ലോക രാഷ്ട്രങ്ങളെ അണിനിരത്തി 18-ാമത് ബ്രിക്‌സ് ഉച്ചകോടി; സുപ്രധാന തീരുമാനങ്ങളുമായി 'ന്യൂഡൽഹി പ്രഖ്യാപനം'

ഷീബ വിജയൻ

ഇന്ത്യൻ തലസ്ഥാനമായ ന്യൂഡൽഹിയിൽ നടന്ന 18-ാമത് ബ്രിക്‌സ് ഉച്ചകോടി സമാപിച്ചു. ഇറാൻ, യുക്രൈൻ യുദ്ധങ്ങൾ, അമേരിക്കയുടെ പുതിയ വ്യാപാര നയങ്ങൾ തുടങ്ങി ലോകം വലിയ ഭൗമരാഷ്ട്രീയ പ്രതിസന്ധികളെ നേരിടുന്ന സമയത്താണ് ഈ ഉച്ചകോടി നടന്നത്. പ്രധാനമന്ത്രി നരേന്ദ്ര മോദി, റഷ്യൻ പ്രസിഡൻ്റ് വ്ലാദിമിർ പുടിൻ, ചൈനീസ് പ്രസിഡൻ്റ് ഷി ജിൻപിങ് എന്നിവരടക്കം 11 രാജ്യങ്ങളുടെ തലവന്മാർ പങ്കെടുത്ത ഈ ഉച്ചകോടിയിൽ സുപ്രധാനമായ 'ന്യൂഡൽഹി പ്രഖ്യാപനം' അംഗീകരിച്ചു. ഈജിപ്ത്, എത്യോപ്യ, ഇറാൻ, യുഎഇ, സൗദി അറേബ്യ, ഇന്തോനേഷ്യ എന്നീ രാജ്യങ്ങളെക്കൂടി ഉൾപ്പെടുത്തി വിപുലീകരിച്ചതിന് ശേഷമുള്ള നിർണായക ഒത്തുചേരലാണിത്.

ലോകജനസംഖ്യയുടെ പകുതിയോളവും ആഗോള ജിഡിപിയുടെ 40 ശതമാനവും പ്രതിനിധീകരിക്കുന്ന ഈ കൂട്ടായ്മയിൽ പശ്ചിമേഷ്യൻ സംഘർഷങ്ങളിൽ കടുത്ത ആശങ്ക രേഖപ്പെടുത്തി. 1967ലെ അതിർത്തികളെ അടിസ്ഥാനമാക്കി സ്വതന്ത്ര ഫലസ്തീൻ രാജ്യം സ്ഥാപിക്കണമെന്ന നിലപാടിൽ ബ്രിക്സ് രാജ്യങ്ങൾ ഉറച്ചുനിന്നു. അമേരിക്കൻ പ്രസിഡൻ്റ് ഡൊണാൾഡ് ട്രംപ് പ്രഖ്യാപിച്ച ഉയർന്ന ഇറക്കുമതി തീരുവകൾക്കും ഏകപക്ഷീയമായ വ്യാപാര വിലക്കുകൾക്കുമെതിരെ ശക്തമായി പ്രതികരിച്ച കൂട്ടായ്മ, ഇവ അന്താരാഷ്ട്ര നിയമങ്ങൾക്ക് വിരുദ്ധമാണെന്ന് ചൂണ്ടിക്കാട്ടി. 2025 ഏപ്രിലിൽ ജമ്മു കശ്മീരിലെ പഹൽഗാമിൽ 26 പേരുടെ ജീവനെടുത്ത ഭീകരാക്രമണത്തെ ഉച്ചകോടി അപലപിക്കുകയും ഭീകരവാദത്തിനെതിരെ ഒറ്റക്കെട്ടായി നിലപാടെടുക്കുകയും ചെയ്തു. യുക്രൈൻ വിഷയത്തിൽ സമാധാനപരമായ ചർച്ചകളിലൂടെ പരിഹാരം കാണണമെന്ന് ആഹ്വാനം ചെയ്ത രാജ്യങ്ങൾ പാശ്ചാത്യ രാജ്യങ്ങൾ ഏർപ്പെടുത്തിയ ഏകപക്ഷീയമായ ഉപരോധങ്ങളെ വിമർശിച്ചു. സ്വന്തമായി ഒരു പൊതു കറൻസി എന്നതിനേക്കാൾ, നിലവിൽ പ്രാദേശിക നാണയങ്ങളിലെ വ്യാപാരം പ്രോത്സാഹിപ്പിക്കാനാണ് തീരുമാനം. സാങ്കേതികവിദ്യാ രംഗത്ത് 2026 ഫെബ്രുവരിയിൽ ഇന്ത്യ ആതിഥേയത്വം വഹിക്കുന്ന 'എഐ ഇംപാക്ട് സമ്മിറ്റിന്' എല്ലാ പിന്തുണയും പ്രഖ്യാപിക്കുകയും ചെയ്തു.