അടിച്ച് തകർത്ത് ഉത്തപ്പയും വിഷ്ണുവും; ഡൽഹിയെ ആറ് വിക്കറ്റിന് തകര്ത്ത് കേരളം
മുംബൈ: സയിദ് മുഷ്താഖ് അലി ടി20യില് മുംബൈക്ക് പിന്നാലെ ഡൽഹിയേയും അടിച്ചോടിച്ച് കേരളം. ആറ് വിക്കറ്റിനാണ് കേരളത്തിന്റെ ത്രസിപ്പിക്കുന്ന ജയം. ഡൽഹി മുന്നോട്ടുവച്ച കൂറ്റന് വിജയലക്ഷ്യമായ 213 റണ്സ് റോബിന് ഉത്തപ്പ, വിഷ്ണു വിനോദ് എന്നിവരുടെ ബാറ്റിംഗ് വെടിക്കെട്ടില് ആറ് പന്ത് ബാക്കിനില്ക്കേ സ്വന്തമാക്കി. ഉത്തപ്പ 54 പന്തില് 95 റണ്സും വിഷ്ണു 38 പന്തില് 71* റണ്സും നേടി.
സ്കോർ: ഡൽഹി-212/4 (20), കേരളം-218/4 (19).
മറുപടി ബാറ്റിംഗില് കേരളത്തിന് തുടക്കത്തിലെ തിരിച്ചടി നേരിട്ടു. കഴിഞ്ഞ മത്സരത്തില് 54 പന്തില് 137 റണ്സുമായി ഹീറോയായ മുഹമ്മദ് അസ്ഹറുദ്ദീനെ ആദ്യ ഓവറില് കേരളത്തിന് നഷ്ടമായി. പേസര് ഇശാന്ത് ശര്മ്മയുടെ മൂന്നാം പന്തില് പുറത്താകുന്പോള് അസ്ഹറുദ്ദീൻ അക്കൗണ്ട് തുറന്നിരുന്നില്ല. മൂന്നാമനായി ക്രീസിലെത്തിയ സഞ്ജുവിനും നിരാശയായി മത്സരം. 10 പന്തില് 16 എടുത്ത സഞ്ജുവിനെ നാലാം ഓവറില് പ്രദീപ് സാങ്വാൻ റിട്ടേണ് ക്യാച്ചില് മടക്കുകയായിരുന്നു.
