ബി.സി.സി.ഐ ഭാരവാഹികളുമായി കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫ കൂടിക്കാഴ്ച നടത്തി

പ്രദീപ് പുറവങ്കര I ബഹ്റൈൻ 

മനാമ: രാജ്യത്തിന്റെ സമഗ്രമായ വികസനത്തിന് പൊതു-സ്വകാര്യ മേഖലകൾ തമ്മിലുള്ള സഹകരണം അനിവാര്യമാണെന്ന് ബഹ്‌റൈൻ കിരീടാവകാശിയും പ്രധാനമന്ത്രിയുമായ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അൽ ഖലീഫ പ്രസ്താവിച്ചു. ബഹ്‌റൈൻ ചേംബർ ഓഫ് കൊമേഴ്‌സ് ആൻഡ് ഇൻഡസ്ട്രി (ബി.സി.സി.ഐ) ചെയർമാൻ നബീൽ ഖാലിദ് കാനൂവുമായും പുതുതായി തിരഞ്ഞെടുക്കപ്പെട്ട ഭരണസമിതി അംഗങ്ങളുമായും ഗുദൈബിയ കൊട്ടാരത്തിൽ നടത്തിയ കൂടിക്കാഴ്ചയിലാണ് അദ്ദേഹം ഇക്കാര്യം വ്യക്തമാക്കിയത്.
ഹിസ് മജസ്റ്റി കിംഗ് ഹമദ് ബിൻ ഈസ അൽ ഖലീഫയുടെ നേതൃത്വത്തിൽ രാജ്യം കൈവരിച്ചുകൊണ്ടിരിക്കുന്ന വികസന മുന്നേറ്റങ്ങളിൽ സ്വകാര്യ മേഖലയുടെ പങ്ക് നിർണ്ണായകമാണെന്ന് ഹിസ് റോയൽ ഹൈനസ് പറഞ്ഞു. സാമ്പത്തിക വളർച്ചയുടെയും സുസ്ഥിര വികസനത്തിന്റെയും പ്രധാന ചാലകശക്തിയായി സ്വകാര്യ മേഖലയെ അദ്ദേഹം വിശേഷിപ്പിച്ചു. ബി.സി.സി.ഐയുടെ മുപ്പത്തിയൊന്നാം സെഷനിലേക്ക് തിരഞ്ഞെടുക്കപ്പെട്ട പുതിയ ഭരണസമിതിക്ക് ആശംസകൾ നേർന്ന അദ്ദേഹം, മുൻ ഭരണസമിതിയുടെ മികച്ച പ്രവർത്തനങ്ങളെയും സംഭാവനകളെയും പ്രശംസിക്കാനും മറന്നില്ല.
ഇറാനിയൻ പ്രകോപനങ്ങളെത്തുടർന്നുള്ള പ്രത്യേക സാഹചര്യത്തിൽ വിപണിയിലെ വിലനിലവാരം കൃത്യമായി നിരീക്ഷിക്കുന്നതിനും നിത്യോപയോഗ സാധനങ്ങളുടെ ലഭ്യത ഉറപ്പുവരുത്തുന്നതിനും ബി.സി.സി.ഐയും സ്വകാര്യ മേഖലയും നടത്തുന്ന ജാഗ്രതാനിർഭരമായ ഇടപെടലുകളെ ഹിസ് റോയൽ ഹൈനസ് പ്രത്യേകം അഭിനന്ദിച്ചു. ഉപഭോക്താക്കളുടെ ആത്മവിശ്വാസം വർദ്ധിപ്പിക്കുന്നതിനും സാമ്പത്തിക സ്ഥിരത നിലനിർത്തുന്നതിനും ഇത്തരം കൂട്ടായ പ്രവർത്തനങ്ങൾ അത്യന്താപേക്ഷിതമാണെന്ന് അദ്ദേഹം ഓർമ്മിപ്പിച്ചു. വെല്ലുവിളികളെ അവസരങ്ങളാക്കി മാറ്റി രാജ്യത്തിന്റെ അഭിവൃദ്ധിക്ക് വേണ്ടിയുള്ള വലിയ നേട്ടങ്ങൾ കൈവരിക്കാൻ പൊതു-സ്വകാര്യ പങ്കാളിത്തം ശക്തിപ്പെടുത്തണമെന്നും അദ്ദേഹം കൂട്ടിച്ചേർത്തു.
സ്വകാര്യ മേഖലയ്ക്ക് നൽകി വരുന്ന നിരന്തരമായ പിന്തുണയ്ക്കും മാർഗ്ഗനിർദ്ദേശങ്ങൾക്കും ബി.സി.സി.ഐ ചെയർമാനും ബോർഡ് അംഗങ്ങളും ഹിസ് റോയൽ ഹൈനസിന് നന്ദി രേഖപ്പെടുത്തി. ഉപപ്രധാനമന്ത്രി ഷെയ്ഖ് ഖാലിദ് ബിൻ അബ്ദുള്ള അൽ ഖലീഫ, പ്രൈം മിനിസ്റ്റേഴ്സ് കോർട്ട് മിനിസ്റ്റർ ഹിസ് ഹൈനസ് ഷെയ്ഖ് ഈസ ബിൻ സൽമാൻ ബിൻ ഹമദ് അൽ ഖലീഫ, ധനകാര്യ-ദേശീയ സാമ്പത്തിക കാര്യ മന്ത്രി ഷെയ്ഖ് സൽമാൻ ബിൻ ഖലീഫ അൽ ഖലീഫ എന്നിവരും കൂടിക്കാഴ്ചയിൽ പങ്കെടുത്തു.