താൽക്കാലിക നിയമനങ്ങൾ ഒരു വർഷത്തിന് ശേഷം സ്ഥിരപ്പെടുത്താൻ ശുപാർശയുമായി ബഹ്റൈൻ പാർലമെന്റ്
പ്രദീപ് പുറവങ്കര
മനാമ: സർക്കാർ സ്ഥാപനങ്ങളിൽ താൽക്കാലിക പാർട്ട് ടൈം കരാറുകളിൽ ജോലി ചെയ്യുന്ന പൗരന്മാരുടെ ദീർഘകാല അനിശ്ചിതത്വത്തിന് പരിഹാരം കാണാൻ ലക്ഷ്യമിട്ട് പാർലമെന്റ് സുപ്രധാന നിയമനിർമ്മാണത്തിനൊരുങ്ങുന്നു. ഒരു വർഷം പൂർത്തിയാകുന്ന മുറയ്ക്ക് ഇത്തരം താൽക്കാലിക ജീവനക്കാരുടെ തൊഴിൽ സ്ഥിതിയിൽ ഉചിതമായ നടപടികൾ സ്വീകരിക്കണമെന്ന് വ്യവസ്ഥ ചെയ്യുന്ന ഭേദഗതി ചൊവ്വാഴ്ച നടക്കുന്ന പാർലമെന്റ് സമ്മേളനം ചർച്ച ചെയ്യും.
2010-ലെ സിവിൽ സർവീസ് നിയമത്തിലെ ഏഴാം അനുച്ഛേദം ഭേദഗതി ചെയ്യുന്നതുമായി ബന്ധപ്പെട്ട ബില്ലിന് പാർലമെന്റിന്റെ നിയമകാര്യ സമിതി തത്വത്തിൽ അംഗീകാരം നൽകിയിട്ടുണ്ട്. സമിതി ചെയർമാൻ ഡോ. അബ്ദുൽഹക്കീം അൽ ഷെനോയാണ് ഇക്കാര്യം വ്യക്തമാക്കിയത്. താൽക്കാലിക ജോലി എന്ന അവസ്ഥ അനന്തമായി നീണ്ടുപോകുന്നത് ഒഴിവാക്കാനും ബഹ്‌റൈനി ജീവനക്കാർക്ക് മികച്ച തൊഴിൽ സുരക്ഷിതത്വം ഉറപ്പാക്കാനും ലക്ഷ്യമിട്ടാണ് ഈ മാറ്റമെന്ന് അദ്ദേഹം പറഞ്ഞു. എന്നാൽ, ബജറ്റിനെയും സാമ്പത്തിക സ്ഥിരതയെയും ബാധിക്കുമെന്ന കാരണത്താൽ സർക്കാർ ഈ നിർദ്ദേശത്തിനെതിരെ രംഗത്തു വന്നിട്ടുണ്ട്.
ഇതിനുപുറമെ, മുനിസിപ്പാലിറ്റീസ് അഫയേഴ്സ് ആൻഡ് അഗ്രികൾച്ചർ മന്ത്രാലയത്തിൽ താൽക്കാലിക കരാറുകളിൽ ജോലി ചെയ്യുന്ന മുഴുവൻ ബഹ്‌റൈനികളെയും സ്ഥിരപ്പെടുത്താനുള്ള മറ്റൊരു നിർദ്ദേശവും സമിതിയുടെ പരിഗണനയിലുണ്ട്. വർഷങ്ങളായി സേവനം അനുഷ്ഠിക്കുന്ന ദേശീയ പ്രതിഭകൾക്ക് ഇത് വലിയ ആശ്വാസമാകും. കൂടാതെ, സർക്കാർ സ്ഥാപനങ്ങളിൽ സെക്യൂരിറ്റി ഗാർഡ് തസ്തികകളിൽ ബഹ്‌റൈനി പൗരന്മാർക്ക് മുൻഗണന നൽകുന്ന മറ്റൊരു സുപ്രധാന പ്രമേയവും സഭയുടെ ചർച്ചയ്ക്ക് വരുന്നുണ്ട്. നിലവിൽ തന്നെ ഇത്തരം ജോലികളിൽ 98.5 ശതമാനവും സ്വദേശികളാണെന്ന് സർക്കാർ വ്യക്തമാക്കിയിട്ടുണ്ട്.
asdad
