കീം ഫലപ്രഖ്യാപനം മാറ്റിവെച്ചു ; സിബിഎസ്ഇ പുനർമൂല്യനിർണയ മാർക്കും പരിഗണിക്കും
ഷീബ വിജയൻ
തിരുവനന്തപുരം: ഇന്ന് നടത്താനിരുന്ന കീം (KEAM) പരീക്ഷാ ഫല പ്രഖ്യാപനം താത്കാലികമായി മാറ്റിവെച്ചു. സിബിഎസ്ഇ പ്ലസ് ടു പുനർമൂല്യനിർണ്ണയ മാർക്ക് കൂടി കൃത്യമായി പരിഗണിച്ചുകൊണ്ട് റാങ്ക് ലിസ്റ്റ് പുനഃക്രമീകരിച്ച ശേഷമായിരിക്കും പുതിയ തീയതിയിൽ ഫലപ്രഖ്യാപനം നടത്തുകയെന്ന് അധികൃതർ വ്യക്തമാക്കി. സിബിഎസ്ഇ പ്ലസ് ടു പുനർമൂല്യനിർണ്ണയ പരീക്ഷാ ഫലം കഴിഞ്ഞദിവസം രാത്രിയോടെയാണ് ഔദ്യോഗികമായി പ്രഖ്യാപിച്ചത്.
പുനർമൂല്യനിർണ്ണയ ഫലം വരാൻ വൈകിയ സാഹചര്യത്തിൽ മാർക്ക് വിവരങ്ങൾ ഓൺലൈനായി സമർപ്പിക്കുന്നതിനുള്ള അവസാന തീയതി നീട്ടിനൽകണമെന്ന് ആവശ്യപ്പെട്ട് നിരവധി വിദ്യാർത്ഥികളും രക്ഷിതാക്കളും കടുത്ത ആശങ്ക അറിയിച്ചിരുന്നു. ഇതിന്റെ അടിസ്ഥാനത്തിൽ വിദ്യാർത്ഥികളുടെ ഭാവിയെക്കരുതി ആവശ്യമായ അടിയന്തര നടപടി സ്വീകരിക്കാൻ ഉന്നത വിദ്യാഭ്യാസ മന്ത്രി പ്രവേശന പരീക്ഷാ കമ്മീഷണർക്ക് കർശന നിർദേശം നൽകുകയായിരുന്നു. ഈ നിർദേശത്തിന്റെ പശ്ചാത്തലത്തിലാണ് ഇപ്പോൾ ഫലപ്രഖ്യാപനം മാറ്റിവെക്കാൻ തീരുമാനിച്ചത്. പരീക്ഷ എഴുതിയ എല്ലാ വിദ്യാർത്ഥികൾക്കും തുല്യമായ അവസരം ഉറപ്പുവരുത്തുകയാണ് സർക്കാർ ഇതിലൂടെ ലക്ഷ്യം വെക്കുന്നതെന്ന് മന്ത്രി വ്യക്തമാക്കുകയുണ്ടായി. പുതുക്കിയ ഫലപ്രഖ്യാപന തീയതിയും മാർക്ക് സമർപ്പിക്കേണ്ട അവസാന സമയവും പ്രവേശന പരീക്ഷാ കമ്മീഷണർ ഉടൻ തന്നെ ഔദ്യോഗികമായി പ്രഖ്യാപിക്കും.
sdvdsdsdsdsa
