ചാരവൃത്തി കേസിൽ വിചാരണ ഏപ്രിൽ 24ലേയ്ക്ക് മാറ്റി
മനാമ: രാജ്യത്തിന്റെ രഹസ്യവിവരങ്ങൾ ഖത്തറിന് ചോർ‍ത്തികൊടുത്തു എന്നാരോപണത്തിൽ ഹൈ ക്രിമിനൽ കോടതിയിൽ ഇന്നലെ നടന്ന പ്രാഥമിക വിചാരണയ്ക്കുശേഷം പ്രധാന വിചാരണ, ഏപ്രിൽ 24ലേയ്ക്ക് മാറ്റി. അലി സൽമാൻ അലി അഹമ്മദ്, ഹസൻ അലി ജുമാ സുൽത്താൻ, അലി മെഹ്ദി അലി അൽ അസ്വാദ് എന്നിവരെയാണ് കേസിൽ പ്രതി ചേർത്തിട്ടുള്ളത്. അഭിഭാഷകരോടൊപ്പം ആദ്യ പ്രതി വിചാരണയിൽ പങ്കെടുത്തെങ്കിലും രണ്ടാമത്തെയും മൂന്നാമത്തെയും പ്രതികൾ പങ്കെടുത്തിട്ടില്ല.
ബഹ്റൈനെതിരായ ശത്രുതാപരമായ നടപടികൾ കൈക്കൊള്ളുന്നതിനായി ഒരു വിദേശ രാജ്യവുമായി ഇന്റലിജൻസ് കൈമാറ്റം ചെയ്യുക, രാഷ്ട്രീയവും സാന്പത്തികവുമായ നിലപാടിനെ തകർക്കുക, രാഷ്ട്രീയ വ്യവസ്ഥിതിയെ തകിടം മറിക്കാൻ ദേശീയ താൽപ്പര്യങ്ങൾ ഇല്ലാതാക്കുക എന്നിവയിലാണ് കുറ്റാരോപിതർ വിചാരണ നേരിടുന്നത്. കൂടാതെ, ഒരു വിദേശ രാജ്യത്തോട് പ്രതിരോധ രഹസ്യങ്ങൾ വെളിപ്പെടുത്തുക, സൈനിക രഹസ്യങ്ങളും രാജ്യത്തിന്റെ ആഭ്യന്തര സ്ഥിതിയെക്കുറിച്ചുള്ള വിവരങ്ങളും പങ്കുവെച്ചതിന് വിദേശ രാജ്യത്ത് നിന്ന് പണം സ്വീകരിക്കുക, രാജ്യത്തിന്റെ സന്പദ് വ്യവസ്ഥയെ ദുർബലപ്പെടുത്തുന്നതിന് വിദേശത്ത് നിന്നുള്ള കിംവദന്തികൾ പ്രചരിപ്പിക്കുക, രാജ്യത്തിന്റെ അന്തസ് തകർക്കുക എന്നീ കുറ്റങ്ങളിലും ഇവർ വിചാരണ നേരിടുകയാണെന്നും അഡ്വക്കേറ്റ് ജനറൽ ഒസാമ അൽ ഔഫി പറഞ്ഞു.
