ഹോർമുസ് കടലിടുക്ക് തുറക്കാനുള്ള പ്രമേയം വീറ്റോ ചെയ്ത് റഷ്യയും ചൈനയും
പ്രദീപ് പുറവങ്കര I ബഹ്റൈൻ
ന്യൂയോർക്ക്/മനാമ: ഹോർമുസ് കടലിടുക്കിലെ കപ്പൽ ഗതാഗതം പുനഃസ്ഥാപിക്കുന്നതിനായി ബഹ്റൈൻ മുന്നോട്ടുവെച്ച കരട് പ്രമേയം ഐക്യരാഷ്ട്രസഭയുടെ രക്ഷാസമിതി തള്ളി. ഇന്ന് നടന്ന നിർണ്ണായക സമ്മേളനത്തിൽ രക്ഷാസമിതിയിലെ സ്ഥിരം അംഗങ്ങളായ റഷ്യയും ചൈനയും തങ്ങളുടെ വീറ്റോ അധികാരം ഉപയോഗിച്ചതോടെയാണ് പ്രമേയം പരാജയപ്പെട്ടത്.
അന്താരാഷ്ട്ര നിയമങ്ങൾ ലംഘിച്ചുകൊണ്ട് ഇറാൻ നടത്തുന്ന ഭീഷണികളെ നേരിടാനും കപ്പൽ ഗതാഗതത്തിന്റെ സുരക്ഷ ഉറപ്പാക്കാനുമാണ് ബഹ്റൈൻ ഈ പ്രമേയം അവതരിപ്പിച്ചത്. നിലവിൽ 15 അംഗ രക്ഷാസമിതിയുടെ അധ്യക്ഷപദവി വഹിക്കുന്ന ബഹ്റൈൻ, വാണിജ്യ കപ്പലുകളുടെ സുരക്ഷയ്ക്കായി കർശനമായ നിർദ്ദേശങ്ങളാണ് പ്രമേയത്തിൽ ഉൾപ്പെടുത്തിയിരുന്നത്. എന്നാൽ 'സൈനിക ശക്തി ഉപയോഗിക്കാനുള്ള അനുമതിയായി' ഇത് മാറിയേക്കാം എന്ന ചൈനയുടെ എതിർപ്പിനെത്തുടർന്ന് പ്രമേയത്തിലെ ചില കടുപ്പമേറിയ ഭാഗങ്ങൾ ബഹ്റൈൻ നേരത്തെ നീക്കം ചെയ്തിരുന്നു. എങ്കിലും വോട്ടെടുപ്പിൽ റഷ്യയും ചൈനയും പ്രമേയത്തെ എതിർക്കുകയായിരുന്നു.
ഫെബ്രുവരി 28-ന് ആരംഭിച്ച യുഎസ്-ഇസ്രായേൽ-ഇറാൻ യുദ്ധത്തെത്തുടർന്ന് മേഖലയിലെ സംഘർഷം അതിരൂക്ഷമാണ്. ലോകത്തെ എണ്ണ-വാതക വിതരണത്തിന്റെ 20 ശതമാനവും കടന്നുപോകുന്ന ഹോർമുസ് കടലിടുക്ക് തടസ്സപ്പെട്ടത് ആഗോള ഊർജ്ജ വിപണിയെയും സാരമായി ബാധിച്ചിട്ടുണ്ട്.
aa
