റമദാൻ വിപണിയിൽ കർശന പരിശോധന; നേരിട്ടിറങ്ങി ബഹ്റൈൻ വ്യവസായ വാണിജ്യ മന്ത്രി
പ്രദീപ് പുറവങ്കര I ബഹ്റൈൻ
മനാമ: വിശുദ്ധ റമദാൻ മാസത്തിൽ രാജ്യത്തെ വിപണികളിൽ ഭക്ഷ്യസാധനങ്ങളുടെ ലഭ്യത ഉറപ്പുവരുത്തുന്നതിനും അനാവശ്യമായ വിലക്കയറ്റം തടയുന്നതിനുമായി ബഹ്റൈൻ വ്യവസായ വാണിജ്യ മന്ത്രി അബ്ദുള്ള ബിൻ ആദൽ ഫക്രോ വിവിധ വാണിജ്യ കേന്ദ്രങ്ങളിൽ നേരിട്ട് സന്ദർശനം നടത്തി. ഉപഭോക്താക്കൾക്ക് പ്രയാസമില്ലാതെ സാധനങ്ങൾ വാങ്ങാൻ കഴിയുന്നുണ്ടെന്ന് ഉറപ്പാക്കാൻ രാജ്യത്തെ പ്രധാന ഹൈപ്പർമാർക്കറ്റുകളിലും റീട്ടെയിൽ ഔട്ട്ലെറ്റുകളിലുമാണ് മന്ത്രി പരിശോധന നടത്തിയത്.
തന്റെ സന്ദർശനത്തിന്റെ ഭാഗമായി സുൽത്താൻ മോൾ, അൽ ഹില്ലി സൂപ്പർമാർക്കറ്റ്, ഡാന്യൂബ് (Danube), ലുലു ഹൈപ്പർമാർക്കറ്റ്, ഹൈപ്പർമാക്സ്, അൽ ഒസ്ര സൂപ്പർമാർക്കറ്റ്, അൽ സാറ്റർ മാർക്കറ്റ് എന്നിവിടങ്ങളിൽ അദ്ദേഹം നേരിട്ടെത്തി സ്ഥിതിഗതികൾ വിലയിരുത്തി.
പരിശോധനയുടെ ഭാഗമായി മന്ത്രി വിവിധ മാർക്കറ്റ് ഉദ്യോഗസ്ഥരുമായി കൂടിക്കാഴ്ച നടത്തുകയും നിലവിലെ സ്റ്റോക്ക് വിവരങ്ങളും വരും ദിവസങ്ങളിലെ വർദ്ധിച്ചേക്കാവുന്ന ഡിമാൻഡും വിശദമായി വിലയിരുത്തുകയും ചെയ്തു. ആഘോഷ വേളകളിലും തിരക്കുള്ള സമയങ്ങളിലും വിപണിയിൽ അത്യാവശ്യ സാധനങ്ങളുടെ കുറവ് അനുഭവപ്പെടാതിരിക്കാൻ മന്ത്രാലയം പ്രത്യേക മുൻഗണന നൽകുന്നതായി അദ്ദേഹം വ്യക്തമാക്കി.
അത്യാവശ്യ ഭക്ഷ്യവസ്തുക്കളും റമദാൻ പ്രത്യേക ഉൽപ്പന്നങ്ങളും മതിയായ അളവിൽ വിപണിയിലുണ്ടെന്ന് ഉറപ്പുവരുത്തുകയാണ് ഇത്തരം സന്ദർശനങ്ങളുടെ പ്രധാന ലക്ഷ്യം. ഉപഭോക്താക്കളുടെ താൽപ്പര്യങ്ങൾ സംരക്ഷിക്കുന്നതിനും വിപണിയിലെ വില നിലവാരം നിയന്ത്രിക്കുന്നതിനും മന്ത്രാലയത്തിന്റെ ഭാഗത്തുനിന്ന് വരും ദിവസങ്ങളിലും കർശനമായ നിരീക്ഷണം തുടരുമെന്നും മന്ത്രി കൂട്ടിച്ചേർത്തു. വിപണിയിലെ കൃത്രിമമായ വിലക്കയറ്റത്തിനെതിരെ വിട്ടുവീഴ്ചയില്ലാത്ത നടപടികൾ സ്വീകരിക്കുമെന്ന സൂചനയും മന്ത്രി നൽകി.
ssdfdsfd
