വീചാറ്റിനും ടിക്ടോക്കിനും എതിരെയുള്ള നിയമ നടപടി നിർത്തിവെച്ച് യു.എസ്
വാഷിംഗ്ടൺ: അമേരിക്കയിൽ നിരോധന ഭീഷണി നേരിട്ട ചൈനീസ് ആപ്പുകളായ വീചാറ്റിനും ടിക്ടോക്കിനും എതിരെയുള്ള നിയമ നടപടി നിർത്തിവെച്ച് യു.എസ്. പ്രസിഡന്റ് ജോ ബൈഡൻ. രാജ്യസുരക്ഷയ്ക്ക് ഭീഷണിയാണെന്നാരോപിച്ച് മുന് പ്രസിഡന്റ് ഡൊണാൾഡ് ട്രംപാണ് ഈ രണ്ട് ആപ്പുകൾക്കുമെതിരെ നിരോധന നടപടികൾ തുടങ്ങിയത്.
നിരോധന നീക്കങ്ങൾക്കെതിരെ ഇരു കന്പനികളും നിയമപരമായ നടപടികൾ സ്വീകരിച്ചിരുന്നു. ഇരു ആപ്പുകളും യഥാർത്ഥത്തിൽ രാജ്യത്തിന് ഭീഷണി സൃഷ്ടിക്കുന്നുണ്ടോ എന്നതിൽ പുനഃപരിശോധന നടത്തേണ്ടതുണ്ടെന്ന് കാണിച്ചാണ് ബൈഡൻ ഭരണകൂടം ട്രംപ് ആരംഭിച്ച നടപടികൾ നിർത്തിവെച്ചത്. ഇതോടെ രണ്ട് ആപ്പുകൾക്കും അമേരിക്കയിൽ തുടർന്ന് പ്രവർത്തിക്കാനാവും.നിരോധനം നേരിടുക അല്ലെങ്കിൽ ടിക്ടോക്കിന്റെ അമേരിക്കയിലെ പ്രവർത്തനങ്ങൾ ഏതെങ്കിലും അമേരിക്കൻ കന്പനിയ്ക്ക് കൈമാറുക എന്ന മുന്നറിയിപ്പാണ് ട്രംപ് ടിക്ടോക്ക് മാതൃസ്ഥാപനമായ ബൈറ്റ്ഡാൻസിന് നൽകിയിരുന്നത്. ഇതിന്റെ അടിസ്ഥാനത്തിൽ ഒറാക്കിൾ, വാൾമാർട്ട് തുടങ്ങിയ കന്പനികളുമായി ബൈറ്റ്ഡാൻസ് ചർച്ച നടത്തിയിരുന്നു.
