ഇന്ധനപ്രതിസന്ധി: 20,000 സർവീസുകൾ റദ്ദാക്കി ലുഫ്താൻസ; വ്യോമയാന മേഖലയിൽ കടുത്ത നിയന്ത്രണം

പ്രദീപ് പുറവങ്കര I അന്തർദേശീയം

ബെർലിൻ: ആഗോളതലത്തിൽ ഇന്ധനവില കുതിച്ചുയരുന്ന പശ്ചാത്തലത്തിൽ ഒക്ടോബർ മാസം വരെയുള്ള ഇരുപതിനായിരത്തോളം ഹ്രസ്വദൂര സർവീസുകൾ ജർമ്മൻ വിമാനക്കമ്പനിയായ ലുഫ്താൻസ റദ്ദാക്കി. ഇറാൻ യുദ്ധത്തെത്തുടർന്ന് ഊർജ്ജ വിതരണത്തിന്റെ പ്രധാന പാതയായ ഹോർമുസ് കടലിടുക്ക് അടച്ചതോടെ വിമാന ഇന്ധനവില ഇരട്ടിയായതാണ് കമ്പനിയെ ഇത്തരമൊരു തീരുമാനത്തിലേക്ക് നയിച്ചത്.

ഈ നീക്കത്തിലൂടെ ഏകദേശം 40,000 മെട്രിക് ടണ്ണിലധികം ഇന്ധനം ലാഭിക്കാൻ കഴിയുമെന്ന് ലുഫ്താൻസ അധികൃതർ വ്യക്തമാക്കി. തിങ്കളാഴ്ച മുതൽ തന്നെ ആദ്യഘട്ടമെന്ന നിലയിൽ 120 സർവീസുകൾ റദ്ദാക്കിത്തുടങ്ങി. ഫ്രാങ്ക്ഫർട്ട്, മ്യൂണിക്ക്, സൂറിച്ച്, വിയന്ന, ബ്രസ്സൽസ്, റോം എന്നിവിടങ്ങളിലെ പ്രധാന വിമാനത്താവളങ്ങളെയാണ് ഈ തീരുമാനം ഏറ്റവുമധികം ബാധിക്കുക.

ലുഫ്താൻസയുടെ കീഴിലുള്ള സിറ്റിലൈൻ (Cityline) കമ്പനിയുടെ 27 വിമാനങ്ങൾ നേരത്തെ നിശ്ചയിച്ചതിലും മുൻപേ സർവീസിൽ നിന്ന് നീക്കം ചെയ്യാൻ കഴിഞ്ഞ ആഴ്ച തീരുമാനിച്ചിരുന്നു. ലാഭകരമല്ലാത്ത ഹ്രസ്വദൂര യാത്രകൾ കുറച്ചുകൊണ്ട് പ്രതിസന്ധി മറികടക്കാനാണ് കമ്പനി ലക്ഷ്യമിടുന്നത്. വരും മാസങ്ങളിലെ പുതുക്കിയ വിമാന സമയക്രമം ഏപ്രിൽ അവസാനമോ മെയ് ആദ്യമോ പ്രസിദ്ധീകരിക്കും. യാത്രക്കാർക്ക് ആവശ്യമായ മുൻകൂർ അറിയിപ്പുകൾ നൽകിയിട്ടുണ്ടെന്നും വരും ആഴ്ചകളിലേക്കുള്ള ഇന്ധനശേഖരം നിലവിലുണ്ടെന്നും കമ്പനി അറിയിച്ചു.

ലുഫ്താൻസയ്ക്ക് പുറമെ മറ്റ് യൂറോപ്യൻ വിമാനക്കമ്പനികളും സമാനമായ നിയന്ത്രണങ്ങൾ ഏർപ്പെടുത്തിയിട്ടുണ്ട്. സ്കാൻഡിനേവിയൻ എയർലൈൻസ് (SAS) ആയിരത്തോളം സർവീസുകൾ റദ്ദാക്കി. എയർ ഫ്രാൻസ്-കെഎൽഎം ഗ്രൂപ്പ് ദീർഘദൂര യാത്രകൾക്ക് 100 യൂറോ അധിക ചാർജ് ഈടാക്കിത്തുടങ്ങിയിട്ടുണ്ട്.

ഇറാൻ യുദ്ധത്തെത്തുടർന്നുണ്ടായ രൂക്ഷമായ ഊർജ്ജപ്രതിസന്ധി പരിഹരിക്കുന്നതിനായി യൂറോപ്യൻ കമ്മീഷൻ 'ആക്‌സിലറേറ്റ് യു' (AccelerateEU) എന്ന പേരിൽ പുതിയ പദ്ധതി പ്രഖ്യാപിക്കാനിരിക്കുകയാണ്. ഇന്ധനലഭ്യത ഉറപ്പാക്കാനും സാമ്പത്തിക ആഘാതം കുറയ്ക്കാനുമുള്ള നിർദ്ദേശങ്ങൾ ഇതിലുണ്ടാകുമെന്നാണ് റിപ്പോർട്ടുകൾ സൂചിപ്പിക്കുന്നത്.