സ്വകാര്യ മേഖലയിലെ സെക്യൂരിറ്റി ജോലികൾ സ്വദേശികൾക്ക് മാത്രം: പുതിയ കരട് നിയമം ബഹ്റൈനിൽ പാർലമെന്റിൽ

പ്രദീപ് പുറവങ്കര ‍

മനാമ: രാജ്യത്തെ സ്വകാര്യ സെക്യൂരിറ്റി തസ്തികകൾ ബഹ്‌റൈൻ പൗരന്മാർക്ക് മാത്രമായി പരിമിതപ്പെടുത്താൻ ലക്ഷ്യമിട്ടുള്ള നിർണ്ണായക കരട് നിയമം കൗൺസിൽ ഓഫ് റെപ്രസെന്റേറ്റീവ്‌സിന്റെ പരിഗണനയ്ക്ക് അയച്ചു. പ്രത്യേക സാഹചര്യങ്ങളിൽ മന്ത്രിതല തീരുമാനങ്ങൾക്ക് വിധേയമായി മാത്രമായിരിക്കും വിദേശികൾക്ക് താൽക്കാലികമായി ഈ മേഖലയിൽ ജോലി ചെയ്യാൻ ഇളവ് നൽകുക. സുരക്ഷാ കമ്പനികളുടെ പ്രവർത്തനം, ലൈസൻസിംഗ് എന്നിവ കൂടുതൽ കാര്യക്ഷമമാക്കാനും നിയമലംഘനങ്ങൾ തടയാനുമാണ് പുതിയ നിയമനിർമ്മാനം.

ആകെ 24 ആർട്ടിക്കിളുകളും ആമുഖവും അടങ്ങുന്നതാണ് ഈ കരട് നിയമം. വ്യക്തികളുടെ ജീവനും സ്വത്തിനും കൂടുതൽ സംരക്ഷണം ഉറപ്പാക്കുകയും സ്വകാര്യ സുരക്ഷാ മേഖലയെ ആധുനികീകരിക്കുകയുമാണ് ബില്ലിന്റെ പ്രധാന ലക്ഷ്യം. പുതിയ നിയമത്തിലെ ആർട്ടിക്കിൾ 2 പ്രകാരം ആഭ്യന്തര മന്ത്രാലയത്തിനായിരിക്കും സുരക്ഷാ സേവനങ്ങളുടെ മേൽനോട്ടം, ലൈസൻസിംഗ്, നിരീക്ഷണം എന്നിവയുടെ പൂർണ്ണ ചുമതല. എന്നാൽ വീട്ടുജോലിക്കാരായ ഗാർഡുകൾ, പോലീസ്, ബഹ്‌റൈൻ ഡിഫൻസ് ഫോഴ്സ്, നാഷണൽ ഗാർഡ്, നാഷണൽ ഇന്റലിജൻസ് ഏജൻസി തുടങ്ങിയ സംസ്ഥാന സുരക്ഷാ വിഭാഗങ്ങളുടെ പ്രവർത്തനങ്ങളെ ഇതിൽ നിന്ന് ഒഴിവാക്കിയിട്ടുണ്ട്.

ആർട്ടിക്കിൾ 3 പ്രകാരം ബഹ്‌റൈനിൽ രജിസ്റ്റർ ചെയ്ത വാണിജ്യ സ്ഥാപനങ്ങൾക്ക് മാത്രമേ സുരക്ഷാ ലൈസൻസ് നൽകുകയുള്ളൂ. സെക്യൂരിറ്റി ജീവനക്കാരാകുന്ന ബഹ്‌റൈനികൾക്ക് കുറഞ്ഞത് 18 വയസ്സ് തികഞ്ഞിരിക്കണം, ശാരീരികക്ഷമത ഉണ്ടായിരിക്കണം, ആവശ്യമായ വിദ്യാഭ്യാസ യോഗ്യതയും സദ്‌വൃത്ത സർട്ടിഫിക്കറ്റും നിശ്ചിത പരിശീലനവും പൂർത്തിയാക്കിയിരിക്കണം. കൂടാതെ, ലൈസൻസില്ലാതെ പണം, സ്വർണ്ണാഭരണങ്ങൾ, വിലപിടിപ്പുള്ള വസ്തുക്കൾ, രേഖകൾ എന്നിവ കടത്തുന്നതും വിലക്കിയിട്ടുണ്ട്. നിയമവിരുദ്ധമായി സുരക്ഷാ സേവനങ്ങൾ നൽകുന്നവർക്ക് തടവുശിക്ഷയ്ക്ക് പുറമേ 500 മുതൽ 5,000 ബഹ്‌റൈനി ദിനാർ വരെ പിഴയും ഒടുക്കേണ്ടി വരും.