ദേശീയ വൃക്ഷത്തോദ്യാന വാര ആഘോഷത്തിന്റെ ഭാഗമായി കിരീടാവകാശി പ്രിൻസ് സൽമാൻ തൈ നട്ടു
പ്രദീപ് പുറവങ്കര
മനാമ: രാജ്യത്തിന്റെ പരിസ്ഥിതി സംരക്ഷണം കൂടുതൽ ശക്തമാക്കുന്നതിനും, പ്രകൃതിവിഭവങ്ങളുടെ സുസ്ഥിരത ഉറപ്പുവരുത്തുന്നതിനും, ഹരിത ഇടങ്ങൾ വ്യാപിപ്പിക്കുന്നതിനും ജനകീയ പങ്കാളിത്തം അത്യന്താപേക്ഷിതമാണെന്ന് ബഹ്‌റൈൻ കിരീടാവകാശിയും പ്രധാനമന്ത്രിയുമായ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അൽ ഖലീഫ പ്രസ്താവിച്ചു. ദേശീയ വൃക്ഷത്തോദ്യാന വാര ആഘോഷങ്ങളുടെ (National Tree Week) ഭാഗമായി ഗുദൈബിയ കൊട്ടാരത്തിൽ വൃക്ഷത്തൈ നട്ടുകൊണ്ട് സംസാരിക്കുകയായിരുന്നു അദ്ദേഹം.
രാജാവ് ഹിസ് മജസ്റ്റി ഹമദ് ബിൻ ഈസ അൽ ഖലീഫയുടെ കാഴ്ചപ്പാടുകൾക്ക് അനുസൃതമായി, കാലാവസ്ഥാ വ്യതിയാനങ്ങളെ നേരിടാനും പരിസ്ഥിതി സുരക്ഷ ഉറപ്പാക്കാനും ഇത്തരം സംരംഭങ്ങൾ സഹായിക്കുമെന്ന് അദ്ദേഹം വ്യക്തമാക്കി. 2060-ഓടെ കാർബൺ ന്യൂട്രാലിറ്റി കൈവരിക്കുകയെന്ന ബഹ്‌റൈന്റെ ലക്ഷ്യം പൂർത്തീകരിക്കുന്നതിൽ പരിസ്ഥിതി സൗഹൃദ പ്രവർത്തനങ്ങൾ നിർണായകമാണ്. രാജ്യത്തെ വനവൽക്കരണ പദ്ധതികൾക്കും 'ബഹ്‌റൈൻ മാൻഗ്രോവ് ഇനിഷ്യേറ്റീവി'നും നേതൃത്വം നൽകുന്ന ശൈഖ് മുഹമ്മദ് ബിൻ സൽമാൻ ബിൻ ഹമദ് അൽ ഖലീഫയുടെ ശ്രമങ്ങളെ കിരീടാവകാശി പ്രത്യേകം അഭിനന്ദിച്ചു.
സർക്കാർ തലത്തിലും സ്വകാര്യ മേഖലയിലും സിവിൽ സമൂഹത്തിലും ഒത്തൊരുമിച്ചുള്ള പ്രവർത്തനങ്ങളാണ് പരിസ്ഥിതി സംരക്ഷണത്തിന് ആവശ്യമെന്ന് അദ്ദേഹം കൂട്ടിച്ചേർത്തു. അന്താരാഷ്ട്ര തലത്തിൽ കാലാവസ്ഥാ വ്യതിയാനങ്ങളെ നേരിടാനുള്ള ശ്രമങ്ങളിൽ ബഹ്‌റൈൻ തുടർന്നും സജീവമായി പങ്കാളികളാകുമെന്ന് ഉറപ്പുനൽകിയ ചടങ്ങിൽ മുതിർന്ന ഉദ്യോഗസ്ഥരും ഭരണാധികാരികളും പങ്കെടുത്തു.
fsdf
