ഇന്ത്യൻ സ്കൂൾ പ്ലാറ്റിനം ജൂബിലി: മെഗാ ഫെയർ ജനുവരി 15, 16 തീയതികളിൽ; സ്റ്റീഫൻ ദേവസ്സി മുഖ്യ ആകർഷണം

ഷീബ വിജയ൯

മനാമ: വിദ്യാഭ്യാസ മേഖലയിൽ 75 വർഷത്തെ മികവുറ്റ സേവനം പൂർത്തിയാക്കുന്നതിന്റെ ഭാഗമായി ഇന്ത്യൻ സ്കൂൾ പ്ലാറ്റിനം ജൂബിലി വർഷ ഫെയർ സംഘടിപ്പിക്കുന്നു. ജനുവരി 15, 16 തീയതികളിലാണ് മെഗാ ഫെയർ നടക്കുക. 1950-ൽ സ്ഥാപിതമായ സ്കൂളിന്റെ സമ്പന്നമായ പൈതൃകത്തെ ആദരിക്കുന്നതിനും നേട്ടങ്ങൾ ആഘോഷിക്കുന്നതിനും ഭാവിയോടുള്ള പ്രതിബദ്ധത ഊട്ടിയുറപ്പിക്കുന്നതിനും ലക്ഷ്യമിട്ടാണ് വിപുലമായ പരിപാടികൾ ആസൂത്രണം ചെയ്തിരിക്കുന്നത്.

ജനുവരി 15-ന് പ്രശസ്ത ഇന്ത്യൻ സംഗീതജ്ഞൻ സ്റ്റീഫൻ ദേവസ്സിയും സംഘവും അവതരിപ്പിക്കുന്ന സംഗീത കച്ചേരിയോടെയാണ് സാംസ്കാരിക ആഘോഷങ്ങൾക്ക് തുടക്കമാവുക. ജനുവരി 16-ന് വിദ്യാർത്ഥികളുടെ കലാപരിപാടികൾക്ക് ശേഷം പ്രമുഖ പിന്നണി ഗായകരായ രൂപാലി ജഗ്ഗയും അഭിഷേക് സോണിയും സംഘവും അവതരിപ്പിക്കുന്ന സംഗീത വിരുന്നും അരങ്ങേറും. സ്റ്റാർ വിഷൻ ഇവന്റ്‌സ് അവതരിപ്പിക്കുന്ന മേളയിൽ രണ്ടു ദിവസവും വൈകുന്നേരം 6 മണി മുതൽ രാത്രി 10:30 വരെ പരിപാടികൾ നടക്കും.

വിദ്യാർത്ഥികൾക്കും രക്ഷിതാക്കൾക്കും പൂർവ്വ വിദ്യാർത്ഥികൾക്കും വിശാലമായ സമൂഹത്തിൽ നിന്നുള്ള കുടുംബങ്ങൾക്കും ഒത്തുചേരാൻ അവസരം നൽകുന്ന ഈ മേളയിൽ, സ്കൂൾ വിദ്യാർത്ഥികളുടെ കലാപരമായ കഴിവുകളെ പ്രതിഫലിപ്പിക്കുന്ന സാംസ്കാരിക പ്രകടനങ്ങളുടെ ശ്രദ്ധേയമായ ഒരു നിരതന്നെ പ്രദർശിപ്പിക്കും.

മേളയുടെ ഒരു പ്രധാന ആകർഷണം അതിലെ വിപുലമായ ഭക്ഷണ-വിനോദ സ്റ്റാളുകളായിരിക്കും. ലൈസൻസുള്ള ഔട്ട്‌ഡോർ കാറ്ററിംഗ് സ്ഥാപനങ്ങൾ വിവിധ ഇന്ത്യൻ സംസ്ഥാനങ്ങളിൽ നിന്നുള്ള ജനപ്രിയ പാചകരീതികൾക്കൊപ്പം പ്രാദേശിക പ്രത്യേകതകളും ഉൾക്കൊള്ളുന്ന വൈവിധ്യമാർന്ന രുചിക്കൂട്ടുകൾ ഒരുക്കും. കുട്ടികൾക്കും യുവാക്കൾക്കും കുടുംബങ്ങൾക്കും വേണ്ടി നിരവധി ഗെയിമുകളും വിനോദ സ്റ്റാളുകളും സംഘടിപ്പിക്കും.

