ബഹ്റൈനിൽ വൻ മയക്കുമരുന്ന് വേട്ട: 17 കിലോ ലഹരിവസ്തുക്കളുമായി 12 പേർ പിടിയിൽ
പ്രദീപ് പുറവങ്കര / മനാമ
രാജ്യത്ത് ആന്റി-നാർക്കോട്ടിക്സ് ഡയറക്ടറേറ്റ് നടത്തിയ കർശനമായ പരിശോധനയിൽ വൻ മയക്കുമരുന്ന് ശേഖരം പിടികൂടി. വിവിധ രാജ്യക്കാരായ 12 പേരാണ് സംഭവത്തിൽ അറസ്റ്റിലായത്.
പിടിയിലായ പ്രതികൾ 23-നും 49-നും ഇടയിൽ പ്രായമുള്ളവരാണെന്ന് അധികൃതർ വ്യക്തമാക്കി. ഇവരിൽ നിന്ന് ഏകദേശം 17 കിലോഗ്രാം മയക്കുമരുന്നാണ് സുരക്ഷാ ഉദ്യോഗസ്ഥർ കണ്ടെടുത്തത്.
പിടിച്ചെടുത്ത ലഹരിവസ്തുക്കൾക്ക് അന്താരാഷ്ട്ര വിപണിയിൽ ഏകദേശം 2,27,000 ബഹ്റൈൻ ദിനാറിലധികം (ഏകദേശം അഞ്ചു കോടിയിലധികം ഇന്ത്യൻ രൂപ) മൂല്യം വരുമെന്നാണ് പ്രാഥമിക കണക്കുകൾ സൂചിപ്പിക്കുന്നത്.
കസ്റ്റംസ് അഫയേഴ്സുമായി സഹകരിച്ച് നടത്തിയ വിപുലമായ അന്വേഷണത്തിനൊടുവിലാണ് പ്രതികളെ പിടികൂടാൻ സാധിച്ചത്. മയക്കുമരുന്ന് കടത്തിനെതിരെ ആഭ്യന്തര മന്ത്രാലയം നടത്തുന്ന ശക്തമായ പ്രതിരോധ പ്രവർത്തനങ്ങളുടെ ഭാഗമായാണ് ഈ നടപടി.
അറസ്റ്റിലായവർക്കെതിരെ നിയമപരമായ തുടർനടപടികൾ സ്വീകരിക്കുന്നതിനായി കേസുകൾ പബ്ലിക് പ്രോസിക്യൂഷന് കൈമാറിയിട്ടുണ്ടെന്ന് ബഹ്റൈൻ ആഭ്യന്തര മന്ത്രാലയം ഔദ്യോഗികമായി അറിയിച്ചു.
ലഹരി വിപണനത്തിനെതിരെ കർശനമായ നിരീക്ഷണം തുടരുമെന്നും അധികൃതർ മുന്നറിയിപ്പ് നൽകി.
rerte
