ബഹ്റൈനിൽ സ്മാർട്ട് ട്രാഫിക് ക്യാമറകൾ പ്രവർത്തനമാരംഭിച്ചു: നിയമലംഘനങ്ങൾ പിടികൂടിത്തുടങ്ങി
പ്രദീപ് പുറവങ്കര I ബഹ്റൈൻ:
വാഹനമോടിക്കുമ്പോൾ മൊബൈൽ ഫോൺ ഉപയോഗിക്കുന്നതും സീറ്റ് ബെൽറ്റ് ധരിക്കാത്തതും കണ്ടെത്താൻ ലക്ഷ്യമിട്ടുള്ള സ്മാർട്ട് ക്യാമറ സംവിധാനം ബഹ്റൈനിൽ ഔദ്യോഗികമായി പ്രവർത്തനം ആരംഭിച്ചതായി ആഭ്യന്തര മന്ത്രാലയം അറിയിച്ചു. അത്യാധുനിക സാങ്കേതിക സൗകര്യങ്ങളോടെ സജ്ജീകരിച്ചിരിക്കുന്ന ഈ സംവിധാനത്തിന്റെ ആദ്യഘട്ടം എല്ലാത്തരം കാലാവസ്ഥയിലും കൃത്യമായി പ്രവർത്തിക്കുമെന്ന് ഉറപ്പാക്കിയിട്ടുണ്ട്. പ്രവർത്തനമാരംഭിച്ചതു മുതൽ നിരവധി നിയമലംഘനങ്ങൾ ഈ സ്മാർട്ട് ക്യാമറകൾ ഇതിനോടകം തന്നെ രേഖപ്പെടുത്തിയിട്ടുണ്ട്.
ട്രാഫിക് നിയമലംഘനങ്ങൾ, വാഹന രജിസ്ട്രേഷൻ കാലാവധി, ഡ്രൈവിംഗ് ലൈസൻസ് പുതുക്കൽ എന്നിവയുമായി ബന്ധപ്പെട്ട അറിയിപ്പുകൾ കൃത്യസമയത്ത് ലഭിക്കുന്നതിനായി എല്ലാ വാഹന ഉടമകളും തങ്ങളുടെ വ്യക്തിഗത വിവരങ്ങൾ കൃത്യമായി അപ്ഡേറ്റ് ചെയ്യണമെന്ന് ജനറൽ ഡയറക്ടറേറ്റ് ഓഫ് ട്രാഫിക് നിർദ്ദേശിച്ചു. 'MyGov' ആപ്ലിക്കേഷൻ വഴി വിവരങ്ങൾ പുതുക്കുന്നതിലൂടെ, തങ്ങൾ അറിയാതെ നിയമലംഘനങ്ങൾ വർദ്ധിക്കുന്നത് ഒഴിവാക്കാൻ ഡ്രൈവർമാർക്ക് സാധിക്കും.
ട്രാഫിക് നിയമങ്ങളും നിയന്ത്രണങ്ങളും കർശനമായി പാലിക്കേണ്ടതിന്റെ പ്രാധാന്യം അതോറിറ്റി ആവർത്തിച്ചു വ്യക്തമാക്കി. തെറ്റായ ഡ്രൈവിംഗ് രീതികൾ ഒഴിവാക്കണമെന്നും ഉത്തരവാദിത്തബോധത്തോടെ വാഹനം ഓടിച്ച് ട്രാഫിക് ബോധവൽക്കരണത്തിൽ പങ്കാളികളാകണമെന്നും അധികൃതർ ഡ്രൈവർമാരോട് അഭ്യർത്ഥിച്ചു.
ു്ിു
