കുരുന്നുകൾക്ക് പെരുന്നാൾ സമ്മാനവുമായി 'ഷീം അൽ ഖൈർ'; 200-ലധികം കുട്ടികൾക്ക് വീട്ടിലെത്തി സമ്മാനങ്ങൾ നൽകും
പ്രദീപ് പുറവങ്കര
മനാമ: റോയൽ ഹ്യൂമാനിറ്റേറിയൻ ഫൗണ്ടേഷനിലെ (RHF) സന്നദ്ധ മാനുഷിക സംരംഭങ്ങളുടെ പ്രസിഡൻ്റ് ഷെയ്ഖ ഷീമ ബിൻത് നാസർ ബിൻ ഹമദ് അൽ ഖലീഫയുടെ നേതൃത്വത്തിലുള്ള 'ഷീം അൽ ഖൈർ' സന്നദ്ധസംഘം കുട്ടികൾക്കായി പ്രത്യേക പെരുന്നാൾ സമ്മാന പദ്ധതിക്ക് തുടക്കം കുറിച്ചു. 'ഷീം അൽ ഖൈറിനൊപ്പം നമ്മുടെ ഈദ് സമ്മാനം വ്യത്യസ്തമാണ്' (Our Eid Gift is Different with Sheem Al Khair) എന്ന പ്രമേയത്തിലാണ് ഈ സംരംഭം നടപ്പിലാക്കുന്നത്. ഫൗണ്ടേഷന്റെ കീഴിലുള്ള 200-ലധികം കുട്ടികൾക്കാണ് ഈ പദ്ധതിയിലൂടെ ഈദ് സമ്മാനങ്ങൾ വിതരണം ചെയ്യുന്നത്.
അനാഥരായ കുട്ടികളുടെ മനസ്സിൽ സന്തോഷം നിറയ്ക്കാനും പെരുന്നാൾ ആഘോഷങ്ങളിൽ അവരെ പങ്കാളികളാക്കാനുമുള്ള റോയൽ ഹ്യൂമാനിറ്റേറിയൻ ഫൗണ്ടേഷൻ്റെ നിരന്തരമായ പരിശ്രമങ്ങളുടെ ഭാഗമായാണ് ഈ നീക്കം. കുട്ടികളുടെ സുരക്ഷ ഉറപ്പാക്കുന്നതിനായി അവരുടെ വീടുകളിൽ നേരിട്ടെത്തിയാണ് സന്നദ്ധപ്രവർത്തകർ സമ്മാനങ്ങൾ കൈമാറുന്നത്. ആഘോഷവേളകളിൽ ആരും ഒറ്റപ്പെട്ടുപോകരുത് എന്ന സന്ദേശമാണ് ഇതിലൂടെ നൽകുന്നത്.
സമൂഹത്തിൽ ഐക്യദാർഢ്യവും കാരുണ്യവും വളർത്തുന്നതിനൊപ്പം സന്നദ്ധസേവനത്തിൻ്റെ മൂല്യങ്ങൾ പുതിയ തലമുറയിലേക്ക് എത്തിക്കുക എന്നതും ഈ സംരംഭത്തിൻ്റെ ലക്ഷ്യമാണ്. കുട്ടികൾക്ക് സുരക്ഷിതമായ അന്തരീക്ഷത്തിൽ ആഘോഷങ്ങൾ ആസ്വദിക്കാൻ ഈ പദ്ധതി വഴിയൊരുക്കുമെന്ന് അധികൃതർ വ്യക്തമാക്കി.
ryrty
