ബഹ്‌റൈനിൽ രണ്ടു വർഷത്തിനിടെ 33,700-ലേറെ പുതിയ ബിസിനസുകൾ

പ്രദീപ് പുറവങ്കര

മനാമ: ബഹ്‌റൈനിൽ കഴിഞ്ഞ രണ്ടു വർഷത്തിനിടെ (2024 ജനുവരി 1 മുതൽ 2026 ഫെബ്രുവരി 25 വരെ) 33,707 പുതിയ ബിസിനസുകൾ രജിസ്റ്റർ ചെയ്തതായി വ്യവസായ വാണിജ്യ മന്ത്രാലയത്തിന്റെ കണക്കുകൾ വ്യക്തമാക്കുന്നു. ഇതിൽ പകുതിയോളം പുതിയ സംരംഭങ്ങളും വ്യാപാരം, വാഹന അറ്റകുറ്റപ്പണി, പ്രൊഫഷണൽ സേവനങ്ങൾ എന്നീ മേഖലകളിലാണ് ആരംഭിച്ചത്.

വാണിജ്യ മേഖലയും കാറുകളുടെയും ബൈക്കുകളുടെയും അറ്റകുറ്റപ്പണികളുമാണ് പുതിയ രജിസ്ട്രേഷനിൽ മുന്നിൽ – 8,619 ബിസിനസുകൾ (ആകെ രജിസ്ട്രേഷന്റെ 25.6%). തൊട്ടുപിന്നാലെ പ്രൊഫഷണൽ, ശാസ്ത്രീയ, സാങ്കേതിക മേഖലകളിൽ 7,884 സംരംഭങ്ങളും (23.4%) ആരംഭിച്ചു.

ഭരണനിർവ്വഹണ-സഹായ സേവനങ്ങളിൽ (Administrative & Support Services) 3,530-ഉം, ഹോട്ടൽ, റസ്റ്റോറന്റ്, താമസം എന്നീ മേഖലകളിൽ 2,936-ഉം, വ്യക്തിഗത സേവനങ്ങളിലും റിപ്പയറിംഗിലും 2,173-ഉം, നിർമ്മാണ മേഖലയിൽ (Manufacturing) 2,032-ഉം പുതിയ സ്ഥാപനങ്ങൾ വന്നു. ഗതാഗതവും സംഭരണവും (1,582), വിവരസാങ്കേതികവിദ്യയും വാർത്താവിനിമയവും (1,555), കൺസ്ട്രക്ഷൻ (1,443), റിയൽ എസ്റ്റേറ്റ് (1,186) എന്നിങ്ങനെയാണ് മറ്റ് പ്രധാന മേഖലകളിലെ കണക്കുകൾ.

കൂടാതെ വിദ്യാഭ്യാസം (724), ധനകാര്യവും ഇൻഷുറൻസും (607), ആരോഗ്യ മേഖല (389), കലയും വിനോദവും (365), ഖനനം (40), മാലിന്യ സംസ്കരണവും ജലസേചനവും (28), കൃഷിയും മത്സ്യബന്ധനവും (13) എന്നീ മേഖലകളിലും പുതിയ സംരംഭങ്ങൾ രജിസ്റ്റർ ചെയ്തു.

നിലവിൽ ബഹ്‌റൈനിൽ സജീവമായി പ്രവർത്തിക്കുന്ന ബിസിനസുകളിലും വ്യാപാര-വാഹന അറ്റകുറ്റപ്പണി മേഖല തന്നെയാണ് ഏറ്റവും മുന്നിൽ (38,137 സ്ഥാപനങ്ങൾ). പ്രൊഫഷണൽ, സാങ്കേതിക മേഖലയിൽ 18,290-ഉം മാനുഫാക്ചറിംഗിൽ 10,346-ഉം അഡ്മിനിസ്ട്രേറ്റീവ് സേവനങ്ങളിൽ 10,045-ഉം ഹോട്ടൽ-ഭക്ഷണ ശൃംഖലകളിൽ 9,642-ഉം കൺസ്ട്രക്ഷനിൽ 9,157-ഉം സ്ഥാപനങ്ങൾ നിലവിലുണ്ട്.

രാജ്യത്തെ സജീവമായ വാണിജ്യ രജിസ്ട്രേഷനുകളിൽ 93.4 ശതമാനവും (85,700 ഇനങ്ങൾ) സൂക്ഷ്മ, ചെറുകിട, ഇടത്തരം (MSME) സംരംഭങ്ങളാണ്. 2025 രണ്ടാം പാദത്തിലെ കണക്കനുസരിച്ച് ഈ ചെറുകിട സ്ഥാപനങ്ങൾ 46,300 ബഹ്‌റൈൻ പൗരന്മാർക്ക് തൊഴിൽ നൽകുന്നുണ്ട്.

സോഷ്യൽ ഇൻഷുറൻസ് ഓർഗനൈസേഷന്റെ (SIO) 2026 ഒന്നാം പാദത്തിലെ കണക്കുകൾ പ്രകാരം സ്വകാര്യ മേഖലയിൽ 1,05,780 ബഹ്‌റൈനികളും 4,78,707 വിദേശ തൊഴിലാളികളും ജോലി ചെയ്യുന്നുണ്ട്. സ്വകാര്യ മേഖലയിലെ ആകെ ജീവനക്കാരിൽ 18.1 ശതമാനമാണ് സ്വദേശികൾ. സ്വകാര്യ മേഖലയിൽ ജോലി ചെയ്യുന്ന ബഹ്‌റൈനികളുടെ ശരാശരി പ്രതിമാസ ശമ്പളം 912 ദിനാറും (മീഡിയൻ ശമ്പളം 500 ദിനാറും) ആണെന്ന് റിപ്പോർട്ട് ചൂണ്ടിക്കാട്ടുന്നു.