ഇന്ത്യയിലെ കോവിഷീല്‍ഡ് വാക്സിന് സൗദിയില്‍ അംഗീകാരം
റിയാദ്: ഇന്ത്യയില്‍ വിതരണം ചെയ്യുന്ന കോവിഷീല്‍ഡ് വാക്സിന് സൗദിയിലെ ആസ്ട്രസെനെക വാക്സിന് തന്നെയെന്ന് സൗദി അധികൃതര്‍ അംഗീകരിച്ചതായി റിയാദ് ഇന്ത്യന്‍ എംബസി അറിയിച്ചു. ഇന്ത്യയിലും സൗദിയിലും ഒരേ വാക്സിന് രണ്ട് പേരുകളില്‍ അറിയപ്പെടുന്നത് വിവിധ ബുദ്ധിമുട്ടുകള്‍ ഉണ്ടാക്കിയിരുന്നു. ഇന്ത്യയില്‍ നിന്നും വാക്സിന് എടുത്തു സൗദിയിലേക്ക് യാത്രചെയ്യേണ്ട പ്രവാസികള്‍ക്ക് ലഭിച്ചിരുന്ന സര്‍ട്ടിഫിക്കറ്റില്‍ കോവിഷീല്‍ഡ് എന്ന് മാത്രം രേഖപ്പെടുത്തിയിരുന്നതിനാല്‍ അത്തരക്കാര്‍ സൗദിയിലെത്തിയാല്‍ ഒരാഴ്ചത്തെ ഇന്‍സ്റ്റിറ്റ്യൂഷണല്‍ ക്വാറന്റീന്‍ നിര്‍ബന്ധമായിരുന്നു. ഇതിന് പരിഹാരമെന്നോണം കേരളത്തില്‍ നിന്നും കോവിഷീല്‍ഡ് വാക്സിന് എടുക്കുന്ന പ്രവാസികളുടെ സര്‍ട്ടിഫിക്കറ്റില്‍ ആസ്ട്ര സെനെക എന്ന് കൂടി രേഖപ്പെടുത്തണമെന്ന കേരള സര്‍ക്കാരിന്റെ തീരുമാനത്തോടെ പ്രശ്‌നത്തിന് പരിഹാരം ആയിരുന്നു. എന്നാല്‍ മറ്റു സംസ്ഥാനങ്ങളില്‍ നിന്നുള്ള പ്രവാസികളുടെ സര്‍ട്ടിഫിക്കറ്റില്‍ നിലവില്‍ കോവിഷീല്‍ഡ് എന്ന് മാത്രമായിരുന്നു രേഖപ്പെടുത്തിയിരുന്നത്.
