സ്വർണവില കുതിച്ചുയരുന്നു; പവന് 97,280 രൂപ

ശാരിക / കൊച്ചി

ആഭരണപ്രിയരുടെ നെഞ്ചിൽ ഇടിത്തീയായി സ്വർണവില കുതിക്കുകയാണ്. ഇന്ന് ഗ്രാമിന് 175 രൂപയും പവന് ഒറ്റയടിക്ക് 1,400 രൂപയുമാണ് വർധിച്ചത്. ഇതോടെ, ഒരു ഗ്രാം സ്വർണത്തിന് 12,160 രൂപയിലും ഒരു പവൻ സ്വർണത്തിന് 97,280 രൂപയിലുമാണ് വ്യാപാരം നടക്കുന്നത്. 18 കാരറ്റ് സ്വർണവില ഗ്രാമിന് 145 രൂപ ഉയർന്ന് 10,000 രൂപയിലെത്തി. കഴിഞ്ഞ ഒക്ടോബർ 17-ന് രേഖപ്പെടുത്തിയ ഗ്രാമിന് 12,170 രൂപയും പവന് 97,360 രൂപയുമെന്ന നിലവിലെ റെക്കോർഡ് വിലയിൽ നിന്ന് വെറും 80 രൂപയുടെ മാത്രം അകലമാണ് ഇന്നത്തെ വിലയ്ക്കുള്ളത്.

മാസാദ്യ ദിനത്തിലെ വൻകുതിപ്പിന് ശേഷം സ്വർണവില താഴ്ന്നിറങ്ങുകയും പിന്നീട് തിരിച്ചുകയറുകയുമായിരുന്നു. വ്യാഴാഴ്ച രണ്ട് തവണയായി മാറിമറിഞ്ഞ സ്വർണവിലയാണ് ഇന്ന് കുതിച്ചുയർന്നത്. വ്യാഴാഴ്ച രാവിലെ പവന് 80 രൂപ കുറഞ്ഞെങ്കിലും ഉച്ചയോടെ 400 രൂപ വർധിക്കുകയായിരുന്നു. ഇതോടെ, കഴിഞ്ഞ രണ്ട് ദിവസം കൊണ്ട് പവന് 1,800 രൂപയാണ് വർധിച്ചത്.

ജനുവരി 22-നാണ് പവൻ വില ആദ്യമായി 60,000 കടന്നത്. തുടർന്ന് ജനുവരി 31-ന് 960 രൂപ ഒറ്റയടിക്ക് ഉയർന്ന് 61,000 രൂപയിലെത്തി. ഫെബ്രുവരി ഒന്നിന് 61,960 രൂപയായിരുന്ന വില, നാലിന് 840 രൂപ വർധിച്ച് 62,000 രൂപയും, അഞ്ചിന് 760 രൂപ ഉയർന്ന് 63,000 രൂപയും, 11-ന് 640 രൂപ ഉയർന്ന് 64,000 രൂപയും കടന്ന് പുതിയ നാഴികക്കല്ലുകൾ പിന്നിട്ടു.

മാർച്ച് ഒന്നിന് 63,440 രൂപയിൽ വ്യാപാരം ആരംഭിച്ച ശേഷം കയറ്റിറക്കങ്ങൾക്കൊടുവിൽ 14-ന് 65,000 രൂപയും, 18-ന് 66,000 രൂപയും, 31-ന് 67,000 രൂപയും കടന്നു. ഏപ്രിൽ ഒന്നിന് 68,000 പിന്നിട്ടു. പത്തു ദിവസങ്ങൾക്കു ശേഷം ഏപ്രിൽ 11-ന് 69,000 രൂപയും, 12-ന് 70,000 രൂപയും മറികടന്നു. ഏപ്രിൽ 17-ന് ഒറ്റയടിക്ക് 840 രൂപ ഉയർന്ന വില 71,000 രൂപ പിന്നിട്ടു. 21-ന് 72,000 രൂപ പിന്നിട്ട സ്വർണവില, 22-ന് ഒറ്റയടിക്ക് 2,200 രൂപ ഇടിഞ്ഞ് 74,000 എന്ന നാഴികക്കല്ലിലെത്തി.

മേയ് 15-ന് 68,880 രൂപയിലേക്ക് ഇടിഞ്ഞ സ്വര്‍ണ്ണവില പിന്നീട് വർധിക്കുന്ന കാഴ്ചയാണ് കണ്ടത്. ഏഴ് ദിവസത്തിനിടെ ഏകദേശം മൂവായിരം രൂപ വർധിച്ച് വീണ്ടും 72,000 കടന്നു. ജൂൺ 14-ന് ഗ്രാമിന് 25 രൂപയും പവന് 200 രൂപയും വർധിച്ച് ഗ്രാമിന് 9,320 രൂപയും പവന് 74,560 രൂപയുമെന്ന ചരിത്ര വിലയിലെത്തി. പിന്നീട് താഴ്ന്നുപോയ സ്വർണം ചാഞ്ചാട്ടങ്ങൾക്കൊടുവിൽ വീണ്ടും റെക്കോർഡിലേക്ക് കുതിക്കുകയായിരുന്നു.

