള്ള 350 കളിക്കാർ ടൂർണമെന്റിൽ പങ്കെടുക്കുന്നു. പ്രമുഖ ബിസിനസ് സ്ഥാപനമായ നാഷണൽ ട്രേഡിംഗ് ഹൗസാണ് ടൂർണമെന്റ് സ്പോൺസർ ചെയ്യുന്നത്. ബഹ്‌റൈൻ ബാഡ്മിന്റൺ ആൻഡ് സ്ക്വാഷ് ഫെഡറേഷന്റെ (ബിബിഎസ്എഫ്) അനുമതിയോടെ സംഘടിപ്പിക്കുന്ന ഈ ടൂർണമെന്റിൽ അണ്ടർ 9 മുതൽ അണ്ടർ 19 വരെയുള്ള പ്രായപരിധിയിലുള്ള ആൺകുട്ടികളുടെയും പെൺകുട്ടികളുടെയും സിംഗിൾസ്, ഡബിൾസ്, പുരുഷ ഡബിൾസ് (എലൈറ്റ്, ചാമ്പ്യൻഷിപ്പ്, എഫ്1–എഫ്5), വനിതാ ഡബിൾസ് (ലെവലുകൾ 1 & 2), മിക്‌സഡ് ഡബിൾസ് (ലെവലുകൾ സി, 1 & 2) എന്നീ വിഭാഗങ്ങൾ ഉൾപ്പെടുന്നു. ബാഡ്മിന്റൺ വേൾഡ് ഫെഡറേഷൻ (ബിഡബ്ല്യുഎഫ്) നിയമങ്ങൾക്കനുസൃതമായി എല്ലാ മത്സരങ്ങളും നോക്കൗട്ട് ഫോർമാറ്റിലാണ് നടത്തുന്നത്, സർട്ടിഫൈഡ് അമ്പയർമാരാണ് ഇവ നിയന്ത്രിക്കുന്നത്. ഇന്ത്യൻ സ്‌കൂൾ വൈസ് ചെയർമാനും സ്പോർട്സ് അംഗവുമായ ഡോ. മുഹമ്മദ് ഫൈസൽ, ടൂർണമെന്റ് ഡയറക്ടർ ബിനു പാപ്പച്ചൻ, ടൂർണമെന്റ് റഫറി ഷനിൽ അബ്ദുൾ റഹിം (ബാഡ്മിന്റൺ ഏഷ്യ) , ജനറൽ കൺവീനർ ആദിൽ അഹമ്മദ്, കോർഡിനേറ്റർ ബിനോജ് മാത്യു മുൻ ഇസി അംഗം–സ്പോർട്സ് രാജേഷ് എംഎൻ എന്നിവർ നേതൃത്വം നൽകുന്നു. ഓരോ വിഭാഗത്തിലെയും വിജയികൾക്ക് ക്യാഷ് പ്രൈസുകളും ട്രോഫികളും ലഭിക്കും; പങ്കെടുക്കുന്നവർക്കും അവരുടെ പരിശ്രമങ്ങളെയും പങ്കാളിത്തത്തെയും അംഗീകരിക്കുന്നതിന് ഡിജിറ്റൽ സർട്ടിഫിക്കറ്റുകൾ നൽകും. സ്‌കൂൾ ചെയർമാൻ അഡ്വ. ബിനു മണ്ണിൽ വറുഗീസ്, സെക്രട്ടറി വി. രാജപാണ്ഡ്യൻ, ഭരണസമിതി അംഗങ്ങൾ, പ്രിൻസിപ്പൽ വി.ആർ പളനിസ്വാമി, പ്ലാറ്റിനം ജൂബിലി ജനറൽ കൺവീനർ പ്രിൻസ് എസ്. നടരാജൻ എന്നിവർ എല്ലാ കായിക പ്രേമികളെയും ഫൈനൽ മത്സരത്തിനു സാക്ഷ്യം വഹിക്കാൻ സ്നേഹപൂർവ്വം ക്ഷണിച്ചു.