വ്യാജ ചികിത്സയ്ക്ക് കടുത്ത ശിക്ഷ നൽകാനൊരുങ്ങി ബഹ്റൈൻ

പ്രദീപ് പുറവങ്കര I ബഹ്റൈൻ

ബഹ്‌റൈനിലെ ആരോഗ്യമേഖലയുടെ സുരക്ഷയും വിശ്വാസ്യതയും വർദ്ധിപ്പിക്കുന്നതിനായി വ്യാജ ഡോക്ടർമാർക്കും അനധികൃത ക്ലിനിക്കുകൾക്കുമെതിരെ നടപടി കടുപ്പിക്കാനൊരുങ്ങി സർക്കാർ. ഇത് സംബന്ധിച്ച രണ്ട് നിർണ്ണായക കരട് നിയമങ്ങൾ സർക്കാർ പാർലമെന്റിന് സമർപ്പിച്ചു.

പുതിയ നിയമ ഭേദഗതികൾ പ്രകാരം, ലൈസൻസില്ലാതെ ചികിത്സ നടത്തുന്നവർക്കും അനധികൃത ക്ലിനിക്കുകൾ നടത്തുന്നവർക്കും കഠിനമായ ശിക്ഷയാണ് ശുപാർശ ചെയ്തിരിക്കുന്നത്. കുറ്റക്കാർക്ക് അഞ്ച് വർഷം വരെ തടവോ 5,000 ബഹ്‌റൈൻ ദിനാർ വരെ പിഴയോ അല്ലെങ്കിൽ ഇവ രണ്ടും കൂടിയോ ശിക്ഷയായി ലഭിക്കാം. തെറ്റായ വിവരങ്ങൾ നൽകി ലൈസൻസ് നേടുക, ആരോഗ്യ പ്രവർത്തകരാണെന്ന് നടിച്ച് ആൾമാറാട്ടം നടത്തുക, വ്യാജ പരസ്യങ്ങൾ നൽകുക എന്നിവയും കുറ്റകരമാക്കും. കുറ്റം തെളിയുന്ന പക്ഷം സ്ഥാപനങ്ങൾ അടച്ചുപൂട്ടാനും മെഡിക്കൽ ഉപകരണങ്ങൾ കണ്ടുകെട്ടാനും കോടതിക്കും ഭരണകൂടത്തിനും പുതിയ നിയമം അധികാരം നൽകുന്നു.

കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫയാണ് ഈ നിയമ നിർദ്ദേശങ്ങൾ പാർലമെന്റ് സ്പീക്കർ അഹമ്മദ് അൽ മുസ്‌ല്ലമിന് കൈമാറിയത്. വരാനിരിക്കുന്ന ചൊവ്വാഴ്ചത്തെ പാർലമെന്റ് സമ്മേളനത്തിൽ എം.പിമാർ ഈ ബില്ലുകൾ ചർച്ച ചെയ്യുകയും തുടർ നടപടികൾക്കായി നിയമസഭ സമിതികൾക്ക് വിടുകയും ചെയ്യും.

1987, 1989 വർഷങ്ങളിലെ നിലവിലുള്ള നിയമങ്ങളിൽ മാറ്റം വരുത്തിക്കൊണ്ടാണ് ശിക്ഷാനടപടികൾ ഏകീകരിക്കുന്നത്. ഡോക്ടർമാർ, ദന്തഡോക്ടർമാർ, മറ്റ് പാരാമെഡിക്കൽ ജീവനക്കാർ എന്നിവർക്കെല്ലാം ഒരേപോലെ ബാധകമായ മാനദണ്ഡങ്ങളാണ് ഇതിലൂടെ വരുന്നത്. നിയമലംഘനം കണ്ടെത്തിയാൽ അന്തിമ വിധി വരുന്നത് വരെ ക്ലിനിക്കുകൾ താൽക്കാലികമായി അടച്ചുപൂട്ടാനും പുതിയ നിയമം അധികാരികൾക്ക് അനുവാദം നൽകുന്നു. യോഗ്യതയില്ലാത്തവരുടെ ചികിത്സ മൂലം രോഗികൾക്കുണ്ടാകുന്ന അപകടങ്ങൾ ഒഴിവാക്കാനാണ് സർക്കാർ ഈ പരിഷ്കാരത്തിലൂടെ ലക്ഷ്യമിടുന്നത്. വരും ദിവസങ്ങളിൽ ഭരണഘടനാപരമായ പരിശോധനകൾ പൂർത്തിയാക്കി നിയമം പ്രാബല്യത്തിൽ വരുമെന്നാണ് പ്രതീക്ഷിക്കുന്നത്.