68-ാമത് കേരള സ്കൂൾ കായികമേളയ്ക്ക് കോഴിക്കോട് വേദിയാകും

ശാരിക

കോഴിക്കോട്: സംസ്ഥാനത്തെ സ്കൂൾ കായികപ്രതിഭകൾ മാറ്റുരക്കുന്ന 68-ാമത് കേരള സ്കൂൾ കായികമേളയ്ക്ക് കോഴിക്കോട് ആതിഥ്യം വഹിക്കും. ഒക്ടോബർ 25 മുതൽ 31 വരെ നടക്കുന്ന കായികമാമാങ്കത്തിന്റെ ഒരുക്കങ്ങൾ അവസാനഘട്ടത്തിലാണ്. കായികതാരങ്ങൾ, ടീം മാനേജർമാർ, ഒഫീഷ്യൽസ്, സംഘാടകർ എന്നിവരടക്കം പതിനായിരത്തോളം പേർ മേളയുടെ ഭാഗമാകും. മേള വിജയകരമാക്കുന്നതിനുള്ള അവസാനവട്ട ഒരുക്കങ്ങളിലാണ് കോഴിക്കോട് ജില്ല. മേളയ്ക്കായി 10 മത്സരവേദികളാണ് സജ്ജീകരിച്ചിട്ടുള്ളത്. 25ന് നടക്കുന്ന ഉദ്ഘാടന ചടങ്ങിൽ 4,000 കായികതാരങ്ങൾ അണിനിരക്കുന്ന മാർച്ച് പാസ്റ്റോടെ മത്സരങ്ങൾക്ക് തുടക്കമാകും. 3,000 കുട്ടികൾ പങ്കെടുക്കുന്ന വർണാഭമായ സാംസ്കാരിക പരിപാടികളും മേളയ്ക്ക് മാറ്റുകൂട്ടും.

മേളയിലെ പ്രധാന ആകർഷണമായ ട്രാക്ക് ആൻഡ് ഫീൽഡ് മത്സരങ്ങൾക്ക് നാഷനൽ ഇൻസ്റ്റിറ്റ്യൂട്ട് ഓഫ് ടെക്നോളജി (എൻ.ഐ.ടി) കോഴിക്കോട് കാമ്പസ് വേദിയാകും. ഒക്ടോബർ 27 മുതൽ 31 വരെയാണ് ഇവിടെ അത്‌ലറ്റിക്സ് മത്സരങ്ങൾ നടക്കുന്നത്. സബ് ജൂനിയർ, ജൂനിയർ, സീനിയർ വിഭാഗങ്ങളിലായി 2,800 കായികതാരങ്ങൾ ട്രാക്കിലിറങ്ങും. 30ന് നടക്കുന്ന ക്രോസ് കൺട്രി മത്സരങ്ങൾക്കും ഇൻക്ലൂസീവ് അത്‌ലറ്റിക്സ്, ഇൻക്ലൂസീവ് ഫുട്ബാൾ മത്സരങ്ങൾക്കും എൻ.ഐ.ടി വേദിയാകും. ബാഡ്മിന്റൺ, ഇൻക്ലൂസീവ് ബാഡ്മിന്റൺ മത്സരങ്ങൾ ദേവഗിരി സെന്റ് ജോസഫ് കോളജ് ഇൻഡോർ സ്റ്റേഡിയത്തിൽ നടക്കും. പെൺകുട്ടികളുടെ ബാസ്കറ്റ്ബാൾ മത്സരം ചേവായൂർ പ്രസന്റേഷൻ എച്ച്.എസ്.എസിലും ആൺകുട്ടികളുടെ ബാസ്കറ്റ്ബോൾ മത്സരം സിൽവർ ഹിൽസ് പബ്ലിക് സ്കൂളിലും നടക്കും.

വടംവലി, ഇൻക്ലൂസീവ് ക്രിക്കറ്റ് മത്സരങ്ങൾ കുന്നമംഗലം ഹയർ സെക്കൻഡറി സ്കൂളിൽ സംഘടിപ്പിക്കും. കൊടിയത്തൂർ പി.ടി.എം. എച്ച്.എസ്.എസ്, വാദി റഹ്മ ഇംഗ്ലീഷ് സ്കൂൾ എന്നിവിടങ്ങളിലായി കരാട്ടെ, വുഷു, സോഫ്റ്റ്ബാൾ, ബേസ്ബാൾ, ബോൾ ബാഡ്മിന്റൺ മത്സരങ്ങൾ നടക്കും. യോഗ മത്സരങ്ങൾ ചാത്തമംഗലം ആർ.ഇ.സി. ജി.വി.എച്ച്.എസ്.എസിലും നെറ്റ്ബോൾ, ത്രോബോൾ മത്സരങ്ങൾ പെരുവയൽ സെന്റ് സേവ്യേഴ്സ് യു.പി. സ്കൂളിലുമാണ് നടത്തുന്നത്.

