സ്ത്രീ വിരുദ്ധത; സിബിഎസ്ഇ പത്താം ക്ലാസ് ചോദ്യപേപ്പറിലെ വിവാദ ചോദ്യം പിൻവലിച്ചു
ന്യൂഡൽഹി: സിബിഎസ്ഇ പത്താം ക്ലാസ് ഇംഗ്ലീഷ് പരീക്ഷ ചോദ്യപേപ്പറിലെ വിവാദ ചോദ്യം പിൻവലിച്ചു. ചോദ്യപേപ്പറിൽ പ്രത്യക്ഷപ്പെട്ട ഖണ്ഡികയും അതുമായി ബന്ധപ്പെട്ട ചോദ്യങ്ങളുമാണ് പിൻവലിച്ചത്. ഈ ചോദ്യത്തിന്‍റെ മുഴുവൻ മാർക്കും വിദ്യാർഥികൾക്ക് നൽകുമെന്ന് സിബിഎസ്ഇ ബോർഡ് അറിയിച്ചു. ശനിയാഴ്ചയാണ് സിബിഎസ്ഇ പത്താംക്ലാസ് പരീക്ഷ നടന്നത്. സത്രീ − പുരുഷ സമത്വം ഇല്ലാതിരുന്ന കാലത്ത് കുടുംബത്തിലെ കുട്ടികൾക്ക് അച്ചടക്കം ഉണ്ടായിരുന്നു. ഭാര്യമാരുടെ വിമോചനം കുട്ടികളുടെ മേലുള്ള മാതാപിതാക്കളുടെ അധികാരം ഇല്ലാതാക്കി. സ്ത്രീ − പുരുഷ സമത്വം വന്നതോടെ കുടുംബത്തിന്‍റെ അധികാരി എന്ന സ്ഥാനത്തുനിന്ന് പുരുഷനെ താഴെയിറക്കിയതിലൂടെ ഭാര്യയും അമ്മയും കുടുംബത്തിന്‍റെ അച്ചടക്കം ഇല്ലാതാക്കി എന്നാണ് ചോദ്യപേപ്പറിലെ നിരീക്ഷണം.
സ്ത്രീ − പുരുഷ സമത്വം വന്നതോടെ കൗമാരക്കാരുടെ മേൽ രക്ഷിതാക്കൾക്ക് ആധിപത്യം ഇല്ലാതാകാൻ കാരണമായതായും ചോദ്യപേപ്പർ ചൂണ്ടിക്കാട്ടുന്നു. ചോദ്യപേപ്പറിലെ ഈ ഭാഗം സമൂഹമാധ്യമങ്ങളിൽ വൈറലാണ്. നിരവധി പേരാണ് ചോദ്യപേപ്പറിലെ സ്ത്രീവിരുദ്ധ പരമാർ‍ശത്തെ കുറിച്ച് സിബിഎസ്ഇ പരീക്ഷാ ബോർ‍ഡിൽ വിളിച്ച് വിയോജിപ്പ് രേഖപ്പെടുത്തിയത്.
