ഹാരി കെയ്‌ന് ബാലൺ ഡി ഓർ; 25 വർഷത്തിനുശേഷമുള്ള അപൂർവ്വ നേട്ടത്തിൽ തിളങ്ങി ഇംഗ്ലീഷ് താരം
ശാരിക
ലണ്ടൻ: ലോക ഫുട്ബാളിലെ ഏറ്റവും വലിയ പുരസ്കാരമായ ബാലൺ ഡി ഓറിൽ 25 വർഷത്തെ ഇടവേളയ്ക്ക് ശേഷം ഒരു ഇംഗ്ലീഷ് താരം മുത്തമിട്ടു. ലണ്ടനിൽ നടന്ന ചടങ്ങിൽ ബയേൺ മ്യൂണിക്കിന്റെ 33കാരനായ സ്‌ട്രൈക്കർ കെയ്ൻ ഈ പുരസ്കാരം ഏറ്റുവാങ്ങി. 2001ൽ മൈക്കൽ ഓവനാണ് ഇതിനുമുമ്പ് ഈ നേട്ടം കൈവരിച്ചതെങ്കിൽ, ബാലൺ ഡി ഓർ നേടുന്ന അഞ്ചാമത്തെ ഇംഗ്ലീഷ് താരമായി കെയ്ൻ മാറിയിരിക്കുന്നു. റയൽ മാഡ്രിഡിന്റെ കിലിയൻ എംബാപ്പെ രണ്ടാം സ്ഥാനവും, സ്പാനിഷ് യുവതാരം ലമീൻ യമാൽ മൂന്നാം സ്ഥാനവും കരസ്ഥമാക്കി.
കഴിഞ്ഞ സീസണിൽ ബയേണിനായി 51 മത്സരങ്ങളിൽനിന്ന് 61 ഗോളുകൾ അടിച്ചുകൂട്ടിയ താരം, ഇംഗ്ലണ്ടിനായുള്ള മത്സരങ്ങൾ കൂടി കണക്കിലെടുക്കുമ്പോൾ 65 മത്സരങ്ങളിൽനിന്ന് 73 ഗോളുകളും എട്ട് അസിസ്റ്റുകളുമാണ് സ്വന്തമാക്കിയത്. കാൾ-ഹെയ്ൻസ് റുമ്മെനിഗെക്ക് (1981) ശേഷം ബാലൺ ഡി ഓർ നേടുന്ന ആദ്യ ബയേൺ താരമായും കെയ്ൻ മാറി.
എട്ടാം വയസ്സിൽ ആഴ്‌സനൽ അക്കാദമിയിൽനിന്ന് ശരീരം തടിച്ചതാണെന്ന കാരണം പറഞ്ഞ് തഴയപ്പെട്ട കെയ്ൻ, കരിയറിന്റെ തുടക്കത്തിൽ ലെയ്‌റ്റൺ ഓറിയന്റ്, മിൽവാൾ, നോർവിച്ച് സിറ്റി, ലെസ്റ്റർ സിറ്റി തുടങ്ങിയ ക്ലബുകളിൽ ലോണിൽ കളിച്ചാണ് പ്രതിസന്ധികളെ അതിജീവിച്ചത്. ടോട്ടൻഹാമിലൂടെയും പിന്നീട് ബയേൺ മ്യൂണിക്കിലൂടെയും ലോക ഫുട്ബാളിന്റെ നെറുകയിലേക്ക് ഉയർന്ന കെയ്‌നിന്റെ ഈ ബാലൺ ഡി ഓർ നേട്ടം, കരിയറിന്റെ വിവിധ ഘട്ടങ്ങളിൽ തന്നെ തിരസ്കരിച്ചവരോടുള്ള രണ്ട് പതിറ്റാണ്ടോളം നീണ്ട പോരാട്ടത്തിനുള്ള മറുപടി കൂടിയാണ്.
sdsd
