കഴിഞ്ഞ വർഷം ബഹ്റൈൻ അഭ്യന്തരമന്ത്രാലയം കൈകാര്യം ചെയ്തത് ഒരു ലക്ഷത്തിലധികം കേസുകൾ

പ്രദീപ് പുറവങ്കര I ബഹ്റൈൻ

മനാമ: ബഹ്റൈനിലെ വിവിധ സുരക്ഷാ വിഭാഗങ്ങൾ കഴിഞ്ഞ വർഷം അതീവ ജാഗ്രതയോടെയും പ്രൊഫഷണലിസത്തോടെയും പ്രവർത്തിച്ചതായി റിപ്പോർട്ട്. ആഭ്യന്തര മന്ത്രാലയത്തിന് കീഴിലുള്ള വിവിധ വകുപ്പുകൾ കഴിഞ്ഞ വർഷം മാത്രം ഒരു ലക്ഷത്തിലധികം പരാതികളും കേസുകളുമാണ് വിജയകരമായി കൈകാര്യം ചെയ്തത്. ആഭ്യന്തര മന്ത്രി ജനറൽ ഷെയ്ഖ് റാഷിദ് ബിൻ അബ്ദുള്ള അൽ ഖലീഫ പോലീസിന്റെയും മറ്റ് സുരക്ഷാ ഉദ്യോഗസ്ഥരുടെയും സേവന സന്നദ്ധതയെ അഭിനന്ദിച്ചു. പൊതുസുരക്ഷ ഉറപ്പാക്കുന്നതിൽ പോലീസ് സേന നടത്തുന്ന അർപ്പണബോധവും ത്യാഗവും അഭിനന്ദനാർഹമാണെന്ന് 'അൽ അമൻ' മാഗസിൻ്റെ ഫെബ്രുവരി പതിപ്പിൽ അദ്ദേഹം വ്യക്തമാക്കി.

കഴിഞ്ഞ വർഷം ഓപ്പറേഷൻസ് ഡിപ്പാർട്ട്‌മെൻ്റിൽ റിപ്പോർട്ട് ചെയ്ത 29,178 ആശയവിനിമയങ്ങളിൽ 61 ശതമാനവും അതീവ അടിയന്തര പ്രാധാന്യമുള്ളവയായിരുന്നു. മോഷണം, കാണാതാകൽ, പൊതുസ്ഥലത്തെ അതിക്രമങ്ങൾ എന്നിവ ഇതിൽ ഉൾപ്പെടുന്നു. കൂടാതെ 9,920 ഗതാഗത അപകടങ്ങളും 1,460 സുരക്ഷാ കേസുകളും ഈ വിഭാഗം കൈകാര്യം ചെയ്തു. കോസ്റ്റ് ഗാർഡ് വിഭാഗം 1,537 റിപ്പോർട്ടുകളിലായി 916 പേർക്ക് സഹായമെത്തിക്കുകയും 503 തിരച്ചിൽ-രക്ഷാപ്രവർത്തനങ്ങൾ നടത്തുകയും ചെയ്തു. നിയമവിരുദ്ധ മത്സ്യബന്ധനവുമായി ബന്ധപ്പെട്ട ഒക്ടോബറിലെ ഒരു പിന്തുടരലിനിടെ കടലിൽ വീണ വ്യക്തിയുടെ മൃതദേഹം ഖത്തർ കോസ്റ്റ് ഗാർഡ് കണ്ടെടുത്ത സംഭവവും റിപ്പോർട്ടിലുണ്ട്.

ദുരന്തനിവാരണ രംഗത്തും ആരോഗ്യ സേവനത്തിലും മന്ത്രാലയം വലിയ മുന്നേറ്റം നടത്തി. സിവിൽ ഡിഫൻസ് 16,102 കേസുകളിൽ ഇടപെട്ടതിൽ 2,572 തീപിടുത്തങ്ങളും 7,944 സഹായ അഭ്യർത്ഥനകളും ഉൾപ്പെടുന്നു. നാഷണൽ ആംബുലൻസ് ആകെ 43,286 രോഗികളെ പരിചരിച്ചു. ഇതിൽ 7,437 പേർക്ക് അടിയന്തര ചികിത്സ നൽകുകയും ചെയ്തു. ഇടുങ്ങിയ റോഡുകളിലും തിരക്കുള്ളയിടങ്ങളിലും വേഗത്തിൽ എത്തുന്നതിനായി ആംബുലൻസ് മോട്ടോർ സൈക്കിൾ സർവീസും കഴിഞ്ഞ വർഷം ആരംഭിച്ചു.

കസ്റ്റംസ് ഡയറക്ടറേറ്റ് വൻതോതിലുള്ള നിരോധന വസ്തുക്കളാണ് കഴിഞ്ഞ വർഷം പിടിച്ചെടുത്തത്. 528 നിയമവിരുദ്ധ ആയുധങ്ങൾ, 10,591 വ്യാജ ഉൽപ്പന്നങ്ങൾ, 12 ടണ്ണോളം വരുന്ന 58,996 പുകയില ഉൽപ്പന്നങ്ങൾ എന്നിവ ഇതിൽ ഉൾപ്പെടുന്നു. എക്സ്-റേ ഉപകരണങ്ങളുടെയും കെ9 യൂണിറ്റിൻ്റെയും സഹായത്തോടെയാണ് ഭൂരിഭാഗം കേസുകളും കണ്ടെത്തിയത്. ഭാവിയിൽ സുരക്ഷാ സംവിധാനങ്ങൾ കൂടുതൽ ശക്തമാക്കാൻ സാങ്കേതിക വിദ്യയിലും മനുഷ്യവിഭവശേഷിയിലും കൂടുതൽ നിക്ഷേപം നടത്താൻ വകുപ്പ് തീരുമാനിച്ചു.

മന്ത്രാലയത്തിന്റെ സേവനങ്ങൾ ഡിജിറ്റലായതോടെ ജനങ്ങൾക്കിടയിൽ മികച്ച പ്രതികരണമാണ് ലഭിക്കുന്നത്. മൈഗവ് ആപ്പ് വഴി 7,639 പരാതികളാണ് കഴിഞ്ഞ വർഷം ലഭിച്ചത്. ഇതിൽ അഴിമതി വിരുദ്ധ വിഭാഗം, സൈബർ ക്രൈം ഡയറക്ടറേറ്റ് തുടങ്ങിയവയ്ക്കുള്ള പരാതികൾ ഉൾപ്പെടുന്നു. ഓൺലൈൻ പ്ലാറ്റ്‌ഫോമുകൾ വഴിയുള്ള സേവനങ്ങളിൽ 96 ശതമാനം ഉപഭോക്തൃ സംതൃപ്തി രേഖപ്പെടുത്തിയതായും അധികൃതർ അറിയിച്ചു.