'ഹരിത'യുടെ പരാതിയില് നടപടി; എം.എസ്.എഫ് നേതാക്കളെ സസ്പെന്ഡ് ചെയ്യും
ഹരിത നേതാക്കളുടെ പരാതിയില് എം.എസ്.എഫ് നേതാക്കള്ക്കെതിരെ നടപടി. ആരോപണവിധേയരായ എം.എസ്.എഫ് സംസ്ഥാന പ്രസിഡന്റ് പി.കെ നവാസ് ഉള്പ്പടെയുള്ള നേതാക്കളെ സസ്പെന്ഡ് ചെയ്യാന് തീരുമാനമായി. പ്രശ്നപരിഹാരത്തിനായി മുസ്ലിം ലീഗ് വിളിച്ച യോഗത്തില് ഹരിത വിഭാഗവും പി.കെ നവാസ് പക്ഷവും നിലപാടില് ഉറച്ചു നില്ക്കുകയായിരുന്നു. നേതാക്കള്ക്കെതിരെ നടപടി വേണമെന്നും, കുറ്റക്കാര് മാപ്പു പറയണമെന്നും ഹരിത ആവശ്യപ്പെട്ടു. പ്രശ്നം നീട്ടികൊണ്ടു പോകാന് സാധിക്കില്ലെന്നും ഉടന് പരിഹാരമുണ്ടാക്കി എല്ലാം അവസാനിപ്പിക്കണമെന്ന് ലീഗ് നേതൃത്വവും നിലപാട് എടുക്കുകയായിരുന്നു. ആരോപണ വിധേയരായ നേതാക്കളെ ഒരു മാസത്തേക്ക് സസ്പെന്ഡ് ചെയ്യുകയും അവര് പരസ്യമായി മാപ്പു പറയുകയും വേണമെന്നായിരുന്നു ഹരിതയുടെ ആവശ്യം. മാപ്പു പറയുന്നതില് തുടക്കത്തില് എതിര്പ്പ് പ്രകടിപ്പിച്ച പി.കെ നവാസ്, നേതൃത്വം മുന്നോട്ടുവെക്കുന്ന ആവശ്യം അംഗീകരിക്കുമെന്ന് പിന്നീട് വ്യക്തമാക്കുകയായിരുന്നു.