ജൂലൈ തുടക്കത്തിൽ 72,160 രൂപയായിരുന്ന ഒരു പവൻ സ്വർണത്തിന്റെ വില, ഒൻപതിന് 72,000 രൂപയായി താഴ്ന്ന് ആ മാസത്തെ ഏറ്റവും താഴ്ന്ന നിലവാരത്തിൽ എത്തി. പിന്നീട് രണ്ടാഴ്ചയ്ക്കിടെ ഏകദേശം 1,400 രൂപ വർധിച്ച് വീണ്ടും 73,000 കടന്നു. പിന്നാലെ 22-ന് വീണ്ടും 74,000 പിന്നിടുകയും 23-ന് 75,000 രൂപ കടന്ന് പുതിയ ഉയരം കുറിക്കുകയും ചെയ്തു. 23-ന് പവന് 75,040 രൂപയും ഗ്രാമിന് 9,380 രൂപയുമായിരുന്ന വില പിന്നീടുള്ള ദിവസങ്ങളിൽ താഴേക്കുപോയി.

ഓഗസ്റ്റ് തുടക്കത്തിൽ സ്വർണവില വീണ്ടും കുതിക്കുന്ന കാഴ്ചയാണ് കണ്ടത്. എട്ടിന് ഗ്രാമിന് 9,470 രൂപയും പവന് 75,760 രൂപയുമെന്ന റെക്കോർഡ് ഉയരത്തിലെത്തി. പിന്നീട് 12 ദിവസത്തിനിടെ 2,300 രൂപ കുറഞ്ഞ് ഇടിവോടെയാണ് മാസം അവസാനിച്ചത്.

സെപ്റ്റംബർ ഒന്നിനാണ് സ്വർണവില 77,000 കടന്നത്. പിന്നീട്, മൂന്നിന് ചരിത്രത്തിലാദ്യമായി 78,000 രൂപ പിന്നിട്ടു. ആറിന് 79,000 കടന്ന സ്വർണവില ഒൻപതിന് 80,000 രൂപയും, പത്തിന് 81,000 രൂപയും, 16-ന് 82,000 രൂപയും പിന്നിട്ടു. വൻ കുതിപ്പ് ദൃശ്യമായ 23-ന് രണ്ടുതവണയായി 1,920 രൂപ കൂടിയതോടെ ഒരേ ദിവസം 83,000 രൂപയും 84,000 രൂപയും പിന്നിട്ട് ചരിത്രം കുറിച്ചു. പിന്നീട് ഒരാഴ്ചത്തെ ഇടവേളയ്ക്കു ശേഷം വീണ്ടും കുതിച്ച സ്വർണം 29-ന് 85,000 രൂപ പിന്നിടുകയും 30-ന് 86,000 രൂപയെന്ന പുതിയ ഉയരം കുറിക്കുകയും ചെയ്തു.

ഒക്ടോബർ ഒന്നിന് ചരിത്രത്തിലാദ്യമായി 87,000 പിന്നിട്ട സ്വർണവില പിന്നീട് താഴേക്കുപോയി. രണ്ട് ദിവസത്തിനിടെ 880 രൂപയുടെ ഇടിവുണ്ടായി. പിന്നാലെ നാലിന് വീണ്ടും 87,000 പിന്നിട്ട സ്വർണം ആറിന് 88,000 രൂപയും, ഏഴിന് 89,000 രൂപയും, എട്ടിന് 90,000 രൂപയും, ഒൻപതിന് 91,000 രൂപയും കടന്നു. തുടർന്ന് 14-ന് ഒറ്റയടിക്ക് 2,400 രൂപ ഉയർന്ന സ്വർണവില 94,000 കടക്കുകയും 17-ന് 2,440 രൂപ ഉയർന്ന് 97,000 രൂപയെന്ന നാഴികക്കല്ല് പിന്നിടുകയും ചെയ്തു. എന്നാൽ പിന്നീട് താഴേക്കുപോയ സ്വർണവില 28-ന് 89,000 രൂപയിലും താഴെ വീഴുകയുണ്ടായി.

നവംബർ തുടക്കത്തിൽ 90,200 രൂപയായിരുന്നു ഒരു പവൻ സ്വർണത്തിന്റെ വില. അഞ്ചിന് 89,080 രൂപയായി താഴ്ന്ന് ഈ മാസത്തെ ഏറ്റവും താഴ്ന്ന നിലവാരത്തിൽ എത്തി. പിന്നീട് പടിപടിയായി വില ഉയർന്ന് 13-ന് 94,000-ന് മുകളിൽ എത്തി. പിന്നാലെ ചാഞ്ചാടിയ സ്വർണവില മാസാവസാന ദിനമായ 30-ന് 95,000 കടന്നു.

ഓഹരി വിപണിയിലെ ചലനങ്ങളും രാജ്യാന്തര വിപണിയിലെ മാറ്റങ്ങളുമാണ് വിപണിയിൽ പ്രതിഫലിക്കുന്നത്. രാജ്യാന്തര സ്വർണവില ഔൺസിന് 70 ഡോളർ മുന്നേറി 4,268 ഡോളറിൽ എത്തിയതോടെ കേരളത്തിലും വില കുതിക്കുകയായിരുന്നു. ഇന്ത്യൻ രൂപ ഇന്നും റെക്കോർഡ് താഴ്ചയിലേക്ക് നിലംപൊത്തി. വ്യാഴാഴ്ച 90.33 എന്ന സർവകാല താഴ്ചയിലേക്ക് പതിച്ച രൂപ, ഇന്ന് രാവിലെ 90.56-ൽ എത്തി. ഇതും സ്വർണവിലയെ സ്വാധീനിച്ചു.

അതേസമയം, വെള്ളിയുടെ വിലയിലും റെക്കോർഡ് കുതിപ്പാണുണ്ടായത്. ഒരു ഗ്രാം സാധാരണ വെള്ളിക്ക് അഞ്ചു രൂപ ഉയർന്ന് 201 രൂപയിലാണ് വ്യാപാരം പുരോഗമിക്കുന്നത്.