ശീഷ കഫേകളുടെ ലൈസൻസിംഗിലും നിർമ്മാണ സമയത്തിലും കർശന നിയന്ത്രണം വേണം: മുഹറഖ് മുൻസിപ്പൽ കൗൺസിൽ

പ്രദീപ് പുറവങ്കര

മനാമ, ബഹ്‌റൈൻ — ശീഷ കഫേകൾ ആരംഭിക്കുന്നതിനുള്ള സ്ഥലങ്ങൾ നിശ്ചയിക്കുന്നതിലും രാത്രികാല നിർമ്മാണ പ്രവർത്തനങ്ങൾക്ക് സമയം പരിമിതപ്പെടുത്തുന്നതിലും മുൻസിപ്പൽ കൗൺസിലുകൾക്ക് കൂടുതൽ അധികാരവും നിർണ്ണായക പങ്കും നൽകണമെന്ന് മുഹറഖ് മുൻസിപ്പൽ കൗൺസിൽ ആവശ്യപ്പെട്ടു. ജനങ്ങളുടെ ദൈനംദിന ജീവിതത്തെ ബാധിക്കുന്ന ഇത്തരം വിഷയങ്ങളിൽ തങ്ങളുടെ ശബ്ദം കേൾക്കണമെന്നാണ് കൗൺസിൽ ചൂണ്ടിക്കാട്ടുന്നത്.

മുഹറഖ് മുൻസിപ്പൽ കൗൺസിൽ ചെയർമാൻ അബ്ദുൽ അസീസ് അൽ നാർ, വൈസ് ചെയർമാൻ എഞ്ചിനീയർ സ്വാലിഹ് ബു ഹസ്സ, കമ്മിറ്റി ചെയർമാന്മാരായ ഫദൽ അൽ അവാദ്, മുഹമ്മദ് അൽ മഹ്മൂദ്, അബ്ദുൽ ഖാദർ അൽ സയ്യിദ് എന്നിവരുടെ സാന്നിധ്യത്തിൽ ചേർന്ന ജനറൽ കമ്മിറ്റി യോഗത്തിലാണ് ഈ ആവശ്യങ്ങൾ ഉയർന്നുവന്നത്.

ശീഷ കഫേകൾക്ക് ലൈസൻസ് അനുവദിക്കുന്നതിനുള്ള നിബന്ധനകൾ രൂപീകരിക്കുന്നതിൽ തദ്ദേശീയ കൗൺസിലുകൾക്ക് ഔദ്യോഗിക പങ്കാളിത്തം നൽകണമെന്ന് കമ്മിറ്റി ആവശ്യപ്പെട്ടു. ജനവാസ മേഖലകൾ, സ്കൂളുകൾ, ആരാധനാലയങ്ങൾ, പൊതു ഇടങ്ങൾ എന്നിവയിൽ നിന്ന് നിശ്ചിത അകലം പാലിച്ചു മാത്രമേ ശീഷ കഫേകൾക്ക് അനുമതി നൽകാവൂ. പൊതുജനാരോഗ്യം സംരക്ഷിക്കുന്നതിനും പ്രദേശവാസികളുടെ ജീവിതനിലവാരം ഉയർത്തുന്നതിനും ഇത് അത്യന്താപേക്ഷിതമാണ്.

വാണിജ്യ സ്ഥാപനങ്ങൾക്കുള്ള ലൈസൻസിംഗ് നിയമങ്ങൾ നിലവിൽ മറ്റ് സർക്കാർ മന്ത്രാലയങ്ങളാണ് നിശ്ചയിക്കുന്നതെങ്കിലും, ജനങ്ങളുടെ പരാതികളും ഓരോ പ്രദേശത്തിന്റെയും പ്രത്യേകതകളും നന്നായി അറിയാവുന്നത് തിരഞ്ഞെടുക്കപ്പെട്ട മുൻസിപ്പൽ കൗൺസിലുകൾക്കാണെന്ന് യോഗം വ്യക്തമാക്കി. അതിനാൽ നിബന്ധനകൾ അന്തിമമാക്കുന്നതിന് മുമ്പ് കൗൺസിലുകളുടെ അഭിപ്രായം തേടുന്നത് നിക്ഷേപങ്ങളെ പ്രോത്സാഹിപ്പിക്കുന്നതിനൊപ്പം ജനവാസ മേഖലകളുടെ സമാധാന അന്തരീക്ഷം സംരക്ഷിക്കാനും സഹായിക്കും.

സമീപകാലത്ത് ജനങ്ങളിൽ നിന്ന് വലിയ രീതിയിൽ പരാതി ഉയർന്ന മറ്റൊരു വിഷയമായ നിർമ്മാണ മേഖലയിലെ സമയക്രമവും യോഗം ചർച്ച ചെയ്തു. തടസ്സമില്ലാതെ ശബ്ദകോലാഹലമുണ്ടാക്കുന്ന നിർമ്മാണ പ്രവർത്തനങ്ങൾ നിയന്ത്രിക്കാൻ നിലവിൽ വ്യക്തമായ നിയമപരമായ ചട്ടക്കൂടില്ലെന്ന് കൗൺസിൽ അംഗങ്ങൾ ചൂണ്ടിക്കാട്ടി. ഇത് കരാറുകാർക്കും പ്രൊജക്ട് ഉടമകൾക്കും ഇഷ്ടമുള്ള സമയത്ത് ജോലി ചെയ്യാൻ അവസരമൊരുക്കുന്നു.

ജനവാസ മേഖലകളിലെ ശബ്ദമലിനീകരണം കുറയ്ക്കുന്നതിനായി നിർമ്മാണ സ്ഥലങ്ങളിൽ വ്യക്തമായ പ്രവൃത്തി സമയം നിശ്ചയിക്കണമെന്ന് കമ്മിറ്റി നിർദ്ദേശിച്ചു. അത്യാവശ്യ ഘട്ടങ്ങളിൽ പ്രത്യേക അനുമതിയോടെ മാത്രം ജോലി തുടരാനുള്ള ഇളവുകൾ നൽകാം. രാജ്യത്ത് തുടരുന്ന നഗരവികസനത്തോടൊപ്പം ജനങ്ങളുടെ സമാധാനപരമായ ജീവിതവും ഉറപ്പാക്കാൻ ഇത്തരം നിയമങ്ങൾ സഹായിക്കുമെന്ന് മുഹറഖ് മുൻസിപ്പൽ കൗൺസിൽ ചൂണ്ടിക്കാട്ടി.