വാഹനാപകടത്തിൽ തലയ്ക്ക് പരിക്കേറ്റ സ്ത്രീക്ക് 9,000 ദിനാർ നഷ്ടപരിഹാരം നൽകാൻ വിധി
പ്രദീപ് പുറവങ്കര I ബഹ്റൈൻ:
ബഹ്റൈനിൽ വാഹനാപകടത്തിൽ തലയ്ക്ക് ഗുരുതരമായി പരിക്കേറ്റ സ്വദേശി വനിതയ്ക്ക് 9,000 ബഹ്റൈൻ ദിനാർ നഷ്ടപരിഹാരം നൽകാൻ സിവിൽ കോടതി ഉത്തരവിട്ടു. അപകടത്തിന് കാരണക്കാരനായ ഡ്രൈവറും അദ്ദേഹത്തിന്റെ ഇൻഷുറൻസ് കമ്പനിയും സംയുക്തമായി ഈ തുക നൽകണമെന്നാണ് ഹൈ സിവിൽ കോടതി വിധിച്ചത്. ഇതിനുപുറമെ കോടതി ചെലവുകൾ, അഭിഭാഷക ഫീസ്, മെഡിക്കൽ കമ്മിറ്റി ഫീസ് എന്നിവയും പ്രതികൾ വഹിക്കണം.
തന്റെ കൊച്ചുമകനോടൊപ്പം യാത്ര ചെയ്യുകയായിരുന്ന സ്ത്രീയുടെ വാഹനത്തിന് പിന്നിൽ മറ്റൊരു കാർ വന്നിടിച്ചാണ് അപകടമുണ്ടായത്. ഡ്രൈവറുടെ അശ്രദ്ധയും സുരക്ഷിതമായ അകലം പാലിക്കാത്തതുമാണ് അപകടത്തിന് കാരണമെന്ന് സ്ത്രീയുടെ അഭിഭാഷകൻ കോടതിയിൽ വാദിച്ചു. അപകടത്തിൽ സ്ത്രീയുടെ തലയ്ക്ക് ഒടിവും നേരിയ രക്തസ്രാവവും സംഭവിച്ചിരുന്നു.
നേരത്തെ നടന്ന ക്രിമിനൽ നടപടികളിൽ ഡ്രൈവർ കുറ്റക്കാരനാണെന്ന് കണ്ടെത്തി 100 ദിനാർ പിഴ ശിക്ഷിച്ചിരുന്നു. ഇതിനുപിന്നാലെയാണ് നഷ്ടപരിഹാരം ആവശ്യപ്പെട്ട് സ്ത്രീ സിവിൽ കോടതിയെ സമീപിച്ചത്. കോടതി നിയോഗിച്ച മെഡിക്കൽ കമ്മിറ്റി യുവതിയെ പരിശോധിക്കുകയും അവർക്ക് 20 ശതമാനം സ്ഥിരമായ വൈകല്യം സംഭവിച്ചതായി റിപ്പോർട്ട് നൽകുകയും ചെയ്തു.
ഒരാളുടെ പിഴവ് മൂലം മറ്റൊരാൾക്ക് ഉപദ്രവം സംഭവിച്ചാൽ അത് പരിഹരിക്കാൻ പിഴവുകാരൻ ബാധ്യസ്ഥനാണെന്ന സിവിൽ കോഡിലെ ആർട്ടിക്കിൾ 158 മുൻനിർത്തിയാണ് കോടതി ഈ വിധി പുറപ്പെടുവിച്ചത്. പരിക്കേറ്റ തീയതി മുതലുള്ള പലിശ സഹിതം നഷ്ടപരിഹാരത്തുക നൽകാനും കോടതി നിർദ്ദേശിച്ചു.
dsfsdf
