പോരാട്ടത്തിൽ പുകഞ്ഞ് യെമൻ: ഹൂതി കേന്ദ്രങ്ങളിൽ കനത്ത വ്യോമാക്രമണം; പതിനായിരങ്ങൾ പലായനം ചെയ്യുന്നു

പ്രദീപ് പുറവങ്കര

സനാ: യെമനിൽ സർക്കാർ സൈന്യവും ഹൂതി വിമതരും തമ്മിലുള്ള പോരാട്ടം അതിരൂക്ഷമാകുന്നു. തായിസ്, അൽ-ബയ്ദ പ്രവിശ്യകളിലും പശ്ചിമ തീരപ്രദേശങ്ങളിലും ഹൂതി മിലിഷ്യകളുടെ താവളങ്ങൾ ലക്ഷ്യമാക്കി യെമൻ സായുധ സേന ശക്തമായ വ്യോമാക്രമണം നടത്തി.

തായ്സിലെ അൽ-ദബാബ് ഫ്രണ്ടിലുള്ള അൽ-താബ അൽ-സൗദ, ജബൽ അൽ-മുനിം എന്നിവിടങ്ങളിലെ ഹൂതി കേന്ദ്രങ്ങൾക്ക് നേരെ മൂന്ന് വ്യോമാക്രമണങ്ങളാണ് ഞായറാഴ്ച സൈന്യം നടത്തിയത്. കൂടാതെ അൽ-മുഖ, ദുബാബ് മേഖലകളിൽ ഹൂതി മിലിഷ്യകളുടെ താവളങ്ങളും വാഹനങ്ങളും തകർത്തതിന്റെ പുതിയ ദൃശ്യങ്ങളും സായുധ സേന പുറത്തുവിട്ടു.

വെള്ളിയാഴ്ച ആരംഭിച്ച 'ഓപ്പറേഷൻ കിൽ ബോക്സ്' (Operation Kill Box) സൈനിക നടപടിയുടെ ഭാഗമായി മേഖലയിലെ പ്രധാന പാതകൾ ഉപയോഗിക്കരുതെന്ന് ജനങ്ങൾക്ക് സൈന്യം മുന്നറിയിപ്പ് നൽകിയിട്ടുണ്ട്. ഇരുപതിലധികം വ്യോമാക്രമണങ്ങളിലൂടെ അൽ-ബയ്ദ പ്രവിശ്യയിലെ അൽ-സഹർ, ദി നാഇം, അൽ-സവാദിയ, മുഖയ്‌റാസ് എന്നിവിടങ്ങളിലെ ഹൂതി കൂട്ടായ്മകൾ, വാഹനങ്ങൾ, മിസൈൽ ലോഞ്ചറുകൾ, വാർത്താവിനിമയ സംവിധാനങ്ങൾ എന്നിവ നശിപ്പിച്ചതായി സൈന്യം അറിയിച്ചു. ആക്രമണത്തിൽ ഹൂതികൾക്ക് ആൾനാശവും വൻ ആയുധ നഷ്ടവും സംഭവിച്ചിട്ടുണ്ട്.

ജൂലൈ മുതൽ യെമനിൽ 76,000-ത്തിലധികം ആളുകൾ ഭവനരഹിതരായതായി ഐക്യരാഷ്ട്രസഭ റിപ്പോർട്ട് ചെയ്തു. ഹൂതികൾ ആക്രമണം കടുപ്പിച്ചതോടെ കഴിഞ്ഞ ആഴ്ച മാത്രം നാലിലൊന്ന് ആളുകൾ നാടുവിടാൻ നിർബന്ധിതരായി എന്ന് ഇന്റർനാഷണൽ ഓർഗനൈസേഷൻ ഫോർ മൈഗ്രേഷൻ (IOM) മുന്നറിയിപ്പ് നൽകി. കഴിഞ്ഞ 24 മണിക്കൂറിനുള്ളിൽ 1,400-ഓളം യെമൻ നിവാസികൾ ചെങ്കടൽ കടന്ന് ജിബൂട്ടിയിലേക്ക് പലായനം ചെയ്തു. ജിബൂട്ടിയിലെ ഒബോക്കിലെത്തിയ അഭയാർത്ഥികളിൽ ഭൂരിഭാഗവും സ്ത്രീകളും കുട്ടികളുമാണ്. വരും ദിവസങ്ങളിൽ കൂടുതൽ ആളുകൾ എത്തിയേക്കുമെന്നാണ് വിലയിരുത്തൽ.

ഹൂതികൾ സൃഷ്ടിക്കുന്ന മാനുഷിക പ്രതിസന്ധിയിൽ അടിയന്തരമായി ഇടപെടണമെന്ന് ആവശ്യപ്പെട്ട് യെമൻ വിദേശകാര്യ മന്ത്രി അഫ്രാ അൽ സുബ, യുഎൻ ഹൈക്കമ്മീഷണർ ഫോർ ഹ്യൂമൻ റൈറ്റ്സ് വോൾക്കർ തുർക്കിന് കത്തയച്ചു. ബബ് അൽ-മന്ദബ് മേഖലയിലേക്ക് നീളുന്ന ഹൂതി ഭീഷണി സിവിലിയന്മാർക്കും അന്താരാഷ്ട്ര സമുദ്ര വ്യാപാരത്തിനും വലിയ അപകടമുണ്ടാക്കുന്നുണ്ടെന്ന് അവർ ചൂണ്ടിക്കാട്ടി. ഹൂതികളുടെ മനുഷ്യാവകാശ ലംഘനങ്ങൾക്കെതിരെ അന്താരാഷ്ട്ര സമൂഹം ശക്തമായി പ്രതികരിക്കണമെന്നും യെമൻ വിദേശകാര്യ മന്ത്രി ആവശ്യപ്പെട്ടു.