മൈക്രോസോഫ്റ്റിന് ഇസ്രായേൽ സൈന്യവുമായി അടുത്ത ബന്ധം; ഗസ്സ വംശഹത്യയിൽ പങ്കുവഹിച്ചതിന് നിയമനടപടിക്ക് മനുഷ്യാവകാശ സംഘടനകൾ

ഷീബ വിജയ൯

ഗസ്സയിൽ ഇസ്രായേൽ നടത്തിയ വംശഹത്യയിൽ മൈക്രോസോഫ്റ്റിന് പങ്കുണ്ടെന്ന ഗുരുതര ആരോപണവുമായി നിയമനടപടിക്കൊരുങ്ങി മനുഷ്യാവകാശ സംഘടനകൾ. ഗസ്സയിൽ ഉപയോഗിക്കുമെന്ന് അറിഞ്ഞുകൊണ്ടുതന്നെ ഇസ്രായേൽ സൈന്യത്തിന് സാങ്കേതികവിദ്യ കൈമാറുന്നതിലൂടെ യുദ്ധക്കുറ്റങ്ങൾ, മനുഷ്യരാശിക്കെതിരായ കുറ്റകൃത്യങ്ങൾ, വംശഹത്യ എന്നിവയെ സഹായിക്കുകയും പ്രോത്സാഹിപ്പിക്കുകയും ചെയ്തതായി ആരോപിച്ച് നിയമ-മനുഷ്യാവകാശ സംഘടനകളുടെ കൂട്ടായ്മ ടെക് ഭീമന് നോട്ടീസ് നൽകി.

സെന്റർ ഫോർ കോൺസ്റ്റിറ്റ്യൂഷണൽ റൈറ്റ്സ്, ആവാസ്, ഗ്ലാൻ, യൂറോപ്യൻ ലീഗൽ സപ്പോർട്ട് സെന്റർ എന്നിവയുൾപ്പെടെയുള്ള ഗ്രൂപ്പുകളാണ് നോട്ടീസ് നൽകിയത്. അന്താരാഷ്ട്ര-ആഭ്യന്തര നിയമപ്രകാരം സിവിൽ-ക്രിമിനൽ ബാധ്യതകൾക്ക് വിധേയരാകാനുള്ള സാധ്യതയെക്കുറിച്ച് മൈക്രോസോഫ്റ്റിനും അതിൻ്റെ മുതിർന്ന എക്സിക്യൂട്ടീവുകൾക്കും മുന്നറിയിപ്പ് നൽകിയിട്ടുണ്ട്.

‘ഇസ്രായേൽ സൈന്യത്തിന് സാങ്കേതികവിദ്യയും സേവനങ്ങളും നൽകുന്നതിലൂടെ, ഇസ്രായേലിൻ്റെ ഗുരുതരമായ കുറ്റകൃത്യങ്ങളിൽ മൈക്രോസോഫ്റ്റ് നേരിട്ട് പങ്കുവഹിച്ചുവെന്ന് വിശ്വസിക്കാൻ ന്യായവും വിശ്വസനീയവുമായ ഒരു അടിസ്ഥാനമുണ്ട്’ എന്ന് നോട്ടീസിൽ പറയുന്നു. മൈക്രോസോഫ്റ്റിൻ്റെ 'ക്ലൗഡ് കമ്പ്യൂട്ടിങ്ങും' 'എ.ഐ. സേവനങ്ങളും' ഇസ്രായേലിൻ്റെ ബഹുജന നിരീക്ഷണത്തിലും ലക്ഷ്യമിടൽ ഉപകരണത്തിലും എങ്ങനെ സംയോജിപ്പിച്ചിരിക്കുന്നുവെന്നും ഇത് വിശദീകരിക്കുന്നു. ഫലസ്തീനികളുടെ കൂട്ട നിരീക്ഷണത്തിന് ഉപയോഗിച്ച ഇസ്രായേലിൻ്റെ 'യൂനിറ്റ് 8200' ന് മൈക്രോസോഫ്റ്റ് നടത്തിയ പ്രവർത്തനമാണ് ഏറ്റവും ഭയാനകമായ വെളിപ്പെടുത്തലുകളിൽ ഒന്ന്. മൈക്രോസോഫ്റ്റ് എഞ്ചിനീയർമാർ 11,500 ടെറാബൈറ്റിലധികം തടഞ്ഞ ഫലസ്തീൻ ഫോൺകോളുകളും ഡാറ്റയും സംഭരിക്കാൻ ഉപയോഗിക്കുന്ന ഒരു ഇഷ്ടാനുസൃത 'ക്ലൗഡ് പ്ലാറ്റ്‌ഫോം' നിർമിച്ചു നൽകി. ഇത് വ്യോമാക്രമണങ്ങൾക്കായി 'കിൽ ലിസ്റ്റുകൾ' വികസിപ്പിക്കാൻ സഹായിക്കുന്നു.

ഇസ്രായേൽ പ്രതിരോധ മന്ത്രാലയത്തിന് ആയിരക്കണക്കിന് മണിക്കൂർ എഞ്ചിനീയറിങ് സഹായവും ടെക് ഭീമൻ നൽകി. കൂടാതെ അവരുടെ സേവനങ്ങൾ പ്രധാന സൈനിക യൂനിറ്റുകളെയും ആപ്ലിക്കേഷനുകളെയും ശക്തിപ്പെടുത്തി. ഇസ്രായേലി സൈനിക പ്രവർത്തനങ്ങളുമായുള്ള കമ്പനിയുടെ കൂട്ടുകെട്ട് അവസാനിപ്പിക്കണമെന്ന് മനുഷ്യാവകാശ സംഘങ്ങൾ അതിൻ്റെ ഓഹരി പങ്കാളികളോട് ആവശ്യപ്പെടുന്നു.