കേരള നിയമസഭാ തെരഞ്ഞെടുപ്പ് ആവേശകരമായ അന്ത്യഘട്ടത്തിലേക്ക്; കലാശക്കൊട്ട് നാളെ
ഷീബ വിജയൻ
കേരളത്തിന്റെ ഭരണസാരഥ്യം ആര് ഏറ്റെടുക്കുമെന്ന് തീരുമാനിക്കാനുള്ള വോട്ടെടുപ്പിന് ഇനി മൂന്ന് ദിവസങ്ങൾ മാത്രം ബാക്കിനിൽക്കെ, സംസ്ഥാനത്ത് പരസ്യപ്രചാരണം ഉച്ചസ്ഥായിയിലെത്തിയിരിക്കുകയാണ്. വോട്ടർമാരുടെ മനസ്സ് കീഴടക്കാനുള്ള അവസാനവട്ട ശ്രമത്തിലാണ് മുന്നണികളെല്ലാം. പരസ്യപ്രചാരണത്തിന് വിരാമമിട്ടുകൊണ്ടുള്ള ആവേശകരമായ കലാശക്കൊട്ട് നാളെ നടക്കും.
പ്രമുഖ ദേശീയ നേതാക്കളുടെ സാന്നിധ്യം കൊണ്ട് ഇന്നത്തെ പ്രചാരണ രംഗം സജീവമാണ്. രാഹുൽ ഗാന്ധിയും പ്രിയങ്ക ഗാന്ധിയും ഇന്ന് വടക്കൻ കേരളത്തിലെ വിവിധ മണ്ഡലങ്ങളിൽ വോട്ടഭ്യർത്ഥിക്കും. കൊല്ലത്ത് രേവന്ത് റെഡ്ഡി നയിക്കുന്ന റോഡ് ഷോയും നിശ്ചയിച്ചിട്ടുണ്ട്. കേന്ദ്രമന്ത്രി അമിത് ഷാ കേരളത്തിൽ തുടരുന്നതിനൊപ്പം, കേന്ദ്രമന്ത്രി ശിവരാജ് സിംഗ് ചൗഹാൻ ഇന്ന് പാലക്കാട് എത്തും.
ഭരണത്തുടർച്ച ലക്ഷ്യമിടുന്ന ഇടതുമുന്നണി ഇന്ന് സർക്കാരിന്റെ പ്രോഗ്രസ് റിപ്പോർട്ട് പ്രകാശനം ചെയ്യും. വൈകുന്നേരം മൂന്ന് മണിക്ക് പെരളശ്ശേരിയിൽ മുഖ്യമന്ത്രി പിണറായി വിജയന്റെ റോഡ് ഷോ നടക്കും. അതേസമയം, കണ്ണൂരിൽ ബിജെപി പ്രവർത്തകന്റെ വീടിന് നേരെ മുഖംമൂടി ധരിച്ചെത്തിയവർ ബോംബെറിഞ്ഞത് ആശങ്കയ്ക്ക് ഇടയാക്കിയിട്ടുണ്ട്. ഈ അനിഷ്ട സംഭവങ്ങൾക്കിടയിലും തങ്ങളുടെ വോട്ടുകൾ ഉറപ്പിക്കാനുള്ള കഠിന പ്രയത്നത്തിലാണ് രാഷ്ട്രീയ പാർട്ടികൾ.
േ്്േ്േ
