ചർച്ചയ്ക്ക് ഇറാൻ താത്പര്യം കാണിക്കുന്നുണ്ടെന്ന് ട്രംമ്പ്
പ്രദീപ് പുറവങ്കര
വാഷിംഗ്ടൺ: ഇറാൻ ചർച്ചകൾക്ക് അതീവ താല്പര്യം കാണിക്കുന്നുണ്ടെന്ന് അമേരിക്കൻ പ്രസിഡൻ്റ് ഡൊണാൾഡ് ട്രംപ്. എന്നാൽ അവർ നിലവിൽ ചർച്ചകൾക്ക് പൂർണ്ണമായി സജ്ജരാണെന്ന് താൻ കരുതുന്നില്ലെന്നും, അവരുമായി ഒരു കരാറിൽ ഏർപ്പെടണോ എന്ന കാര്യത്തിൽ തീരുമാനമെടുത്തിട്ടില്ലെന്നും ഫിനാൻഷ്യൽ ടൈംസിന് നൽകിയ അഭിമുഖത്തിൽ അദ്ദേഹം പറഞ്ഞു. ചർച്ചയ്ക്കുള്ള സാധ്യതകൾക്കിടയിലും ഇറാൻ്റെ ഡ്രോൺ നിർമ്മാണ കേന്ദ്രങ്ങൾ ബോംബിട്ട് തകർക്കുമെന്ന കടുത്ത മുന്നറിയിപ്പും ട്രംപ് നൽകി.
ലോകത്തെ എണ്ണ വിതരണത്തിൻ്റെ അഞ്ചിലൊന്ന് കടന്നുപോകുന്ന ഹോർമുസ് കടലിടുക്ക് ഇറാൻ്റെ ഭീഷണികൾ മൂലം നിലവിൽ ഭാഗികമായി അടഞ്ഞുകിടക്കുകയാണ്. ഇത് ആഗോളതലത്തിൽ എണ്ണവില വലിയ തോതിൽ ഉയരാൻ കാരണമായി. ഈ സാഹചര്യത്തിൽ കടലിടുക്കിൻ്റെ സുരക്ഷ ഉറപ്പാക്കാൻ ഇസ്രായേലുമായി ചേർന്ന് പ്രവർത്തിക്കുകയാണെന്നും ഏഴ് രാജ്യങ്ങളുമായി ചർച്ചകൾ നടത്തുകയാണെന്നും ട്രംപ് വ്യക്തമാക്കി.
തങ്ങളുടെ എണ്ണ ഇറക്കുമതിയുടെ 90 ശതമാനവും ഈ കടലിടുക്ക് വഴി നടത്തുന്ന ചൈന, പാത തുറക്കാൻ സഹായിക്കണമെന്ന് ട്രംപ് ആവശ്യപ്പെട്ടു. ചൈനീസ് പ്രസിഡൻ്റ് ഷി ജിൻപിംഗുമായി നിശ്ചയിച്ചിട്ടുള്ള ഉച്ചകോടി ആവശ്യമെങ്കിൽ മാറ്റിവെക്കുമെന്നും അദ്ദേഹം മുന്നറിയിപ്പ് നൽകി. കൂടാതെ, ഹോർമുസ് കടലിടുക്ക് സുരക്ഷിതമാക്കാൻ അമേരിക്കൻ സഖ്യകക്ഷികൾ സഹായിച്ചില്ലെങ്കിൽ നാറ്റോ (NATO) സഖ്യം വലിയ പ്രതിസന്ധി നേരിടുമെന്നും ട്രംപ് കൂട്ടിച്ചേർത്തു.
കടലിടുക്കിലൂടെയുള്ള എണ്ണ വിതരണം പുനഃസ്ഥാപിക്കാൻ വിവിധ രാജ്യങ്ങൾ യുദ്ധക്കപ്പലുകൾ അയക്കണമെന്ന് ട്രംപ് ആഹ്വാനം ചെയ്തു. ഈ പാത പ്രയോജനപ്പെടുത്തുന്ന രാജ്യങ്ങൾ അതിൻ്റെ സുരക്ഷ ഉറപ്പാക്കാൻ പങ്കുചേരുന്നത് സ്വാഭാവികമായ കാര്യമാണെന്നും അദ്ദേഹം പറഞ്ഞു.
asasaswas
