ബിനാമി ഇടപാടുകൾക്കും കമ്പനി കെടുകാര്യസ്ഥതയ്ക്കും കടുപ്പമേറും; പുതിയ നിയമഭേദഗതി ബഹ്റൈൻ പാർലമെന്റിൽ
പ്രദീപ് പുറവങ്കര I ബഹ്റൈൻ
മനാമ: കമ്പനികളുടെ മറവിൽ നിന്ന് തീരുമാനങ്ങൾ എടുക്കുന്നവർക്കും ബിനാമി ഇടപാടുകാർക്കും വ്യക്തിപരമായ ബാധ്യത ഉറപ്പാക്കുന്ന പുതിയ നിയമഭേദഗതി ബഹ്റൈൻ പാർലമെന്റ് ചൊവ്വാഴ്ച ചർച്ച ചെയ്യും. ഔദ്യോഗിക പദവികൾ വഹിച്ചില്ലെങ്കിലും കമ്പനിയുടെ നടത്തിപ്പിൽ നിർണ്ണായക സ്വാധീനം ചെലുത്തുന്ന വ്യക്തികളെ നിയമലംഘനങ്ങൾക്ക് ഉത്തരവാദികളാക്കാൻ ലക്ഷ്യമിട്ടുള്ളതാണ് 2025-ലെ 38-ാം നമ്പർ ഡിക്രി നിയമം.
വാണിജ്യ കമ്പനി നിയമത്തിൽ വരുത്തുന്ന ഈ ഭേദഗതിയിലൂടെ കോർപ്പറേറ്റ് സുതാര്യത വർദ്ധിപ്പിക്കാനാണ് സർക്കാർ ലക്ഷ്യമിടുന്നത്. നടക്കാനിരിക്കുന്ന ഫിനാൻഷ്യൽ ആക്ഷൻ ടാസ്ക് ഫോഴ്സ് പരിശോധനയ്ക്ക് മുന്നോടിയായി നിയമങ്ങളിലെ പഴുതുകൾ അടയ്ക്കുക എന്നതും ഇതിന്റെ ലക്ഷ്യമാണ്. ഗുരുതരമായ വീഴ്ചകൾ, നിയമലംഘനങ്ങൾ, ദുരുപയോഗം എന്നിവയുണ്ടായാൽ ബോർഡ് അംഗങ്ങൾക്കും മാനേജർമാർക്കും പുറമെ കമ്പനിയെ യഥാർത്ഥത്തിൽ നിയന്ത്രിക്കുന്ന വ്യക്തികൾക്കും വ്യക്തിപരമായ ബാധ്യതയുണ്ടായിരിക്കും.
വാണിജ്യ രജിസ്റ്ററിൽ രേഖപ്പെടുത്താത്ത 'മൊഹാസ' (Mohassa) കമ്പനികൾക്കും പുതിയ നിയമം കർശന നിയന്ത്രണം ഏർപ്പെടുത്തും. നിലവിലുള്ള ഇത്തരം സ്ഥാപനങ്ങൾ മൂന്ന് മാസത്തിനുള്ളിൽ നിയമപരമായ പദവി ശരിയാക്കണം. നിയമം പ്രാബല്യത്തിൽ വരുന്നതോടെ പുതിയ കരാറുകൾ രജിസ്റ്റർ ചെയ്യുന്നതിൽ നിന്ന് നോട്ടിറികളെ വിലക്കും. കൂടാതെ, കമ്പനി യോഗങ്ങളും വോട്ടിംഗും ഡിജിറ്റൽ സംവിധാനത്തിലേക്ക് മാറുന്നതിനും ഏകാംഗ ജോയിന്റ് സ്റ്റോക്ക് കമ്പനികൾ ആരംഭിക്കുന്നതിനും ഭേദഗതി അനുമതി നൽകുന്നുണ്ട്. കമ്പനികളുടെ യഥാർത്ഥ നിയന്ത്രണം കയ്യാളുന്നവർക്ക് നിയമത്തിൽ നിന്ന് ഒഴിഞ്ഞുമാറാൻ കഴിയില്ലെന്ന് വാണിജ്യ മന്ത്രാലയം വ്യക്തമാക്കി.
ssd