പ്രത്യേക പരിഗണന അർഹിക്കുന്ന കുട്ടികൾക്കായി സംഘടിപ്പിക്കുന്ന ഇൻക്ലൂസീവ് മത്സരങ്ങൾ മേളയുടെ മറ്റൊരു പ്രത്യേകതയാണ്. 26നാണ് ഈ മത്സരങ്ങൾ നടക്കുന്നത്. ഇൻക്ലൂസീവ് മത്സരങ്ങളിൽ 2,000ത്തിലധികം കായികതാരങ്ങൾ മാറ്റുരക്കും. മേളയുടെ വിജയകരമായ നടത്തിപ്പിനായി കുന്നമംഗലം എം.എൽ.എ. എം.എ. റസാഖ് മാസ്റ്ററുടെ നേതൃത്വത്തിൽ 17 സബ് കമ്മിറ്റികൾ പ്രവർത്തിച്ചുവരുന്നു. മത്സരങ്ങൾ കുറ്റമറ്റ രീതിയിൽ നിയന്ത്രിക്കുന്നതിനായി 620 ഒഫീഷ്യൽസിന്റെയും 140 സെലക്ടർമാരുടെയും 100 ടെക്നിക്കൽ ഒഫിഷ്യൽസിന്റെയും സേവനം ലഭ്യമാക്കിയിട്ടുണ്ട്.

കായികതാരങ്ങളുടെയും ടീം മാനേജർമാരുടെയും താമസത്തിനായി 50 സ്കൂളുകളിലായി ഏകദേശം 450 ക്ലാസ് മുറികൾ സജ്ജീകരിക്കുന്നുണ്ട്. ഭക്ഷണവിതരണത്തിനായി വിപുലമായ സൗകര്യങ്ങളാണ് ഒരുക്കിയിട്ടുള്ളത്. കുട്ടികൾക്ക് ഭക്ഷണം നൽകുന്നതിനായി പ്രധാനമായും രണ്ട് അടുക്കളകൾ പ്രവർത്തിക്കും. കൂടാതെ, എല്ലാ മത്സരവേദികളിലും കായികതാരങ്ങൾക്ക് ഭക്ഷണം കഴിക്കുന്നതിനായി പ്രത്യേക ഭക്ഷണശാലകളും സജ്ജീകരിക്കുന്നുണ്ട്. കുട്ടികളുടെ യാത്രാസൗകര്യത്തിനായി സ്കൂൾ ബസുകളും ക്രമീകരിച്ചിട്ടുണ്ട്.

2026ലെ സ്കൂൾ കായികമേളയുടെ ഭാഗ്യചിഹ്നമായ 'കുട്ടു'വിനെ രൂപകൽപന ചെയ്തത് കൊല്ലം ജില്ലയിലെ കെ.എൻ.എൻ.എം. എച്ച്.എസ്.എസ്. & വി.എച്ച്.എസ്.എസ്.-ലെ എട്ടാം ക്ലാസ് വിദ്യാർഥിനിയായ ആർ.എസ്. ലക്ഷ്മി നന്ദനയാണ്. ഏഷ്യയിലെ തന്നെ ഏറ്റവും വലിയ കൗമാര കായികതാരങ്ങളുടെ പോരാട്ടങ്ങളിലൊന്നായി മാറുന്ന മേളയിൽ ഗൾഫ് മേഖലയിൽ നിന്നുള്ള വിദ്യാർഥികളുടെ പങ്കാളിത്തവും ഉറപ്പാക്കിയിട്ടുണ്ട്. അത്‌ലറ്റിക്സ്, ഗെയിംസ് മത്സരങ്ങളിലായി 48 കായികതാരങ്ങളാണ് ഗൾഫ് മേഖലയിൽ നിന്ന് പങ്കെടുക്കുന്നത്. മേളക്ക് ആവേശമേകുന്ന സ്വർണക്കപ്പ് ഘോഷയാത്രയും ദീപശിഖാ പ്രയാണവും സംസ്ഥാനത്തിന്റെ വിവിധ ജില്ലകളിലൂടെ പര്യടനം നടത്തി ഒക്ടോബർ 25ന് കോഴിക്കോട്ടെത്തും.