ഓസ്കർ തിളക്കത്തിൽ 'വൺ ബാറ്റിൽ ആഫ്റ്റർ അനദർ'; മൈക്കിൾ ബി. ജോർദാൻ മികച്ച നടൻ
ശാരിക
ലോസ് ആഞ്ചലസ്: 98-ാമത് ഓസ്കർ പുരസ്കാരങ്ങളിൽ ആറ് അവാർഡുകൾ വാരിക്കൂട്ടി പോൾ തോമസ് ആൻഡേഴ്സന്റെ ‘വൺ ബാറ്റിൽ ആഫ്റ്റർ അനദർ’ മികച്ച വിജയമായി മാറി. മികച്ച ചിത്രം, മികച്ച സംവിധായകൻ ഉൾപ്പെടെയുള്ള പ്രധാന പുരസ്കാരങ്ങൾ ഈ ചിത്രം സ്വന്തമാക്കി. 'സിന്നേഴ്സ്' എന്ന ചിത്രത്തിലെ പ്രകടനത്തിലൂടെ മൈക്കിൾ ബി. ജോർദാൻ മികച്ച നടനായും 'ഹാംനെറ്റി'ലൂടെ ജെസി ബക്ലി മികച്ച നടിയായും തിരഞ്ഞെടുക്കപ്പെട്ടു.
മികച്ച ഛായാഗ്രഹണത്തിന് പുരസ്കാരം നേടിയ ഓട്ടം ഡ്യൂറൾഡ് അർക്കപോ, ഈ വിഭാഗത്തിൽ ഓസ്കർ നേടുന്ന ആദ്യ വനിതയും ആദ്യ കറുത്ത വർഗ്ഗക്കാരിയുമായി ചരിത്രം കുറിച്ചു. 'വൺ ബാറ്റിൽ ആഫ്റ്റർ അനദർ' എന്ന ചിത്രത്തിലെ അഭിനയത്തിന് ഷോൺ പെൻ മികച്ച സഹനടനായും 'വെപ്പൺസ്' എന്ന ചിത്രത്തിലൂടെ എമി മാഡിഗൺ മികച്ച സഹനടിയായും തിരഞ്ഞെടുക്കപ്പെട്ടു. മികച്ച തിരക്കഥയ്ക്കുള്ള പുരസ്കാരം റയാൻ കൂഗ്ലറും (സിന്നേഴ്സ്), മികച്ച അവലംബിത തിരക്കഥയ്ക്കുള്ള പുരസ്കാരം പോൾ തോമസ് ആൻഡേഴ്സണും സ്വന്തമാക്കി.
ഇത്തവണ പുതുതായി ഉൾപ്പെടുത്തിയ കാസ്റ്റിംഗ് ഡയറക്ഷനുള്ള അവാർഡ് കസാന്ദ്ര കുലുക്കുൻഡിസ് നേടി. 'ഫ്രാങ്കെൻസ്റ്റൈൻ' എന്ന ചിത്രം മികച്ച മേക്കപ്പ്, വസ്ത്രാലങ്കാരം എന്നീ പുരസ്കാരങ്ങൾ കരസ്ഥമാക്കിയപ്പോൾ, 'കെ-പോപ്പ് ഡെമൺ ഹണ്ടേഴ്സ്' മികച്ച ആനിമേറ്റഡ് ഫീച്ചർ സിനിമയായി തിരഞ്ഞെടുക്കപ്പെട്ടു. മികച്ച ആനിമേറ്റഡ് ഹ്രസ്വചിത്രം 'ദി ഗേൾ ഹൂ ക്രൈഡ് പേൾസ്' ആണ്.
qssaasdsad
