സ്ഥിതിഗതികൾ അനുകൂലമായാൽ സ്‌കൂൾ തുറക്കും
തിരുവനന്തപുരം: സംസ്ഥാനത്ത് കൊവിഡ് സാഹചര്യങ്ങളിൽ മാറ്റം വരികയും സ്ഥിതി അനുകൂലമാവുകയും ചെയ്താൽ വിദ്യാർ‍ത്ഥികൾ‍ക്ക് സ്‌കൂളിലെത്താനുള്ള സൗകര്യം ഒരുക്കുമെന്ന് മുഖ്യമന്ത്രി പിണറായി വിജയൻ. കൊവിഡ് കാല വിദ്യാഭ്യാസം, പരിമിതികളും സാധ്യതകളും എന്ന വിഷയത്തിൽ കെഎസ്ടിഎ സംഘടിപ്പിച്ച വെബിനാർ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഓരോ കുട്ടിക്കും പഠനത്തിനുള്ള ഡിജിറ്റൽ പഠനോപകരണങ്ങൾ ലഭിക്കുന്നുണ്ടെന്ന് ഉറപ്പുവരുത്തുമെന്നും മുഖ്യമന്ത്രി പറഞ്ഞു.
ഓൺലൈൻ ക്ലാസെടുക്കുന്നതിനുള്ള സാങ്കേതിക വിദ്യ എല്ലാ അദ്ധ്യാപകരും പഠിക്കണം. ആദിവാസി, തീരദേശ, മലയോര മേഖലകളിൽ ഇന്റർ‍നെറ്റ് ഉറപ്പാക്കണം. ഡിജിറ്റൽ ഉപകരണങ്ങൾ വാങ്ങാൻ ശേഷിയില്ലാത്ത കുട്ടികൾ‍ക്ക് ഇവ ലഭിക്കാൻ അദ്ധ്യാപകർ മുൻകൈയ്യെടുക്കണം. പൂർവ്‍വ വിദ്യാർ‍ത്ഥികളും സഹായിക്കണം. സംഭാവനകൾ‍ക്കായി വ്യവസായ പ്രമുഖർ, പ്രവാസികൾ എന്നിവരുമായി ബന്ധപ്പെട്ടിട്ടുണ്ടെന്നും മുഖ്യമന്ത്രി പറഞ്ഞു. വിദ്യാഭ്യാസ മന്ത്രി വി. ശിവൻകുട്ടി മുഖ്യപ്രഭാഷണം നടത്തി.
