കോവിഡ്: കർശന നിയന്ത്രണങ്ങളുമായി ഒമാൻ
മസ്കത്ത്: കോവിഡ് നിയന്ത്രണങ്ങളിൽ ഇളവനുവദിച്ച ഒമാനിൽ ജനജീവിതം ഇനിയും പഴയ നിലയിലെത്തിയില്ല. മസ്കത്ത് ഗവർണറേറ്റിൽ വാണിജ്യ-വ്യാപാര സ്ഥാപനങ്ങൾ തുറന്നെങ്കിലും കർശന നിയന്ത്രണങ്ങൾ ഏർപ്പെടുത്തിയിട്ടുണ്ട്. കടകളിൽ ഒരേസമയം 2 പേരിൽ കൂടുതൽ പാടില്ല. പൊതു-സ്വകാര്യ വേദികളിൽ കൂട്ടംകൂടാൻ അനുവദിക്കില്ല. അനാവശ്യമായി പുറത്തിറങ്ങരുതെന്നാണ് പോലീസ് നിർദേശം.
വാഹന വർക് ഷോപ്-സ്പെയർ പാർട്സ് കേന്ദ്രങ്ങൾ, വാഹനങ്ങൾ വാടകയ്ക്കു നൽകുന്ന കേന്ദ്രങ്ങൾ, മത്സ്യബന്ധന ബോട്ടുകൾ, ഇലക്ട്രോണിക് - ഇലക്ട്രിക്കല്‍ സ്ഥാപനങ്ങള്‍, സ്റ്റേഷനറി കടകൾ തുടങ്ങിയവ തുറന്നത് സാധാരണക്കാർക്ക് ആശ്വാസമായി. മസ്കത്തിൽ ലോക്ഡൗൺ പിൻവലിച്ചിട്ടില്ല. ഗവർണറേറ്റുകൾക്കിടയിലുള്ള ചെക് പോയിന്റുകൾ നീക്കി. മസ്കത്ത് ഗവർണറേറ്റിൽ യാത്രയ്ക്കു നിയന്ത്രണങ്ങളുണ്ട്. മത്ര, ജഅലാന്‍ ബനീ ബു ആലി വിലായത്തുകളില്‍ യാത്രാ വിലക്ക് തുടരുകയാണ്.
