ലിസി അഭിനയരംഗത്ത് തിരിച്ചെത്തുന്നു
മലയാളത്തിന്റെ പ്രിയ നടി ലിസി അഭിനയരംഗത്ത് തിരിച്ചെത്തുന്നു. മകൾ കല്യാണി അഭിനയരംഗത്ത് അരങ്ങേറ്റം കുറിക്കുന്ന തെലുങ്ക് സിനിമയിലൂടെയാണ് അമ്മയും രണ്ടാം വരവിനെത്തുന്നത്. കൃഷ്ണ ചൈതന്യയാണ് ഈ ചിത്രം സംവിധാനം ചെയ്യുന്നത്. ചിത്രത്തിൽ താനൊരു പ്രധാനപ്പെട്ട വേഷമാണ് ചെയ്യുന്നതെന്ന് ലിസി പറയുന്നു. ന്യൂയോർക്കിൽ വെച്ച് ഒരുപാട് വർഷങ്ങൾക്ക് ശേഷം ക്യാമറയെ അഭിമുഖീകരിച്ചതെന്നും ഉത്കണ്ഠ ഉണ്ടായിരുന്നെങ്കിലും ത്രില്ലിംഗ് നിമിഷമായിരുന്നെന്നും ലിസി പറഞ്ഞു. ന്യൂയോർക്കിൽ ആദ്യ ഷെ‍‍ഡ്യൂൾ ഷൂട്ടിംഗ് പൂർത്തിയായെന്നും ലിസി അറിയിച്ചു.
ഇരുപത്തിരണ്ടാം വയസിൽ നിറയെ അവസരങ്ങളുള്ളപ്പോൾ അഭിനയം നിർ‍ത്തേണ്ടിവന്നതിൽ കുറ്റബോധമുണ്ടെന്ന് ലിസി പറയുന്നു. ഇന്നും കുറ്റബോധം തോന്നുന്ന ഒരു തീരുമാനമാണ് അത്. തീർ‍ച്ചയായും നഷ്ടപ്പെട്ട ആ കാലവും ആ വേഷങ്ങളും ഇനി തിരിച്ചുകിട്ടില്ല. രണ്ടാം ഇന്നിംഗ്സിൽ കൂടുതൽ മെച്ചപ്പെടുത്താനാകുമെന്നാണ് പ്രതീക്ഷ- ലിസി കുറിച്ചു. കഴിഞ്ഞ മൂന്ന് വർഷത്തിനിടെ മലയാളത്തിൽ നിന്നും തമിഴിൽ നിന്നും തെലുങ്കിൽ നിന്നും നിരവധി അവസരങ്ങൾ ലഭിച്ചിരുന്നു. തമിഴിൽ ഗൗതം മേനോൻ ഒരു വിഷയം പറഞ്ഞിരുന്നു. വൈകാതെ ഒരു മലയാള ചിത്രത്തിലും അഭിനയിക്കുമെന്നും ലിസി പറഞ്ഞു. മോഹൻലാലിനും മുകേഷിനുമൊപ്പം ഹിറ്റ് ജോടിയായ ലിസി 1994ൽ സോമനാഥ് സംവിധാനം ചെയ്ത ചാണക്യസൂത്രത്തിലാണ് അവസാനമായി വേഷമിട്ടത് 1990ലായിരുന്നു പ്രിയദർശനുമായുള്ള വിവാഹം. 2016ൽ ഇരുവരും തമ്മിൽ പിരിയുകയും ചെയ്തു.
