വേൾഡ് മലയാളി കൗൺസിൽ ബഹ്റൈൻ പ്രൊവിൻസ് സാഹിത്യ സമിതിയുടെ പ്രവർത്തനങ്ങൾക്ക് തുടക്കമായി

പ്രദീപ് പുറവങ്കര / മനാമ  

ലോകത്തെ 46 രാജ്യങ്ങളിൽ ശക്തമായ സാന്നിധ്യമുള്ള വേൾഡ് മലയാളി കൗൺസിലിന്റെ (WMC) ബഹ്റൈൻ പ്രൊവിൻസ് ആർട്ട് ആൻഡ് കൾച്ചറൽ ഫോറത്തിന് കീഴിലുള്ള സാഹിത്യ സമിതിയുടെ പ്രവർത്തനങ്ങൾക്ക് തുടക്കം കുറിച്ചു. കേരള കാത്തലിക് അസോസിയേഷനുമായി (KCA) സഹകരിച്ച് കെ.സി.എ ഹാളിൽ വെച്ചാണ് സമിതിയുടെ പ്രഥമ പരിപാടി സംഘടിപ്പിച്ചത്. ചലച്ചിത്ര സംവിധായകനും സാഹിത്യകാരനുമായ അജിത് നായരുടെ 'പറഞ്ഞാലും തീരാത്ത കഥകൾ' എന്ന പുസ്തകത്തെക്കുറിച്ചുള്ള ചർച്ചാസംഗമം ചടങ്ങിലെ പ്രധാന ആകർഷണമായിരുന്നു.

ഡബ്ല്യു.എം.സി ബഹ്റൈൻ പ്രൊവിൻസ് ജനറൽ സെക്രട്ടറി അമൽദേവ് ഓ.കെ ചടങ്ങിൽ സ്വാഗതം ആശംസിച്ചു. വൈസ് ചെയർമാൻ വിനോദ് നാരായണൻ ചർച്ചയുടെ മോഡറേറ്ററായിരുന്നു. കെ.സി.എ പ്രസിഡന്റും ഡബ്ല്യു.എം.സി ഗ്ലോബൽ ഭാരവാഹിയുമായ ജെയിംസ് ജോൺ, ഗ്ലോബൽ ഭാരവാഹി ബാബു തങ്ങളത്തിൽ, ഗ്ലോബൽ എഡ്യൂക്കേഷൻ ഫോറം ചെയർപേഴ്സൺ ഷെമിലി പി. ജോൺ, പ്രൊവിൻസ് ട്രഷറർ ഹരീഷ് നായർ എന്നിവർ ചടങ്ങിൽ സംസാരിച്ചു. ന്യൂ ഇന്ത്യൻ സ്കൂൾ പ്രിൻസിപ്പൽ ഡോ. ഗോപിനാഥ് മേനോൻ, ഡബ്ല്യു.എം.സി എക്സിക്യൂട്ടീവ് അംഗം സുജിത് കൂട്ടാല, വനിതാ വിഭാഗം പ്രസിഡന്റ് ഷെജിൻ സുജിത്, എക്സിക്യൂട്ടീവ് മെമ്പർ പ്രസന്ന രഘു, യൂത്ത് ഫോറം ജനറൽ സെക്രട്ടറി ഡോ. രസ്ന സുജിത്, ഐ.സി.ആർ.എഫ് രക്ഷാധികാരി അരുൾ ദാസ്, സോപാനം ചെയർമാൻ ചന്ദ്രശേഖരൻ തുടങ്ങിയ പ്രമുഖരും സദസ്സിനെ അഭിസംബോധന ചെയ്തു.

ബഹ്റൈനിലെ സാംസ്കാരിക രംഗത്തെ പ്രമുഖരായ രാം ഗോപാൽ മേനോൻ, പ്രശാന്ത് മേനോൻ, ബഷീർ എസ്.വി, ശബനി വാസുദേവ്, ബിജു, ഫിറോസ് തിരുവത്ര, ആശ രാജീവ്, ബോണി ജോസ്, അനഘ രാജീവൻ, ഷിജോയ്, പ്രശോഭ് എന്നിവർ പുസ്തകത്തെ കുറിച്ചുള്ള ചർച്ചകളിൽ പങ്കെടുത്തു. പ്രസിദ്ധീകരിച്ച് ഒരു മാസത്തിനുള്ളിൽ തന്നെ രണ്ടായിരത്തിലധികം കോപ്പികൾ വിറ്റഴിഞ്ഞ് രണ്ടാം പതിപ്പിലേക്ക് പ്രവേശിക്കുന്ന അജിത് നായരുടെ കൃതിയെ സംഘാടകർ അഭിനന്ദിച്ചു.