ഗാസയുടെ പുനർനിർമ്മാണത്തിനായി 'പീസ് കൗൺസിൽ'; യോഗത്തിൽ ബഹ്റൈൻ രാജാവ് പങ്കെടുത്തു
പ്രദീപ് പുറവങ്കര I ബഹ്റൈൻ
വാഷിംഗ്ടൺ: മേഖലയിൽ ശാശ്വത സമാധാനം പുനഃസ്ഥാപിക്കാനും ഗാസയുടെ പുനർനിർമ്മാണം ലക്ഷ്യമിട്ടും രൂപീകരിച്ച പീസ് കൗൺസിലിന്റെ പ്രഥമ യോഗത്തിന് വാഷിംഗ്ടൺ ഡി.സി. വേദിയായി. അമേരിക്കൻ പ്രസിഡന്റ് ഡൊണാൾഡ് ട്രംപിന്റെ പ്രത്യേക ക്ഷണപ്രകാരം ബഹ്റൈൻ രാജാവ് ഹിസ് മജസ്റ്റി ഹമദ് ബിൻ ഈസ അൽ ഖലീഫ യോഗത്തിൽ പങ്കെടുത്തു. വിവിധ രാജ്യങ്ങളിലെ ഭരണാധികാരികളും അന്താരാഷ്ട്ര സംഘടനാ പ്രതിനിധികളും പങ്കെടുത്ത ഈ സമ്മേളനം മിഡിൽ ഈസ്റ്റിലെ പുതിയൊരു സമാധാന യുഗത്തിന്റെ തുടക്കമായാണ് വിലയിരുത്തപ്പെടുന്നത്.
സമ്മേളനം ഉദ്ഘാടനം ചെയ്തുകൊണ്ട് സംസാരിച്ച പ്രസിഡന്റ് ഡൊണാൾഡ് ട്രംപ്, ഗാസയിലെ സങ്കീർണ്ണമായ സാഹചര്യം പരിഹരിക്കാൻ ആത്മാർത്ഥമായ രാഷ്ട്രീയ ഇച്ഛാശക്തിയും കൂട്ടായ പരിശ്രമവും ആവശ്യമാണെന്ന് ഓർമ്മിപ്പിച്ചു. യുദ്ധത്തിന്റെ നാശനഷ്ടങ്ങളെക്കാൾ മൂല്യമുള്ളത് സമാധാനത്തിനാണെന്ന് അദ്ദേഹം വ്യക്തമാക്കി. ഗാസയുടെ പുനർനിർമ്മാണത്തിനും മാനുഷിക സഹായത്തിനുമായി അമേരിക്ക വലിയൊരു സാമ്പത്തിക പാക്കേജ് പ്രഖ്യാപിച്ചതിനൊപ്പം, സമാധാന പ്രക്രിയയെ പിന്തുണയ്ക്കുന്നതിനായി അന്താരാഷ്ട്ര പങ്കാളികളുമായി ചേർന്ന് പ്രവർത്തിക്കാനുള്ള അമേരിക്കയുടെ പ്രതിജ്ഞാബദ്ധത അദ്ദേഹം ആവർത്തിച്ചു.
സമ്മേളനത്തിൽ അഭിസംബോധന ചെയ്ത ബഹ്റൈൻ രാജാവ് ഹിസ് മജസ്റ്റി ഹമദ് ബിൻ ഈസ അൽ ഖലീഫ, പീസ് കൗൺസിലിന്റെ സ്ഥാപക അംഗമെന്ന നിലയിലുള്ള ബഹ്റൈന്റെ അഭിമാനം പ്രകടിപ്പിച്ചു. ഗാസയിൽ സമാധാനം കൊണ്ടുവരുന്നതിനായി പ്രസിഡന്റ് ട്രംപ് മുന്നോട്ടുവെച്ച സമാധാന പദ്ധതിയെയും പീസ് കൗൺസിൽ രൂപീകരണത്തെയും അദ്ദേഹം അഭിനന്ദിച്ചു. ഗാസയിലെ സേവന മേഖലകൾ മെച്ചപ്പെടുത്തുന്നതിനായി ഒരു അത്യാധുനിക ഡിജിറ്റൽ ഗവൺമെന്റ് പ്ലാറ്റ്ഫോം സ്ഥാപിക്കുന്നതിന് ആവശ്യമായ അടിസ്ഥാന സൗകര്യങ്ങളും സാങ്കേതിക വിദ്യയും ബഹ്റൈൻ നൽകാമെന്ന് അദ്ദേഹം യോഗത്തിൽ വാഗ്ദാനം ചെയ്തു.
ഗാസയിൽ അടിയന്തരമായി സ്ഥിരമായ വെടിനിർത്തൽ നടപ്പിലാക്കണമെന്നും മേഖലയിലെ ജനങ്ങൾക്ക് പുതിയ പ്രതീക്ഷയും അവസരങ്ങളും നൽകുന്ന രീതിയിൽ പുനർനിർമ്മാണ പ്രവർത്തനങ്ങൾ വേഗത്തിലാക്കണമെന്നും രാജാവ് ആഹ്വാനം ചെയ്തു. തകർന്നടിഞ്ഞ ഗാസയുടെ അവശിഷ്ടങ്ങൾക്കിടയിൽ നിന്ന് സുരക്ഷയും സമാധാനവുമുള്ള ഒരു 'പുതിയ ഗാസ' ഉയർന്നുവരണമെന്നതാണ് ബഹ്റൈന്റെ കാഴ്ചപ്പാടെന്നും അദ്ദേഹം കൂട്ടിച്ചേർത്തു. വിശുദ്ധ റമദാൻ മാസത്തിൽ നടക്കുന്ന ഈ ഉദ്യമം ലോകത്തിന് മുഴുവൻ ശാന്തിയും ഐശ്വര്യവും കൊണ്ടുവരട്ടെ എന്ന് അദ്ദേഹം പ്രാർത്ഥിച്ചു.
പാലസ്തീൻ ജനതയുടെ പരമാധികാരമുള്ള സ്വതന്ത്ര രാഷ്ട്രം എന്ന ന്യായമായ ആവശ്യത്തെ പിന്തുണയ്ക്കുന്നതോടൊപ്പം, ഇസ്രായേലുമായും മറ്റ് അയൽരാജ്യങ്ങളുമായും സമാധാനപരമായ സഹവർത്തിത്വം ഉറപ്പാക്കുന്ന സമഗ്രമായ സമാധാന ചട്ടക്കൂടിനെ ബഹ്റൈൻ അനുകൂലിക്കുന്നു. അബ്രഹാം ഉടമ്പടിയിലും അമേരിക്കയുമായുള്ള സുരക്ഷാ കരാറുകളിലും ബഹ്റൈൻ പങ്കാളിയായത് മേഖലയുടെ സുസ്ഥിരത ലക്ഷ്യമിട്ടാണെന്നും, അന്താരാഷ്ട്ര പങ്കാളികളുമായി ചേർന്ന് സമാധാനപരമായ ഭാവി കെട്ടിപ്പടുക്കാൻ ബഹ്റൈൻ എന്നും മുന്നിലുണ്ടാകുമെന്നും രാജാവ് ഉറപ്പുനൽകി.
fgcf
