അഹമ്മദ് അൽ ഫത്തേ മസ്ജിദ് പുനരുദ്ധാരണത്തിന് ശേഷം തുറന്നു നൽകി; രാജാവ് ഹമദ് ബിൻ ഈസ അൽ ഖലീഫ ചടങ്ങിൽ പങ്കെടുത്തു

പ്രദീപ് പുറവങ്കര

മനാമ: ഇസ്‌ലാമിക സംസ്കാരത്തിന്റെയും സഹിഷ്ണുതയുടെയും മൂല്യങ്ങൾ ലോകത്തിന് പരിചയപ്പെടുത്തുന്നതിൽ മസ്ജിദുകൾ വഹിക്കുന്ന പങ്ക് നിസീമമാണെന്ന് ബഹ്‌റൈൻ രാജാവ് ഹിസ് മജസ്റ്റി ഹമദ് ബിൻ ഈസ അൽ ഖലീഫ പ്രസ്താവിച്ചു. വിഭിന്ന സംസ്കാരങ്ങൾ തമ്മിലുള്ള സാംസ്കാരിക സംവാദങ്ങൾ ശക്തിപ്പെടുത്താനും പരസ്പര ധാരണയുടെ പാലങ്ങൾ പണിയാനും ഇവ സഹായിക്കുന്നുവെന്നും അദ്ദേഹം കൂട്ടിച്ചേർത്തു. ഗുദൈബിയയിലെ ചരിത്രപ്രസിദ്ധമായ അഹമ്മദ് അൽ ഫത്തേ മസ്ജിദ് പുനരുദ്ധാരണ പ്രവർത്തനങ്ങൾക്ക് ശേഷം ഉദ്ഘാടനം ചെയ്ത് സംസാരിക്കുകയായിരുന്നു രാജാവ്.

സുപ്രീം കൗൺസിൽ ഫോർ ഇസ്‌ലാമിക് അഫയേഴ്‌സിന്റെ (SCIA) മേൽനോട്ടത്തിലും രാജാവിന്റെ നിർദ്ദേശപ്രകാരവുമാണ് മസ്ജിദിന്റെ വിപുലമായ പുനരുദ്ധാരണ പ്രവർത്തനങ്ങൾ പൂർത്തിയാക്കിയത്. കിരീടാവകാശിയും പ്രധാനമന്ത്രിയുമായ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അൽ ഖലീഫയും ചടങ്ങിൽ സംബന്ധിച്ചു. സുപ്രീം കൗൺസിൽ ഫോർ ഇസ്‌ലാമിക് അഫയേഴ്‌സ് ചെയർമാൻ ശൈഖ് അബ്ദുൽറഹ്മാൻ ബിൻ മുഹമ്മദ് അൽ ഖലീഫയുടെ നേതൃത്വത്തിലാണ് രാജാവിനെ സ്വീകരിച്ചത്. മസ്ജിദിൽ പ്രാർത്ഥന നിർവ്വഹിച്ച രാജാവ്, പ്രധാന പ്രാർത്ഥനാ ഹാൾ ഉൾപ്പെടെയുള്ള സൗകര്യങ്ങളും, 1795-ൽ അന്തരിച്ച ശൈഖ് അഹമ്മദ് അൽ ഫത്തേയുടെ ഖബറിടവും സന്ദർശിച്ചു.

രണ്ട് നിലകളിലായി 1,304 ചതുരശ്ര മീറ്റർ വിസ്തീർണ്ണത്തിൽ നിർമ്മിച്ച മസ്ജിദിൽ ആയിരത്തിലധികം തീർത്ഥാടകരെ ഉൾക്കൊള്ളാൻ സാധിക്കും. അഹമ്മദ് അൽ ഫത്തേ ഇസ്‌ലാമിക് സെന്റർ പ്രീച്ചർ ശൈഖ് അദ്നാൻ അൽ ഖത്താൻ ചടങ്ങിൽ പ്രത്യേക പ്രാർത്ഥനയ്ക്ക് നേതൃത്വം നൽകി. ബഹ്‌റൈന്റെ സ്ഥാപകനെ സ്മരിക്കുന്ന സാംസ്കാരിക കേന്ദ്രമായി മസ്ജിദ് തുടരുമെന്ന് വ്യക്തമാക്കിയ രാജാവ്, പുനരുദ്ധാരണ പ്രവർത്തനങ്ങൾക്ക് നേതൃത്വം നൽകിയ എസ്‌.സി.ഐ.എ, ഇസ്‌ലാമിക് എൻഡോവ്‌മെന്റ് കൗൺസിൽ എന്നിവർക്കും പങ്കാളികളായ എല്ലാവർക്കും നന്ദി അറിയിച്ചു.