ബഹ്റൈനിലെ സ്വർണ്ണ-ആഭരണ വ്യാപാരികൾക്ക് മുന്നറിയിപ്പ്; 3,000 ദിനാറിന് മുകളിലുള്ള കാഷ് ഇടപാടുകൾക്ക് കർശന വിലക്ക്

പ്രദീപ് പുറവങ്കര

മനാമ: ബഹ്‌റൈനിൽ കള്ളപ്പണം വെളുപ്പിക്കൽ , ഭീകരവാദ ധനസഹായ തടയൽ നിയമങ്ങൾ ലംഘിക്കുന്ന സ്വർണ്ണ-ആഭരണ വ്യാപാരികൾക്കും അക്കൗണ്ട് ഓഡിറ്റിംഗ് സ്ഥാപനങ്ങൾക്കും 50,000 ബഹ്‌റൈൻ ദിനാർ വരെ പിഴ ചുമത്താൻ ഉത്തരവ്. വ്യവസായ വാണിജ്യ മന്ത്രി അബ്ദുള്ള ബിൻ ആദിൽ ഫഖ്‌റു പുറപ്പെടുവിച്ച 2026-ലെ 46-ാം നമ്പർ ഉത്തരവ് ഔദ്യോഗിക ഗെസറ്റിൽ പ്രസിദ്ധീകരിച്ചതോടെ ഉടനടി പ്രാബല്യത്തിൽ വന്നു.

പ്രാദേശികമായോ അന്താരാഷ്ട്ര തലത്തിലോ ഭീകരവാദ പട്ടികയിൽ ഉൾപ്പെട്ട വ്യക്തികളുമായോ സ്ഥാപനങ്ങളുമായോ ഇടപാടുകൾ നടത്തുക, ആഭ്യന്തര ഓഡിറ്റിംഗിലെ വീഴ്ചകൾ വരുത്തുക തുടങ്ങിയ ഗുരുതരമായ ലംഘനങ്ങൾക്കാണ് 25,000 ദിനാർ മുതൽ 50,000 ദിനാർ വരെ കനത്ത പിഴ ഈടാക്കുന്നത്. ഇടപാടുകാരുടെ കൃത്യമായ തിരിച്ചറിയൽ രേഖകൾ ശേഖരിക്കാതിരിക്കുക, സംശയാസ്പദമായ സാമ്പത്തിക ഇടപാടുകൾ റിപ്പോർട്ട് ചെയ്യാതിരിക്കുക, സാമ്പത്തിക രേഖകൾ സൂക്ഷിക്കാതിരിക്കുക തുടങ്ങിയ സാധാരണ നിബന്ധന ലംഘനങ്ങൾക്കും സാംങ്ഷൻ മാർഗ്ഗനിർദ്ദേശങ്ങളുടെ വീഴ്ചകൾക്കും 1,000 ദിനാർ മുതൽ 2,500 ദിനാർ വരെ പിഴ നിശ്ചയിച്ചിട്ടുണ്ട്.

സ്വർണ്ണ-ആഭരണ വ്യാപാരത്തിൽ പണമായുള്ള വലിയ ഇടപാടുകൾക്ക് കർശന നിയന്ത്രണം ഏർപ്പെടുത്തിയിട്ടുണ്ട്. 3,000 ദിനാറിന് മുകളിലോ അതിന് തുല്യമായ മറ്റ് കറൻസികളിലോ ഉള്ള തുക സ്വർണ്ണാഭരണ വിൽപ്പക്കായി നേരിട്ട് പണമായി സ്വീകരിക്കുന്നത് നിരോധിച്ചു. കൂടാതെ, 2,000 ദിനാറിന് മുകളിലുള്ള കാഷ് വിൽപ്പനയ്ക്ക് വാങ്ങുന്നയാളുടെ തിരിച്ചറിയൽ രേഖയുടെ (CPR/ID) പകർപ്പ് സൂക്ഷിക്കാത്ത വ്യാപാരികൾക്കെതിരെയും ഭരണപരമായ നടപടിയുണ്ടാകും.

സാമ്പത്തിക ഇടപാടുകളുടെ എല്ലാ രേഖകളും കുറഞ്ഞത് 5 വർഷമെങ്കിലും നിർബന്ധമായും സൂക്ഷിച്ചുവെക്കണം. രേഖകൾ നശിപ്പിക്കുകയോ അന്വേഷണ ഉദ്യോഗസ്ഥരെ അറിയിക്കാതെ വിവരങ്ങൾ മറച്ചുവെക്കുകയോ ചെയ്യുന്നത് കുറ്റകരമാണ്. പരിശോധന നടക്കുന്ന വിവരം ഉപഭോക്താക്കളെ മുൻകൂട്ടി അറിയിക്കാൻ പാടില്ലെന്നും പുതിയ ഉത്തരവിൽ കർശനമായി വ്യക്തമാക്കുന്നു.

ബഹ്‌റൈനിൽ കള്ളപ്പണം വെളുപ്പിക്കൽ തടയൽ നിയമങ്ങൾ ലംഘിക്കുന്ന സ്വർണ്ണ-ആഭരണ വ്യാപാരികൾക്കും അക്കൗണ്ട് ഓഡിറ്റർമാർക്കും 50,000 ദിനാർ വരെ പിഴ ചുമത്താൻ വ്യവസായ വാണിജ്യ മന്ത്രാലയം തീരുമാനിച്ചു. വ്യവസായ വാണിജ്യ മന്ത്രി അബ്ദുള്ള ബിൻ ആദിൽ ഫഖ്‌റോ പുറപ്പെടുവിച്ച പുതിയ ഉത്തരവ് പ്രകാരം, ഉപഭോക്താക്കളുടെ കൃത്യമായ രേഖകൾ ശേഖരിക്കാതിരിക്കൽ, സംശയാസ്പദമായ ഇടപാടുകൾ റിപ്പോർട്ട് ചെയ്യാതിരിക്കൽ എന്നിവയ്ക്ക് 1,000 മുതൽ 2,500 ദിനാർ വരെ പിഴ ഈടാക്കും. എന്നാൽ ഭീകരവാദ നിരോധന പട്ടികയിൽ ഉൾപ്പെട്ടവരുമായി ഇടപാടുകൾ നടത്തിയാൽ 50,000 ദിനാർ വരെ പിഴയൊടുക്കേണ്ടിവരും. സ്വർണ്ണക്കടകളിൽ 3,000 ദിനാറിന് മുകളിലുള്ള കാഷ് ഇടപാടുകൾ പൂർണ്ണമായി നിരോധിച്ചിട്ടുണ്ട്. 2,000 ദിനാറിന് മുകളിലുള്ള കാഷ് വിൽപ്പനയ്ക്ക് ഉപഭോക്താക്കളുടെ തിരിച്ചറിയൽ കാർഡ് പകർപ്പ് നിർബന്ധമാക്കി. രാജ്യത്തെ സാമ്പത്തിക മേഖലയുടെ സുതാര്യത ഉറപ്പുവരുത്താൻ മന്ത്രാലയം നടപ്പിലാക്കിയ ഉത്തരവ് പ്രാബല്യത്തിൽ വന്നു.

#4PMNews #BahrainGoldTrade #AntiMoneyLaundering #BahrainCommerce