ദോഹ അന്താരാഷ്ട്ര പുസ്തക മേളയ്ക്ക് ഇന്ന് തുടക്കമാകും
ദോഹ : 28ആമത് ദോഹ അന്താരാഷ്ട്ര പുസ്തക മേളയ്ക്ക് ഇന്ന് തുടക്കമാകും. ദോഹ എക്സിബിഷൻ ആൻഡ് കൺവെൻഷൻ സെന്ററിൽ നടക്കുന്ന മേളയിൽ ഇന്ത്യ ഉൾപ്പെടെ 29 അറബ്, വിദേശ രാജ്യങ്ങളിൽ നിന്നായി നാനൂറിലധികം പ്രസാധകർ പങ്കെടുക്കും. അറിവുള്ള സമൂഹത്തിന്റെ നേർക്ക് എന്ന പ്രമേയത്തിന്റെ അടിസ്ഥാനത്തിൽ കായിക- സാംസ്കാരിക മന്ത്രാലയമാണ് മേള നടത്തുന്നത്.
നിരവധി പ്രസാധകർ മേളയിൽ പങ്കെടുക്കാൻ സമീപിച്ചെങ്കിലും സ്ഥലപരിമിതി മൂലം എല്ലാ അപേക്ഷകളും സ്വീകരിക്കാൻ കഴിഞ്ഞില്ല. പതിവിൽ നിന്ന് വ്യത്യസ്തമായി പത്തുദിവസത്തെ മേള ഇത്തവണ ഏഴു ദിവസമായി ചുരുക്കിയിട്ടുണ്ട്. കുട്ടികളുടെ പുസ്തകങ്ങളുടെ 82 പ്രസാധകർ, 241 അറബ് പ്രസാധകർ, 26 വിദേശരാജ്യങ്ങളിലെ പ്രസാധകർ, 24 ഉന്നത പ്രതിനിധികൾ എന്നിവരാണ് മേളയിൽ പങ്കെടുക്കുന്നതെന്ന് മന്ത്രാലയത്തിലെ പൊതുവായനശാല- പൈതൃക വകുപ്പ് ഡയറക്ടർ ഇബ്രാഹിം അബ്ദുൽ റഹിം അൽ ബുഹാഷിം പറഞ്ഞു. മേഖലയിലെ ഏറ്റവുംവലിയ പുസ്തക മേളയിലൊന്നാണ് ദോഹയിലേത്. മൊത്തം 18,185 പുസ്തകങ്ങളാണ് മേളയിലുണ്ടാവുക.
പ്രസാധകരുടെ പേരുകളും പുസ്തകങ്ങളുടെ പേരും ഭാഷയും ഉൾപ്പെടെയുള്ള വിശദാംശങ്ങൾ നൽകുന്ന ഓൺലൈൻ ഗൈഡും മേളയിലുണ്ട്. ഓൺലൈൻ ഗൈഡിൽ അറബിക് ഭാഷയിൽ 67,084 പുസ്തകങ്ങളും വിദേശഭാഷയിലുള്ള 9,670 പുസ്തകങ്ങളുടെ വിവരങ്ങളുമാണുള്ളത്. പുസ്തകങ്ങൾക്ക് 25 ശതമാനം ഇളവുനൽകുന്നതിനായി പ്രദർശകരുമായി കരാറായിട്ടുണ്ടെന്നും അധികൃതർ പറഞ്ഞു. അറബ് രാജ്യങ്ങളിൽ ജോർദ്ദാൻ, ഒമാൻ, കുവൈത്ത് എന്നിവയും മഗ്രിബ് രാജ്യങ്ങളായ സുഡാൻ, ഇറാഖ്, സിറിയ, ലബനൻ തുടങ്ങിയ രാജ്യങ്ങളും അന്താരാഷ്ട്ര തലത്തിൽ ജർമനി, ഫ്രാൻസ്, ചൈന, ഇറാൻ, ഇന്ത്യ, മലേഷ്യ, തുർക്കി തുടങ്ങിയ രാജ്യങ്ങളും പുസ്തക മേളയിൽ പങ്കാളികളാകും.
