പുരാതന മുഹറഖിന്റെ പുനരുദ്ധാരണം: ഒന്നാം ഘട്ട ജോലികൾ 73 ശതമാനം പൂർത്തിയായി

പ്രദീപ് പുറവങ്കര

മനാമ, ബഹ്‌റൈൻ — ചരിത്രപ്രസിദ്ധമായ പഴയ മുഹറഖ് നഗരത്തിന്റെ പൈതൃകവും ഭംഗിയും ചോർന്നുപോകാതെ നടപ്പിലാക്കുന്ന ബൃഹത്തായ പുനരുദ്ധാരണ പദ്ധതിയുടെ ഒന്നാം ഘട്ടം 73 ശതമാനം പൂർത്തിയായി. മുഹറഖിലെ ആറ് പുരാതന അയൽപക്കങ്ങളിലായി 300-ഓളം വീടുകൾ, 72 പൊതു ചതുരങ്ങൾ , ഒരു ലക്ഷത്തോളം വൃക്ഷങ്ങൾ എന്നിവ ഉൾപ്പെടുന്നതാണ് ഈ വൻകിട വികസന പദ്ധതി.

2023-ൽ ആരംഭിച്ച ഒന്നാം ഘട്ടത്തിൽ റോഡുകൾ, പാർക്കിംഗ് മേഖലകൾ, ഇടുങ്ങിയ ഗലികൾ, വൈദ്യുതി, കുടിവെള്ളം, മലിനജല നിഷ്കാസന ശൃംഖലകൾ എന്നിവയുടെ ആധുനികവൽക്കരണവും ഉൾപ്പെടുന്നു. പദ്ധതിക്കായി 247 വസ്തുവകകൾ ഏറ്റെടുത്തിട്ടുണ്ടെന്നും എല്ലാ ഉടമസ്ഥർക്കും കൃത്യമായ നഷ്ടപരിഹാരം നൽകിയിട്ടുണ്ടെന്നും മുൻസിപ്പാലിറ്റി കാര്യ മന്ത്രാലയ അണ്ടർസെക്രട്ടറി ശൈഖ് മുഹമ്മദ് ബിൻ അഹമ്മദ് അൽ ഖലീഫ വ്യക്തമാക്കി.

പഴയ കെട്ടിടങ്ങളുടെ മുൻഭാഗങ്ങൾ , ഇടുങ്ങിയ വഴികൾ, പരമ്പരാഗത ശൈലി എന്നിവ അതേപടി നിലനിർത്തിക്കൊണ്ടാണ് വികസനം നടപ്പിലാക്കുന്നത്. ജനങ്ങൾ താമസിക്കുന്ന വീടുകളും സ്കൂളുകളും കടകളും പ്രവർത്തിക്കുന്ന തിരക്കേറിയ മേഖലകളിലാണ് ജോലികൾ പുരോഗമിക്കുന്നതെന്നും പദ്ധതി കൃത്യമായ സമയബന്ധിതമായി മുന്നേറുന്നുണ്ടെന്നും ഭവന-നഗരാസൂത്രണ മന്ത്രാലയം അണ്ടർസെക്രട്ടറി ഫാത്തിമ അൽ മന്നായി അറിയിച്ചു.

ഈ പ്രദേശത്തെ പുതിയ കെട്ടിട നിർമ്മാണങ്ങൾ, കടകളുടെ ബോർഡുകൾ, തെരുവ് വിളക്കുകൾ, പൊതു ഇടങ്ങൾ എന്നിവയ്‌ക്കായി പ്രത്യേക ചട്ടങ്ങൾ പ്രാബല്യത്തിൽ വരും. ഭാവിയിലെ എല്ലാ നിർമ്മാണങ്ങളും ഈ മാനദണ്ഡങ്ങൾ പാലിച്ചായിരിക്കണം.

ഒന്നാം ഘട്ടത്തിന്റെ ഭാഗമായി 12,000 ചതുരശ്ര മീറ്റർ വിസ്തൃതിയിൽ ഹരിത മേഖല വികസിപ്പിക്കുന്നുണ്ട്. കൂടാതെ, താമസക്കാർക്ക് മൂന്നോ നാലോ മിനിറ്റ് നടക്കാവുന്ന ദൂരത്തിൽ ആവശ്യമായ സേവനങ്ങളും പാർക്കിംഗ് സൗകര്യങ്ങളും ഉറപ്പാക്കുന്ന രീതിയിലാണ് ഗതാഗത ആസൂത്രണം. ചരിത്രപ്രസിദ്ധമായ 'കാസിനോ ഗാർഡന്റെ' പുനർനിർമ്മാണം പൂർത്തിയാക്കി ഒന്നാം ഘട്ടത്തോടൊപ്പം പൊതുജനങ്ങൾക്കായി തുറന്നുകൊടുക്കും.

മുഹറഖിന്റെ പരമ്പരാഗത ഭംഗിയും സാംസ്കാരിക പൈതൃകവും ഒട്ടും ചോർന്നുപോകാതെയാണ് ഓരോ നിർമ്മാണവും നടപ്പിലാക്കുന്നതെന്ന് ബഹ്‌റൈൻ അതോറിറ്റി ഫോർ കൾച്ചർ ആൻഡ് ആന്റിക്വിറ്റീസ് ഹെറിറ്റേജ് വിഭാഗം ഡയറക്ടർ ജനറൽ ശൈഖ് മുഹമ്മദ് ബിൻ ഖലീഫ അൽ ഖലീഫ വ്യക്തമാക്കി.