ദേശീയപാതയിൽ കാറും സ്കൂട്ടറും കൂട്ടിയിടിച്ച് അപകടം: മലപ്പുറത്ത് സഹോദരങ്ങൾ മരിച്ചു
ശാരിക
മലപ്പുറം: ദേശീയപാതയിലുണ്ടായ ദാരുണമായ വാഹനാപകടത്തിൽ സഹോദരങ്ങളായ യുവാവും യുവതിയും മരിച്ചു. തൃശ്ശൂർ-കോഴിക്കോട് ദേശീയപാതയിൽ കൊളപ്പുറത്തിനടുത്ത് വി.കെ. പടിയിൽ വൈകിട്ട് ആറോടെയാണ് സ്കൂട്ടറും കാറും കൂട്ടിയിടിച്ച് അപകടമുണ്ടായത്. കോട്ടക്കൽ പൊന്മള പള്ളാനിപറമ്പ് പിടക്കോഴി വീട്ടിൽ പി.കെ. ജിസ്മിന സുലൈമാൻ (23), സഹോദരൻ പി.കെ. ജിബിൻ സുലൈമാൻ (19) എന്നിവരാണ് മരണപ്പെട്ടത്.
അപകടത്തിൽ ഗുരുതരമായി പരിക്കേറ്റ ഇരുവരെയും ഉടൻ തന്നെ കോട്ടക്കലിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഒരുമിച്ച് യാത്ര ചെയ്യുന്നതിനിടെയുണ്ടായ അപകടത്തിൽ രണ്ട് വളർന്നുവരുന്ന ജീവനുകൾ പൊലിഞ്ഞതിന്റെ ഞെട്ടലിലും തീരാദുഃഖത്തിലുമാണ് ബന്ധുക്കളും നാടൊട്ടുക്കും.
മരിച്ച ജിസ്മിന മഅദിൻ പബ്ലിക് സ്കൂളിലെ പ്രീ-കെ.ജി അധ്യാപികയായി സേവനമനുഷ്ഠിച്ചു വരികയായിരുന്നു. ജിബിൻ രാമപുരം ജെംസ് കോളജിലെ ഒന്നാം വർഷ ബി.സി.എ വിദ്യാർഥിയാണ്.
ദേശീയപാതയിൽ തുടർച്ചയായി ഉണ്ടാകുന്ന അപകടങ്ങൾ പ്രദേശവാസികളിൽ വലിയ ആശങ്ക സൃഷ്ടിക്കുമ്പോഴാണ്, വി.കെ. പടിയിലുണ്ടായ ഈ ദുരന്തം ഒരു കുടുംബത്തിലെ രണ്ട് പ്രതീക്ഷകളെ കവർന്നെടുത്തത്.
്ോേ്
