നവകേരള സദസ്: സുരക്ഷയൊരുക്കിയ പോലീസുകാര്ക്ക് ഗുഡ് സര്വീസ് എന്ട്രി നൽകും
നവകേരള സദസിന് സുരക്ഷയൊരുക്കിയ പോലീസുകാര്ക്ക് ഗുഡ് സര്വീസ് എന്ട്രി നല്കും. ഇതിനായി സദസില് നല്ല പ്രകടനം കാഴ്ചവച്ച സിവില് പോലീസ് ഓഫീസര്മാര് മുതല് ഐജി വരെയുള്ള റാങ്കുകളിലുള്ള ഉദ്യോഗസ്ഥരുടെ പേരുകള് ശിപാര്ശ ചെയ്യാന് ക്രമസമാധാനച്ചുമതലയുള്ള എഡിജിപി എം.ആര്.അജിത്കുമാര് നിര്ദേശം നല്കി. ഐജി, ഡിഐജി, എസ്പി റാങ്കിലുള്ള ഉദ്യോഗസ്ഥര്ക്കാണ് എഡിജിപി ഇതുസംബന്ധിച്ച നിര്ദേശം നല്കിയിരിക്കുന്നത്. സ്തുത്യര്ഹ സേവനം കാഴ്ച്ചവച്ച ആരെങ്കിലും ഉണ്ടെങ്കില് ആ പേരുകള് പ്രത്യേകം ശിപാര്ശ ചെയ്യണം. അവര്ക്ക് ഉന്നത ഉദ്യോഗസ്ഥര് നേരിട്ട് ഗുഡ് സര്വീസ് എന്ട്രി നല്കും. നവകേരളസദസ് പോലീസ് നല്ല രീതിയില് കൈകാര്യം ചെയ്തെന്ന് വിലയിരുത്തലിന്റെ അടിസ്ഥാനത്തിലാണ് എഡിജിപിയുടെ നടപടി.
മികച്ച കുറ്റാന്വേഷണം, അസാധാരണ സാഹചര്യങ്ങള് കാര്യക്ഷമമായി നേരിടുക തുടങ്ങിയവയ്ക്കാണ് സാധാരണഗതിയില് പോലീസിന് ഗുഡ് സര്വീസ് എന്ട്രി പോലുള്ള ആദരം നല്കാറുള്ളത്. ശബരിമലയിലെ തിരക്ക് നിയന്ത്രിച്ച പോലീസുകാര്ക്കും സീസണ് കഴിയുമ്പോള് ഈ ആദരം നല്കാറുണ്ട്. ഈ ഗണത്തിലേക്കാണ് നവകേരള സദസിനെയും ഉള്പ്പെടുത്തിയിരിക്കുന്നത്. 140 മണ്ഡലങ്ങളിലായി നടന്ന നവകേരള സദസില് പലയിടത്തും പ്രതിഷേധക്കാരും പലയിടത്തും പോലീസും തമ്മില് സംഘര്ഷമുണ്ടായിരുന്നു. ഡിവൈഎഫ്ഐക്കാര് പ്രതിഷേധക്കാരെ മര്ദിച്ചപ്പോള് പോലീസ് നോക്കിനിന്നെന്നും ആരോപണം ഉയര്ന്നിരുന്നു. ഈ സാഹചര്യത്തില് പോലീസുകാര്ക്ക് ഗുഡ് സര്വീസ് എന്ട്രി നല്കാനുള്ള തീരുമാനത്തിനെതിരേ വ്യാപക വിമര്ശനം ഉയരുന്നുണ്ട്.
dsdfdfdfsdfsdfs