കാരുണ്യത്തിൻ്റെ തണലൊരുക്കി 'പാപ്പാ സ്വപ്നഭവനം'; താക്കോൽദാനം നിർവഹിച്ചു
പ്രദീപ് പുറവങ്കര / മനാമ
ബഹ്റൈനിലെ പ്രമുഖ പ്രവാസി സംഘടനയായ പത്തനംതിട്ട ജില്ലാ പ്രവാസി അസോസിയേഷൻ ബഹ്റൈൻ (പാപ്പാ) നിർമ്മിച്ചു നൽകിയ 'സ്വപ്നഭവനം 2025' പദ്ധതിയുടെ താക്കോൽദാനം നടന്നു. കോന്നി മെഡിക്കൽ കോളേജിന് സമീപം നിർമ്മിച്ച വീടിന്റെ താക്കോൽദാന കർമ്മം അഡ്വ. കെ.യു. ജനീഷ് കുമാർ എം.എൽ.എ നിർവഹിച്ചു. ബഹ്റൈനിൽ ഗാർഹിക ജോലിക്കാരിയായി ജോലി ചെയ്യുന്ന നിർദ്ധനയായ പ്രവാസി സഹോദരിക്കാണ് സംഘടനയുടെ നേതൃത്വത്തിൽ വീട് ഒരുക്കി നൽകിയത്.
പ്രവാസ ലോകത്തെ സുമനസ്സുകളുടെ അകമഴിഞ്ഞ സഹായത്തോടെയാണ് പത്തനംതിട്ട ജില്ലാ പ്രവാസി അസോസിയേഷൻ ഈ കാരുണ്യപദ്ധതി യാഥാർത്ഥ്യമാക്കിയത്. സ്വന്തമായി ഒരു വീടെന്ന സഹപ്രവർത്തകയുടെ വലിയ സ്വപ്നം സാക്ഷാത്കരിക്കാൻ കഴിഞ്ഞതിന്റെ ചാരിതാർത്ഥ്യത്തിലാണ് സംഘടനയുടെ പ്രവർത്തകർ. ബഹ്റൈനിലെ പ്രവാസികൾക്കിടയിൽ സജീവമായ ജീവകാരുണ്യ പ്രവർത്തനങ്ങൾ നടത്തുന്ന 'പാപ്പ'യുടെ ഏറ്റവും ശ്രദ്ധേയമായ പദ്ധതികളിലൊന്നാണ് ഈ സ്വപ്നഭവനം.
ചടങ്ങിൽ അസോസിയേഷൻ പ്രസിഡന്റ് വിഷ്ണു വി., ജനറൽ സെക്രട്ടറി സുനു കുരുവിള, സീനിയർ എക്സിക്യൂട്ടീവ് അംഗങ്ങളായ മോനി ഒടികണ്ടത്തിൽ, ഷീലു വർഗീസ് എന്നിവർ പങ്കെടുത്തു. അസോസിയേഷൻ ഭാരവാഹികൾക്കൊപ്പം നാട്ടിലെ സാമൂഹിക-രാഷ്ട്രീയ രംഗത്തെ പ്രമുഖരും ചടങ്ങിൽ സന്നിഹിതരായിരുന്നു.
sfsfd
