ഗുരുദേവ സോഷ്യൽ സൊസൈറ്റി ലേഡീസ് വിംഗ് പ്രവർത്തനങ്ങൾക്ക് തുടക്കമായി
പ്രദീപ് പുറവങ്കര
മനാമ: സൽമാനിയ കാനു ഗാർഡനിൽ പ്രവർത്തിക്കുന്ന ഗുരുദേവ സോഷ്യൽ സൊസൈറ്റിയുടെ ഈ വർഷത്തെ ലേഡീസ് വിംഗ് പ്രവർത്തനങ്ങളുടെ ഉദ്ഘാടനം സൊസൈറ്റി അങ്കണത്തിൽ നടന്ന വർണ്ണാഭമായ ചടങ്ങിൽ മലയാളത്തിന്റെ ഭാവഗായിക ലതിക ടീച്ചർ ഭദ്രദീപം കൊളുത്തി നിർവഹിച്ചു.
സൊസൈറ്റി ചെയർമാൻ സനീഷ് കൂറുമുള്ളില് അധ്യക്ഷത വഹിച്ച ചടങ്ങിൽ ജനറൽ സെക്രട്ടറി ബിനുരാജ് രാജൻ സ്വാഗതം രേഖപ്പെടുത്തി. പുതിയ ലേഡീസ് വിംഗ് ഭാരവാഹികളായ പ്രസിഡൻറ് ശ്രീജയ് ബിനോ, സെക്രട്ടറി സിന്ധു റോയി, ട്രഷറർ ആശ ശിവകുമാർ, കൾച്ചറൽ സെക്രട്ടറി വിദ്യാ രാജേഷ് എന്നിവർ വിശിഷ്ടാതിഥിയിൽ നിന്നും ബാഡ്ജുകൾ സ്വീകരിച്ച് സ്ഥാനം ഏറ്റെടുത്തു.
പ്രസിഡൻറ് ശ്രീജയ് ബിനോ അവതരിപ്പിച്ച പ്രവർത്തന റിപ്പോർട്ടിൽ വനിതകൾക്കും കുട്ടികൾക്കുമായി കൂടുതൽ പ്രയോജനപ്രദമായ പരിപാടികൾ സംഘടിപ്പിക്കുമെന്നും അവരുടെ ഉന്നമനത്തിനായി പ്രവർത്തിക്കുമെന്നും അറിയിച്ചു. തുടർന്ന് ലേഡീസ് വിങ്ങിന്റെ പുതിയ ഭാരവാഹികളും, കോർഡിനേറ്റർ അജികുമാറും ആശംസകൾ അറിയിച്ച് സംസാരിച്ചു. വിനീത അരുൺ അവതാരകയായിരുന്ന ചടങ്ങിൽ ലേഡീസ് വിംഗ് കൾച്ചറൽ സെക്രട്ടറി വിദ്യാ രാജേഷ് നന്ദി പറഞ്ഞു.
്ു്ു
