ലോക ശുചീകരണ ദിനത്തിൽ മുന്നറിയിപ്പുമായി കണക്കുകൾ: ബഹ്റൈൻ തീരങ്ങളിൽ നിന്ന് നീക്കിയത് 62,000 കിലോഗ്രാം മാലിന്യം

പ്രദീപ് പുറവങ്കര

മനാമ: ലോക ശുചീകരണ ദിനത്തിന്റെ ഭാഗമായി പരിസ്ഥിതി സംരക്ഷണ പ്രവർത്തനങ്ങളുമായി ബഹ്റൈൻ. രാജ്യത്തെ പ്രധാന പരിസ്ഥിതി സംഘടനയായ 'ക്ലീനപ്പ് ബഹ്റൈൻ' 2018 മുതൽ ഇതുവരെയായി ബഹ്റൈനിലെ കടൽത്തീരങ്ങളിൽ നിന്ന് 62,000 കിലോഗ്രാമിലധികം മാലിന്യങ്ങളാണ് ശേഖരിച്ച് നീക്കം ചെയ്തത്. കടൽത്തീരങ്ങളിലെ പ്ലാസ്റ്റിക് മാലിന്യ ഭീഷണി എത്രത്തോളം രൂക്ഷമാണെന്ന് വ്യക്തമാക്കുന്നതാണ് ഈ കണക്കുകൾ.

'ശുചിത്വമുള്ള ഭക്ഷണപാത്രങ്ങളിൽ നിന്ന് ശുചിത്വമുള്ള നഗരങ്ങളിലേക്ക്' എന്ന സന്ദേശവുമായാണ് ഈ വർഷത്തെ ലോക ശുചീകരണ ദിനം ആചരിക്കുന്നത്. ഭക്ഷ്യാവശിഷ്ടങ്ങളും പ്ലാസ്റ്റിക്കും ഉൾപ്പെടെ ഒഴിവാക്കാവുന്ന മാലിന്യങ്ങൾ കുറയ്ക്കുകയാണ് ഈ ദിനം ലക്ഷ്യമിടുന്നത്. ദിനാചരണത്തിന്റെ ഭാഗമായി 'ക്ലീനപ്പ് ബഹ്റൈൻ' മൽകിയ ബീച്ചിൽ വൻ ശുചീകരണ ഡ്രൈവ് സംഘടിപ്പിച്ചു.

തീരങ്ങളിൽ ശേഖരിക്കപ്പെടുന്നതിൽ വലിയൊരു പങ്ക് പുനരുപയോഗിക്കാൻ കഴിയാത്ത പ്ലാസ്റ്റിക് കവറുകളും കട്ടിയുള്ള പ്ലാസ്റ്റിക്കുകളുമാണെന്ന് ക്ലീനപ്പ് ബഹ്റൈൻ ചെയർമാൻ അലി അൽ ഖസീർ വ്യക്തമാക്കി. ജനങ്ങളിൽ, പ്രത്യേകിച്ച് പുതിയ തലമുറയിൽ പരിസ്ഥിതി അവബോധം വളർത്തുകയാണ് സംഘടനയുടെ ലക്ഷ്യം.

അതേസമയം, റോട്ടറി ക്ലബ് ഓഫ് മനാമ 'ബഹ്റൈൻ അസോസിയേഷൻ ഫോർ പാരന്റ്സ് ആൻഡ് ഫ്രണ്ട്സ് ഓഫ് ദി ഡിസേബിൾഡ്' സംഘടനയുമായി ചേർന്ന് വേറിട്ടൊരു കാമ്പെയ്‌നും നടത്തുന്നുണ്ട്. ഉപയോഗിച്ച പ്ലാസ്റ്റിക് കുപ്പികൾ ശേഖരിച്ച് റീസൈക്ലിംഗിന് നൽകി ലഭിക്കുന്ന തുക ഉപയോഗിച്ച് ഭിന്നശേഷിക്കാരായ കുട്ടികൾക്ക് വീൽചെയറുകൾ നിർമ്മിച്ച് നൽകുന്നതാണ് ഈ പദ്ധതി. 2011-ൽ ആരംഭിച്ച ഈ പദ്ധതിയിലൂടെ ഇതുവരെ 25 കുട്ടികൾക്ക് പുതിയ വീൽചെയറുകൾ നൽകാനായി.

ബഹ്റൈനിലെ അസ്കർ ലാൻഡ്‌ഫില്ലിൽ പ്രതിവർഷം 14 ലക്ഷം ടണ്ണിലധികം ഗാർഹിക-വാണിജ്യ മാലിന്യങ്ങളാണ് എത്തുന്നതെന്നും ഇതിൽ ഭൂരിഭാഗവും പ്ലാസ്റ്റിക് കുപ്പികളാണെന്നും കണക്കുകൾ വ്യക്തമാക്കുന്നു. വ്യക്തിഗത തലത്തിൽ ഉപഭോഗം കുറയ്ക്കുന്നതിലൂടെയും പുനരുപയോഗം പ്രോത്സാഹിപ്പിക്കുന്നതിലൂടെയും മാത്രമേ ഈ വലിയ പാരിസ്ഥിതിക വെല്ലുവിളിയെ നേരിടാൻ കഴിയൂ എന്ന് പരിസ്ഥിതി പ്രവർത്തകർ ചൂണ്ടിക്കാണിക്കുന്നു.