ഇൻസ്റ്റഗ്രാമിൽ ഇനി ഇഷ്ടമുള്ളത് റീപോസ്റ്റ് ചെയ്യാം, സുഹൃത്തുക്കളുടെ ലൊക്കേഷൻ അറിയാം
ഷീബ വിജയൻ
ഉപയോക്താക്കൾക്കായി മൂന്ന് പുതിയ ഫീച്ചറുകളുമായി ഇൻസ്റ്റഗ്രാം. ടിക് ടോക്ക്, സ്നാപ്ചാറ്റ് പോലുള്ള ആപ്പുകളിൽ ഇതിനകം ലഭ്യമായ ഫീച്ചറുകളാണ് ഇതിൽ പലതും. ഇൻസ്റ്റഗ്രാമിൽ ഇനി തത്സമയ ലൊക്കേഷൻ പങ്കുവെക്കാൻ സാധിക്കും. സ്നാപ്ചാറ്റിലെ മാപ്പിന് സമാനമായ ഫീച്ചറാണ് ഇത്. ഈ ഫീച്ചർ വഴി നിങ്ങളുടെ സുഹൃത്തുക്കളും കണ്ടൻ്റ് ക്രിയേറ്റർമാരും എവിടെ നിന്നാണ് പോസ്റ്റുകൾ ഇടുന്നതെന്ന് കാണാൻ കഴിയും. എന്നാൽ സ്നാപ്ചാറ്റിൽ നിന്ന് വ്യത്യസ്തമായി ആപ്പ് തുറക്കുമ്പോൾ മാത്രമേ ഇൻസ്റ്റഗ്രാമിൻ്റെ ലൊക്കേഷൻ അപ്‌ഡേറ്റ് ചെയ്യുകയുള്ളൂ. ഇത് തത്സമയ ട്രാക്കിംഗ് നടത്തുന്നില്ല. ഒരു മണിക്കൂർ വരെ ലൊക്കേഷൻ നേരിട്ടുള്ള മെസ്സേജുകൾ വഴി ഷെയർ ചെയ്യാനും ഈ ഫീച്ചർ അനുവദിക്കുന്നു. ആർക്കാണ് ലൊക്കേഷൻ കാണാൻ കഴിയേണ്ടതെന്ന് ഉപയോക്താക്കൾക്ക് തീരുമാനിക്കാനുള്ള സൗകര്യവുമുണ്ട്. ഡയറക്‌ട് മെസ്സേജ് ഇൻബോക്‌സിൻ്റെ മുകളിലായി ഈ ഫീച്ചർ ലഭ്യമാകും. യുഎസിൽ ഈ ഫീച്ചർ ഓഗസ്റ്റ് 7-ന് ആരംഭിച്ചു, ഉടൻ തന്നെ ഇന്ത്യയിലും ലഭ്യമാകും.
ഇഷ്ടമുള്ള കണ്ടൻ്റ് ഷെയർ ചെയ്യാൻ ഇനി ഈ ഫീച്ചറിലൂടെ എളുപ്പമാണ്. ഇൻസ്റ്റഗ്രാം റീലുകളും പോസ്റ്റുകളും ഉപയോക്താക്കൾക്ക് അവരുടെ പ്രൊഫൈലിലേക്ക് നേരിട്ട് റീപോസ്റ്റ് ചെയ്യാൻ ഈ ഫീച്ചർ സഹായിക്കുന്നു. റീപോസ്റ്റ് ചെയ്ത കണ്ടൻ്റ് നിങ്ങളുടെ സാധാരണ പ്രൊഫൈൽ ഗ്രിഡിൽ കാണില്ല, അതിനായി പ്രത്യേകം ഒരു ടാബ് ഉണ്ടാകും. ഇത് നിങ്ങളുടെ ഫോളോവേഴ്‌സിനും കാണാൻ കഴിയും. റീപോസ്റ്റ് ചെയ്യുന്നതിനായി, പോസ്റ്റിൻ്റെയോ റീലിൻ്റെയോ താഴെയുള്ള റീപോസ്റ്റ് ഐക്കണിൽ ടാപ്പ് ചെയ്താൽ മതി. ഒരു പോപ്പ്-അപ്പ് വിൻഡോ വഴി ചെറിയൊരു കുറിപ്പ് ചേർക്കാനും സാധിക്കും. ഒറിജിനൽ കണ്ടൻ്റ് ഉണ്ടാക്കിയവർക്ക് പൂർണ്ണ ക്രെഡിറ്റ് ലഭിക്കുമെന്ന് ഇൻസ്റ്റഗ്രാം ഉറപ്പുവരുത്തുന്നു.
ഇൻസ്റ്റഗ്രാം റീൽസിൽ ആഗോളതലത്തിൽ ഒരു പുതിയ ‘ഫ്രണ്ട്സ്’ ടാബ് അവതരിപ്പിച്ചു. ഈ ടാബിൽ സുഹൃത്തുക്കൾ ലൈക്ക് ചെയ്ത, കമൻ്റ് ചെയ്ത, റീപോസ്റ്റ് ചെയ്ത അല്ലെങ്കിൽ ക്രിയേറ്റ് ചെയ്ത പബ്ലിക് റീലുകൾ കാണാൻ കഴിയും. നിങ്ങളും സുഹൃത്തുക്കളും തമ്മിലുള്ള പൊതുവായ ഇഷ്ടങ്ങളെ അടിസ്ഥാനമാക്കിയുള്ള ‘ബ്ലെൻഡ്സ്’ എന്ന സംവിധാനമാണ് ഇതിനായി ഉപയോഗിക്കുന്നത്.
GGHGH