റാഫിൾ ഡ്രോയിൽ ഒന്നാം സമ്മാനമായി എം.ജി. കാർ നൽകി സയാനി മോട്ടോഴ്‌സ് മേളയെ ഉദാരമായി പിന്തുണയ്ക്കുന്നു. ജനുവരി 18-ന് രാവിലെ 11 മണിക്ക് മന്ത്രാലയത്തിലെ ഉദ്യോഗസ്ഥരുടെ സാന്നിധ്യത്തിൽ റാഫിൾ നറുക്കെടുപ്പ് നടക്കും. ഫെയർ ടിക്കറ്റ് നിരക്ക് രണ്ട് ദിനാറാണ്.

പ്ലാറ്റിനം ജൂബിലി പരിപാടികളുടെ വിജയകരമായ നടത്തിപ്പിനായി പ്രിൻസിപ്പൽമാരുടെയും വൈസ് പ്രിൻസിപ്പൽമാരുടെയും നേതൃത്വത്തിൽ ഒരു സമർപ്പിത സംഘാടക സമിതി രൂപീകരിച്ചിട്ടുണ്ട്. മേളയുടെ ജനറൽ കൺവീനർ ആർ. രമേശിന്റെയും പ്ലാറ്റിനം ജൂബിലി ജനറൽ കൺവീനർ പ്രിൻസ് എസ്. നടരാജന്റെയും നേതൃത്വത്തിൽ 501 അംഗ രക്ഷാകർതൃ സംഘാടക സമിതിയും ഒത്തൊരുമയോടെ പ്രവർത്തിക്കുന്നു.

ഫെയറിൽ നിന്നുള്ള വരുമാനം അടിസ്ഥാന സൗകര്യ വികസനം, വിദ്യാർത്ഥികൾക്കുള്ള സാമ്പത്തിക സഹായം, ജീവനക്കാരുടെ ക്ഷേമ സംരംഭങ്ങൾ എന്നിവയിലേക്ക് വിനിയോഗിക്കുമെന്ന് ജൂബിലി ആഘോഷങ്ങളുടെ ഭാഗമായി നടത്തിയ പത്രസമ്മേളനത്തിൽ സ്‌കൂൾ ചെയർമാൻ അഡ്വ. ബിനു മണ്ണിൽ വർഗീസ് അറിയിച്ചു. വിദ്യാർത്ഥികൾ, അധ്യാപകർ, മാതാപിതാക്കൾ, സന്നദ്ധപ്രവർത്തകർ എന്നിവരുടെ കൂട്ടായ പരിശ്രമം സ്കൂളിന്റെ വിദ്യാഭ്യാസ, സാമൂഹിക പ്രതിബദ്ധതയെ ശക്തിപ്പെടുത്തുന്നുവെന്നും അദ്ദേഹം കൂട്ടിച്ചേർത്തു.

പത്രസമ്മേളനത്തിൽ ചെയർമാൻ അഡ്വ. ബിനു മണ്ണിൽ വറുഗീസ്, സെക്രട്ടറി വി. രാജപാണ്ഡ്യൻ, വൈസ് ചെയർമാൻ ഡോ. മുഹമ്മദ് ഫൈസൽ, അസി. സെക്രട്ടറി രഞ്ജിനി മോഹൻ, ഫിനാൻസ് അംഗം ബോണി ജോസഫ്, പ്രിൻസിപ്പൽ വി.ആർ. പളനിസ്വാമി, പ്ലാറ്റിനം ജൂബിലി ഫെയർ ജനറൽ കൺവീനർ ആർ. രമേശ് തുടങ്ങി നിരവധി ഭാരവാഹികളും പങ്കെടുത്തു. 12,000-ത്തിലധികം വിദ്യാർത്ഥികളും 700 അധ്യാപകരുമുള്ള ഇന്ത്യൻ സ്‌കൂൾ ഒരുക്കുന്ന മേള സന്ദർശിക്കാൻ എത്തുന്നവർക്ക് സൗകര്യപ്രദമായ പാർക്കിങ് ഉറപ്പാക്കാൻ ദേശീയ സ്റ്റേഡിയത്തിൽ നിന്ന് ഷട്ടിൽ ബസ് സർവീസുകൾ ഒരുക്കുമെന്നും അധികൃതർ അറിയിച്ചു.